Philêmôn 4-7
“Inh krao khan bơnê kơ ‘Bă tơm bơ̆n ‘Bok Kei-Dei ling lang…” (Philêmôn trong 4).
Nơ̆r jet tơchĕng pơwao:
– ‘Bok Pôl bơnê kơ Kră Yang gah tơdrong kiơ kơplah sư krao khan kơ Philêmôn?
– Sư krao khan apinh ‘Bok Kei-Dei ăn tơdrong kiơ kơ Philêmôn?
– Bơ̆n đei tơdrong pơlung thoi yơ gah jơhngơ̆m krao khan tang dih băl?
Rim wơ̆t pơma ‘blŏk kơ Philêmôn lăm nơ̆r krao khan. ‘Bok Pôl ưh kơ pơdơh bơnê kơ Kră Yang “kơlih kơ inh kơtơ̆ng ang ih lui kơjăp kơ Kră Yang Yêsu Krist păng ih ‘mêm kơ Sư hăm đĭ đăng buăl lui mơ̆n.” (trong 5). ‘Bok Pôl kơtơ̆ng ang ‘bar tơdrong ‘lơ̆ng ‘noh tơdrong ‘mêm păng đon lui ‘bok Philêmôn: Mă mônh, tơdrong ‘mêm sư ling lang lăng gah lu bơngai lui nai. Mă ‘bar, đon lui sư ling lang lăng gah Kră Yang Yêsu, ‘bok Philêmôn păng hnam dơnŏ sư đei jơhngơ̆m tơgŭm khul bơngai lui, tơdrong noh tơ’bôh tơdrong ‘mêm păng đon lui sư pơgơ̆p kơjăp dih băl. Kơmĭl arih ‘lơ̆ng đơ̆ng Philêmôn noh kư̆m tơdrong bơ̆n kăl kơ tơchĕng lăng bơ̆n kơdih. Kơmĭl noh ưh kơ sĭ ‘bơm truh kơ khul bơngai lui đĕch na đei ‘bơm hloi tơ ‘bok Pôl bơngai jơ̆ng ‘bang Kră Yang lăm hnam phak, kơmĭl arih lu bơ̆n ‘noh kơmĭl ‘lơ̆ng dah kơmĭl kơnê̆?
Tơdrong pha dơ̆ng, hmă sư ‘bok Pôl pơm hơđăl tơdrong lui adrol kơ tơdrong ‘mêm. Mălei lăm âu tơdrong mă sư lăng tơchĕng dêh gah tơdrong ‘mêm Philêmôn (trong 7). Tơdrong ‘nâu đei tơ’bôh ‘bok Pôl ‘măn adrol hloh noh krao khan apinh Kră Yang pơm kơ jơhngơ̆m Philêmôn băt tơgŭm truh kơ đei jơhngơ̆m băt mơnat păng sơng iŏk thoi ‘nhŏng oh lăm đon lui. Đơ̆ng tơdrong ‘mêm păng đon lui gô tơgŭm kơ sư rai hlôh băt, păng ‘brơ̆k mơnat gah dôm tơdrong pŭn hiôk Kră Yang ăn.
‘Bok Pôl krao khan: “Inh kư̆m ling lang krao khan kơ ‘Bok Kei-Dei ăn kơ ih đei đon gơh mơnat kơ đe tơdŏng đe wă kơ đe ‘bôh dôm tơdrong Yêsu Krist ăn kơ ih băt mơnat kơ đe. Thoi noh na đe băt kơ ih lui kơjăp tơpă.” (trong 6). Lăm đon lui kơ Kră Yang Yêsu, sư apinh Kră Yang tơgŭm thim jơhngơ̆m pran wă kơ ‘bok Philêmôn păng lu bơngai tơnăp pơm kơ đon lui kơ Kră Yang jing pơm tơ’bôh hloi tơdrong ‘mêm, pơm kơ lơ bơngai băt kơ Anăn Kră Yang.
Nơ̆r ‘bok Pôl krao khan pơlung bơ̆n ling lang ‘blŏk răk dih băl wă krao khan tang dih băl (trong 4). Athei ling lang krao khan apinh Kră Yang ăn tơdrong mơnat wă kơ đon lui lu ‘nhŏng oh bơ̆n pơm tơ’bôh tơdrong ‘mêm. Apinh Kră Yang ăn kơ ‘nhŏng oh bơ̆n lăm Kră Yang wă pơgơ̆p tơ’bưh hơmet đơ̆ng dôm tơdrong ưh kơ hiôk dih băl, đĭ jơhngơ̆m hiơ̆k tơgŭm dih băl mă đơ̆ng gah bơhngol truh tơ sĕch akar. ‘Bok Pôl đei khan kơ ‘bok Philêmôn thoi âu: “Inh chơt hiôk tơpă kơlih kơ ih gơh ‘mêm mơnat kơ ‘nhŏng oh bơngai lui pơm kơ jơhngơ̆m lu sư hiôk hơiă hăm ih.” (trong 7). Jơhngơ̆m krao khan tang ‘mêm mơnat dih băl ling lang pơm kơ jơhngơ̆m hiôk băl, đơ̆ng anih phak tơngiĕt ding truh tơ đĭ đăng kon Kră Yang. Apinh tơdrong arih rim ‘nu lu bơ̆n ling lang pơm pơhiôk jơhngơ̆m dih băl.
Ơ Kră Yang, apinh tơgŭm ăn kơ inh tơ’bôh đon lui hăm tơdrong ‘mêm. Apinh ăn kơ inh đei jơhngơ̆m băt mơnat, păng wă tơgŭm bơngai nai ‘blŏk ling lang, krao khan dih băl, ba tơdrong pơtrŭt, pơlung băl lăm tôm tơdrong. Krao khan yua anăn Kră Yang Yêsu Krist, Amen.
Bơ̆n wă pơtơm krao khan tang kơ lu đe bu păng tơdrong kiơ lăm năr ‘nâu?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 29
Kênh Youtube BHKTHN:
