Klei Aê Diê Blŭ: I Y-Yôhan 3:18
Êlan kliăng: “Ơ phung anak điêt, đăm drei khăp knŏng hŏng boh blŭ leh anăn ti êlah kƀuê ôh, ƀiădah hŏng klei ngă leh anăn hŏng klei sĭt. ” ( I Y-Yôhan 3:18)
Klei êmuh ksiêm mĭn: Si klei khăp sĭt bi êdah? Ya ngă lu mnuih ruah yua boh blŭ čiăng bi êdah klei khăp hŏng pô mkăn? Ya knuih thâo gĭr mơ̆ng boh Yang Mngăt Jăk mâo kdrêč đru hlăm knhuah hdĭp thâo khăp? Ya klei brei bi mâo hĕ čiăng dưi mâo klei hdĭp thâo khăp sĭt?
Si jing klei khăp? Mơ̆ng đưm dih truh kơ hruê anei, mâo lu lĭn klei wĭt lač kơ klei êmuh anei. Ƀiădah tinei, khua ƀĭng kna Y-Yôhan brei drei thâo săng si jing klei khăp. Êlâo hĭn, klei khăp AMÂO DJŎ KNŎNG bi êdah mă hŏng “boh blŭ leh anăn ti êlah kƀuê” ôh, mklăk kdơ̆ng hŏng “klei ngă leh anăn hŏng klei sĭt”, drei dưi thâo săng khua ƀĭng kna čiăng ktrâo lač kơ phung knŏng khăp hŏng boh blŭ đuč. Ya ngă lu mnuih ruah boh blŭ čiăng bi êdah klei khăp hŏng pô mkăn? Kyuadah anei jing ênhă êlan djăl hĭn, ênưih hĭn, leh anăn boh nik nak amâo guôn mâo ya mta klei săn asei kơ klei khăp anăn ôh. Ƀiădah bi kơ klei khăp sĭt jing lu hĭn kơ boh blŭ. Klei khăp sĭt brei mâo bruă bi êdah, leh anăn boh nik bruă anăn kbiă mơ̆ng klei săn asei. Drei jhŏng lač klă, tơdah amâo mâo klei săn asei snăn amâo mâo klei khăp ôh. Khua ƀĭng kna Y-Yôhan lač leh hlăm hră čih I Y-Yôhan 4:9 Khua Yang Yêsu Pô yơh brei drei thâo săng klei mblang kơ klei khăp: “Hlăm klei anei Aê Diê bi êdah leh klei Ñu khăp kơ drei: Aê Diê tiŏ hriê leh Anak Ñu mâo knŏng sa čô kơ lăn ala, čiăng kơ drei dưi dôk hdĭp kyua Ñu.”
Klei khăp kăn djŏ knŏng bi êdah hlăm “klei ngă” rei ƀiădah ăt wăt hlăm “klei sĭt” mơh. Klei ngă klei khăp brei đru kơ pô brei wăt kơ pô mă tŭ dưi jing jăk hĭn, thâo kral Khua Yang hĭn, prŏng khue hĭn. Klei khăp amâo djŏ ngă dŭm mta klei pô mkăn khăp čiăng ôh ƀiădah ngă mta klei yuôm năng mâo kơ pô anăn. Kyuanăn yơh klei khăp brei bi êdah hŏng klei ƀuah mkra, mtô mtă bi hriăm, kpĭ mjuăt, leh anăn wăt hŏng klei hngah mơh.
Mdê hŏng “boh blŭ”, “klei ngă leh anăn hŏng klei sĭt” brei mâo hruê mmông, ai tiê tŭ gĭr leh anăn hñăn ai. Drei ênưih kah mbha klei ênguôt hnĭng leh anăn čŏk hia mbĭt hŏng sa čô mô̆ mrâo djiê ung, ƀiădah bi kơ klei pioh hruê mmông nao čuă čhưn, bi juh, leh anăn kah mbha mnơ̆ng yua gơ̆ kƀah hlăm hruê mlan êdei anăp jing bruă ngă mdê kbưi. Kdlưn hĭn dơ̆ng, si thâo khăp hŏng “klei sĭt” tơdah hlăm drei pô amâo mâo ôh “klei sĭt”? Leh anăn “klei sĭt” amâo djŏ čŏng mâo mă hjăn ôh ƀiădah hŏng klei pioh lu hruê mmông dôk sĭt suôr kjăp ai tiê ksiêm hriăm Klei Aê Diê Blŭ sĭt êmĭt leh anăn čiêm rông klei hdĭp myang drei. Mâo sa čô khua pô mtô lač snei: “Klei khăp sĭt msĕ hŏng klei êran bŏ hŏng klei knap mñai”. Akâo kơ Aê Diê brei grăp čô drei thâo săng čiăng kơ boh klei gĭr mơ̆ng Yang Mngăt Jăk mâo kdrêč hlăm knhuah hdĭp thâo khăp sĭt kơ phung riêng gah drei.
Si ngă drei dôk hdĭp hŏng klei khăp sĭt kơ phung riêng gah drei mơ̆?
Ơ Khua Yang, bi mni lač jăk kơ Ih kyua dŭm pô Ih mdưm leh hlăm klei hdĭp kâo. Akâo kơ Ih đru kâo thâo khăp kơ ayŏng amai adei kâo hŏng klei sĭt leh anăn kjăp, čiăng kơ hŏng klei anăn yơh grăp hruê jih jang hmei srăng thâo kral Ih kdlưn hĭn êjai.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 4
Kênh Youtube BHKTHN:
https://www.youtube.com/channel/UCaSY8ebjVfMKhPups5jZ9yw
