Markôs 1:32-35
“Lăp pơgê hrôih năr đơ̆ng rŏng, Yêsu lĕch hloi đơ̆ng pơlei ei năm tơ anih kueng kơdrô̆, Sư krao khan kơdrô̆ Sư tơ ei.” (Markôs 1:35)
Nơ̆r jet tơchĕng pơwao:
– Đơ̆ng rŏng kơ năr pơdơh Sa’bat hrăt hrot đơ̆ng pơge truh kơ măng, Kră Yang Yêsu pơm kiơ kơplah til pơge hrôih năr đơ̆ng rŏng?
– Tơdrong krao khan đei ‘bơm thoi yơ lăm tơdrong jang Kră Yang Yêsu?
– Lu bơ̆n đei pơhrăm iŏk tơdrong kiơ đơ̆ng Kră Yang gah kơmĭl krao khan?
Tơ pơlei Kapernum, lăm năr pơdơh Sa’bat, Kră Yang Yêsu mơ̆t tơ hnam akŭm ‘Bok Kei-Dei wă bơtho păng pơklaih minh ‘nu yang kơnê̆ mơ̆t. Lĕch đơ̆ng hnam akŭm ei na Sư năm tơ hnam dơnŏ tơnei Pêtrôs păng pơklaih hloi yă ei oei păn kơ bơlŏ. ‘Năr wă jê̆ mơ̆t bơih, wă khan đĭ năr pơdơh Sa’bat, đei lơ bơngai năm tơkan tơ Yêsu, apinh pơklaih lơ tơdrong jĭ jăn kư̆m đei lu bơngai yang kơnê̆ mơ̆t hai. Kră Yang ‘măn jơ năr đei jơhngơ̆m pran wă pơklaih đĭ dôm tơdrong jĭ jăn lu sư. Mălei truh pơge hrôih năr đơ̆ng rŏng, kơplah ‘năr tam mă hơdah, Kră Yang Yêsu iung đơ̆ng tep, lĕch hloi đơ̆ng pơlei noh “năm tơ anih kueng kơdrô̆” Sư krao khan kơdrô̆ Sư tơ ei. (trong 35). Đơ̆ng rŏng kơ Sư krao khan bơih, Kră Yang hăm lu bơngai pơhrăm păng Sư năm jơ̆p pơlei wă chă bơtho, tơ’bôh tơdrong dŏng pơklaih đơ̆ng ‘Bok Kei-Dei.
Nơ̆r Grĕk đei tơblang khan “anih kueng kơdrô̆” wă tơbăt minh anih kơdrô̆ tơklah đơ̆ng bơngai lơ păng kŭm tơklah đơ̆ng lu bơngai pơhrăm păng Sư. Nơ̆r “Krao khan” lăm âu đei tơ’bôh gah tơdrong krao khan ưh kơ lê̆, krao khan ling lang. Sơ̆p hla bơar Markôs đei pơma kơ ‘bar anih kueng kơdrô̆ pha ‘biơ̆ kơ anih Kră Yang đei juăt kơ năm krao khan, lăm Markôs 6:46 đơ̆ng rŏng kơ ‘me pơđăm rơbâu ‘nu bơngai sa ‘bĕng mi, Kră Yang “tŏk tơ kông krao khan”, păng lăm Markôs 14:32-34, Kră Yang năm krao khan lăm pơgar Gêtsêmanê pêng wơ̆t, păng pêng anih ‘noh tă kơ anih anat anot kơplah Sư đei tơdrong pơhlŭ rơih trong ‘bônh ‘biơ̆ tơplih kơ rơih iŏk trong pơmat păng pŭ iŏk yua kơ tơdrong yoch kon bơngai.
Kră Yang Yêsu bơih Kon ‘Bok Kei-Dei, mălei kơplah Sư jur jing kon bơngai, Sư ling lang chu kiơ̆ tơdrong ‘Bok Kei-Dei dan hơmet păng bơ̆jang lăm tơdrong mơsêh đơ̆ng Yang Bơhngol ‘Lơ̆ng. Thoi noh, na Sư ling lang krao khan păng ‘măn jơ krao khan adrol hloh. Kŭm thoi noh mơ̆n, hlôi kơ dôm jơ hnơr tơdrong krao khan ling lang gĭt kăl tơpă lăm chăl arih kon pơlei Kră Yang. Lăm tơdrong akŭm kơkuh hơdai khul bơngai lui, krao khan bơih tơm kăl. Mă khan lei ră, tơdrong krao khan ưh kơsĭ ‘măn lăm jơ akŭm đĕch ôh, kon pơlei Kră Yang athei pơhrăm rok kơmĭl Kră Yang Yêsu ‘măn jơ kơdrô̆, rơih iŏk minh anih “kueng kơdrô̆” wă kơ đei tơdrong tơ’bưh bơ̆n hăm Kră Yang. Anih kueng kơdrô̆ lu bơ̆n dang ei ưh kơsĭ khan athei tŏk tơ kông kơjung dah minh anih hlơp lăm pơgar, mălei wă khan tơ anih ayơ kueng kơdrô̆ mă huay kơ đei bơngai dah tơdrong kiơ đei pơm pơjuăl dah pơm kơ bơ̆n hrơ̆ng hreng kơplah krao khan hăm Kră Yang ling lang. Gô đei Yang Bơhngol ‘Lơ̆ng pơlung bơ̆n, thim jơhngơ̆m pran păng chông anhăk lu bơ̆n hlôi đơ̆ng tơdrong pơmat tat păng tơdrong pơhlŭ lăm chăl arih kơplah bơ̆n năm tơ anih kueng kơdrô̆ wă krao khan hăm Kră Yang.
Ơ Kră Yang, apinh mơnat đơ̆ng Ih yua kơ lơ wơ̆t inh ưh kơ đei ‘măn jơ adrol hloh wă krao khan kơ Ih. Apinh Ih tơgŭm inh chă tơdrong bơtho tơ’bôh đơ̆ng Ih, thim jơhngơ̆m pran lăm tơdrong krao khan hăm Kră Yang tơ anih kueng kơdrô̆, yua anăn Kră Yang Yêsu Krist, Amen!
Lu bơ̆n đei pơhrăm rok kơmĭl Kră Yang Yêsu tam đei roi dôm tơdrong bơ̆n, dan hơmet lê̆ ăn kơ Kră Yang dah mă oei gô ‘mơ̆i?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Pơđơ̆k 21
Kênh Youtube BHKTHN:
