Bơtho Khôi Juăt 33:26-29
“Ơ bơngai Isơrael ih pŭn hiôk dêh, kon pơlei Kră Yang dŏng pơklaih bơih, Kră Yang . Sư thoi khêl pĕng tơgŭm ih, thoi đao gưm pơm ăn kơ ih kĕ jei jơnei tih. Lu bơngai ayăt gô năm chă pơm lung, na ih gô pơjuă bơhlơ̆r anih kơjung lu sư.” (Bơtho Khôi Juăt 33:29)
Nơ̆r jet tơchĕng pơwao:
– ‘Bok Môis yua iŏk tơdrong pơtih gia ayơ wă pơma roi gah tơdrong tih tin Kră Yang ‘Bok Kei-Dei?
– Yua kơ kiơ kon pơlei Isơrael jơ̆ minh adrĕch adrung đei pŭn hiôk?
– Yua kơ đơ̆ng kiơ jơhngơ̆m bơ̆n ling lang kơjăp lăm dôm tơdrong truh?
Sơ̆p Hla bơar Bơtho Khôi Juăt, ‘noh nơ̆r krao kon pơlei Isơrael arih păng pơm kiơ̆ nơ̆r Kră Yang. Mălei nơ̆r tuch luch mă ‘bok Môis khan kơ kon pơlei ưh kơ sĭ ‘noh nơ̆r krao athei lu sư pơm tơdrong kiơ, na mălei athei tơchĕng gah ‘Bok Kei-Dei tih hloh, păng băt tơdrong mơnat tih gơh jing minh kon pơlei pơla gah Sư. Tơdrong tih tin ‘Bok Kei-Dei ‘bok Môis đei pơma Sư păr brih tơ rơwơ̆ng păng dŏng tơgŭm kon pơlei Isơrael. ‘Bok Môis wă tơ’blŏk kơ kon pơlei thoi âu, ‘Bok Kei-Dei mă lu sư oei kơkuh noh ưh kơ sĭ Yang mă pơma ngôi ưh kơ đei tơpă dơ̆ng minh ‘bôt ‘bơ̆t hnam akŭm đĕch ôh, ưh kơ kĕ hơmet ‘bơ̆t kon pơlei pơmat mălei ‘Bok Kei-Dei bơih arih ling lang băt dôm tơdrong, băt hơđăl lăm to jơhngơ̆m kon bơngai, păng Tơ’ngla mă đei tơdrong mơsêh dŏng tơgŭm lu sư thoi Kră Yang đei pơm hăm kon pơlei Sư sơ̆.
Ưh kơ sĭ thoi ei đĕch, ‘Bok Kei-Dei bơih anih mă kon pơlei Sư oei, tơpang ti Sư ling lang bơwei lu sư đơ̆ng lu bơngai ayăt. Tơdrong noh bơih yua kơ kiơ mă ‘bok Môis pơma re thoi âu, kon pơlei Isơrael đei tơdrong pŭn hiôk tơpă. Lu sư đei pŭn hiôk yua kơ ‘Bok Kei-Dei oei jơ̆p lăm atăl plĕnh gô oei hơdai hăm lu sư lăm tơdrong tơblah iŏk anih Teh Pơkă tơ Kanaan, Kră Yang kư̆m jơ̆ Tơ’ngla bơwei lu sư lăm tơdrong tơblah đơ̆ng lu bơngai ayăt. Tơpă ưh kơ đei tơdrong mơnat ayơ tih hloh ‘noh tơdrong mơnat gơh jing minh kon pơlei pơla gah ‘Bok Kei-Dei.
Tơdrong tih hloh lăm minh ‘nu Bơngai Lui ưh kơ sĭ đei Kră Yang ăn tơdrong âu tơdrong to, mălei ‘noh gơh jing kon ‘Bok Kei-Dei. Ưh kơ đei tơdrong gĭt kăl ayơ hloh kơ jing kon pơlei Kră Yang. Yua kơ Kon Yang tơgŭm kơ bơ̆n ‘blŏk thoi âu, bơ̆n đei minh ‘nu ‘Bă tih tin ling lang ‘mêm kơ bơ̆n jơ̆ Tơ’ngla mă wei lăng pơgơ̆r tôm tơdrong lăm teh đak âu, ‘Bok mă băt đĭ dôm tơdrong pơmat mă bơ̆n oei tơ’bơ̆p tơ’bưh, păng kăl hloh noh Sư đei tơdrong mơsêh wă dŏng lu bơ̆n. Thoi ei, mă khan bơ̆n oei tơ’bơ̆p tơ’bưh hăm dôm tơdrong truh anat ayơ lăm tơdrong arih kư̆m ‘nĕ kơ bơ̆l hăl dah kơdŭn tơrŏng, yua kơ bơ̆n gah Kră Yang, jing kon ‘Bok Kei-Dei, tơpă Sư gô dŏng bơ̆n kiơ̆ kơ jơ năr Sư. Bơ̆n ling lang kơjăp lui ngeh kơ jơ năr păng tơdrong Kră Yang ăn kơ bơ̆n noh tơdrong ‘lơ̆ng dêh ăn kơ lu kon Sư.
Kơkuh kơ Ih Kră Yang, inh bơnê kơ Ih yua kơ inh gơh jing kon Ih. Apinh Ih bơtho inh ling lang arih trŏ hăm anih jing kon Pơtao kơpal plĕnh păng apinh Ih ăn kơ inh ling lang kơjăp ‘bơ̆t đei dôm tơdrong pơmat truh lăm chăl arih. Krao khan yua anăn Kră Yang Yêsu Krist, Amen.
Bơ̆n hăm chơt hiôk kơplah arih na jing kon Pơtao kơpal plĕnh ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 50
Kênh Youtube BHKTHN:
