Mă Tŭ Leh Anăn Hiu Hưn – 23/8/2021

1154

Klei Aê Diê Blŭ: I Kôrantô 15:3-4.

 

Êlan kliăng: “Kyuadah kâo mtô leh kơ diih klei yuôm hĭn, klei kâo pô mă tŭ leh msĕ mơh, jing klei Krist djiê leh kyua klei soh drei tui si Klei Aê Diê Blŭ čih leh, arăng dơr Ñu leh, Ñu lŏ hdĭp leh ti hruê tal tlâo, tui si Klei Aê Diê Blŭ čih leh.” (I Kôrantô 15:3-4).

 

Klei êmuh ksiêm mĭn: Ya jing boh phŭn Khua ƀĭng kna Y-Pôl sĭt suôr hiu hưn kơ grăp čô mnuih? Mơ̆ng kbiă hriê dŭm klei ñu bi hriăm? Si ngă drei tŭ mă klei bi mtlaih leh anăn hluê ngă bruă klam hiu hưn Klei Mrâo Mrang Jăk kơ phung riêng gah pô hlăm wưng êgao?

Boh phŭn hlăm dŭm klei Khua ƀĭng kna Y-Pôl hiu mtô mblang đru phung hmư̆ đaŏ leh anăn mâo klei bi mtlaih, anăn jing klei Khua Yang Yêsu djiê ti kyâo bi kal hrô kơ klei soh drei, Ñu tŭ klei arăng dơr leh anăn Ñu lŏ hdĭp hŏng klei guh kơang leh tlâo hruê hlăm msat. Jih tlâo klei yuôm bhăn anei amâo djŏ jing kbiă hriê mơ̆ng klei ñu bi mĭn ôh ƀiădah jih jang djŏ leh msĕ si Hdruôm hră Klei Aê Diê Blŭ hưn leh mơ̆ng dŭm êtuh thŭn êlâo, kyua anăn ñu mñă dua blư̆ “tui si Klei Aê Diê Blŭ čih leh”.

Sa klei mdê hjăn hlăm klei ñu hưn, “Kyuadah kâo mtô leh kơ diih klei yuôm hĭn, klei kâo pô mă tŭ leh msĕ mơh…” (êlan 3a). Klei Khua ƀĭng kna Y-Pôl mă tŭ leh anăn hưn amâo djŏ kyua ñu čŏng bi mĭn ôh, kăn djŏ ñu mă tŭ tlă anăp mơ̆ng Aê Diê rei, ƀiădah leh mă tŭ Klei Mrâo Mrang Jăk mơ̆ng klei hluê gưt Khua Yang Yêsu, ñu hmư̆ phung đaŏ kơ Krist mkăn hưn kơ Khua Yang snăn ñu dôk kjăp hlăm klei đaŏ anăn leh anăn mă tŭ (êlan 1-2), mơ̆ng anăn ñu sĭt suôr hưn kơ phung mkăn, klă klơ̆ng hlăm hră anei jing phung đaŏ ti Sang Aê Diê Kôrantô. Khua ƀĭng kna Y-Pôl mă tŭ leh klei bi mtlaih mơ̆ng Khua Yang Yêsu leh anăn hưn kơ lu mnuih čiăng digơ̆ dưi mâo klei bi mtlaih.

Hƀuê ênuk Sang Aê Diê brei ƀuh, lŏ čuê bruă phung khua ƀĭng kna, lu phug ba anăp, aê ama drei tŭ mă Klei Mrâo Mrang Jăk bi mtlaih, leh anăn sĭt suôr lŏ hưn kơ grăp čô mnuih, kyua anăn drei wăt tơdah amâo djŏ jing phung ƀuôn sang Yuđa ôh, wăt tơdah kăn dưi hmư̆ tlă anăo Khua Yang Yêsu mtô mblang rei, ƀiădah drei ăt mâo klei găl dưi hmư̆ Klei Mrâo Mrang Jăk leh anăn mâo Yang Mngăt Jăk mtrang čiăng thâo săng leh anăn mă tŭ Khua Yang Yêsu. Kyua anăn grăp čô drei brei tui hluê Khua ƀĭng kna Y-Pôl, ƀuh bruă klam hiu hưn kơ phung riêng gah pô ya klei pô mă tŭ, thâo leh. Snăn kơh, Klei Mrâo Mrang Jăk Aê Diê dưi hưn tar ƀar lăn ala leh anăn hruê Khua Yang Pô Bi Mtlaih khăp hơiêng phung drei srăng hnưm lŏ hriê (Y-Mathiơ 24:14). Êngao anăn, brei drei hdơr, amâo djŏ ôh hiu hưn êpul phung đaŏ pô, sang Aê Diê pô, klei đaŏ pô ƀiădah brei sĭt suôr hiu hưn klei Khua Yang Yêsu djiê hrô kơ drei, klei dơr leh anăn klei Ñu lŏ hdĭp tui si Klei Aê Diê Blŭ čih leh.

Drei hluê ngă leh mơ̆ bruă klam hiu hưn Klei Mrâo Mrang Jăk kơ phung riêng gah msĕ si klei pô mă tŭ leh amâodah ka?

Ơ Khua Yang Yêsu Krist jing Pô Bi Mtlaih! Kâo bi mni lač jăk kơ Ih kyua Ih djiê hrô kơ klei soh kâo tui si Klei Aê Diê Blŭ čih leh; arăng dơr Ih, truh hruê tal tlâo, Ih lŏ hdĭp, tui si Klei Aê Diê Blŭ čih leh. Akâo kơ Ih đru kâo thâo bruă klam pô čiăng sĭt suôr nanao hiu hưn Klei Mrâo Mrang Jăk kâo mă tŭ leh.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Dlăng Klei Aê Diê Blŭ hlăm tlâo thŭn: Phung Khua Phat Kđi 9:1-21

Kênh Youtube BHKTHN:

https://www.youtube.com/channel/UCaSY8ebjVfMKhPups5jZ9yw

Bài trướcViện Thánh Kinh Thần Học Sau Một Tháng Ứng Phó Với Dịch Bệnh Covid-19
Bài tiếp theoNhận Lãnh và Truyền Rao – 23/8/2021