Mathiơ 26:36-46
“Ơ lu ‘nhŏng oh, yua kơ bơ̆n lui kơ Kră Yang bơ̆n Yêsu Krist păng yua kơ Yang Bơhngol ‘Lơ̆ng ăn kơ bơ̆n đei đon ‘mêm mơnat dih băl tơduă bơ̆n bơngai lui, na inh apinh iĕm adrin krao khan kơ ‘Bok Kei-Dei tơgŭm inh hŏ” (Rôm 15:30)
Nơ̆r jet tơchĕng pơwao:
– Lăm măng đe rôp, Kră Yang Yêsu tơ tăm kơ tơdrong kiơ?
– Sư đei krao khan thoi yơ?
– Lu bơ̆n pơhrăm iŏk tơdrong kiơ đơ̆ng kơmĭl Kră Yang gah tơdrong adrin krao khan?
Lăm măng đe rôp Kră Yang Yêsu, Juđa Ikariôt bơngai plơ̆ plĕch Sư, lu bơngai pơhrăm păng sư achăng lê̆ Sư, na Sư chu iŏk đe wă jê̆ pơ̆ng Sư tơ ‘long pơglang, Kră Yang Yêsu hli tơ tăm tơpă, Sư sơ’ngon dêh Kră Yang wă hrŭk pŭ iŏk tơdrong yoch kon bơngai tơ ‘long pơglang na Sư kăl kơ adrin hăm tơdrong krao khan, gĭt kăl hloh dơ̆ng krao khan tơgŭm dih băl. Mălei, tơdrong apơi noh ưh kơ jing.
Yua kơ kiơ pêng ‘nu bơngai pơhrăm păng Sư mă Sư ‘mêm kơeng dêh na lu Sư oei tep hiôk đĕch kơplah Yêsu sơ’ngon dêh păng kơdrô̆ Sư đĕch adrin krao khan? Nơ̆r tơl rơđah hơđăl dêh lu sư ưh kơ tơchĕng păng ưh kơ bơngơ̆t tơdrong wă truh kơ ‘bok thây lu sư, inh băt kơ jơhngơ̆m đon iĕm wă ră, mălei akâu iĕm ưh kơ kĕ (trong 41). Kră Yang pơrơ̆ng tơklah pêng ‘nu noh wă krao khan hơdai sư, mălei lu sư ưh kơ đei jơhngơ̆m wă adrin lăm tơdrong krao khan “mah tuh bơuh bơang thoi lĕ kơ pham lĕch đơ̆ng akâu Sư.” (Luka 22:44). Kiơ̆ kơ tơdrong rơgei đe khan bơuh bơang thoi lĕ kơ pham (Hematidrosis) kơplah minh ‘nu bơngai hli tơtăm. Kră Yang krao khan rim jơ Sư pơma pơlơ̆k pơle lăm tơdrong krao khan noh đĕch (trong 40. 44)! Bơngai chih hla bơar Hêbrơ đei tơbă: “Kơplah Yêsu oei tơ teh âu sơ̆, Sư krao pơret ‘Bă Sư păng hmoi apơi kơ ‘Bă Sư, yua kơ Sư băt kơ ‘Bă Sư gơh tơdŏng Sư đơ̆ng tơdrong lôch. Na ‘Bok Kei-Dei mơ̆ng Sư, yua kơ Sư chu yom kơ ‘Bok Kei-Dei.” (Hêbrơ 5:7) Mưh bơ̆n adrin lăm tơdrong krao khan, pơtơm blŭng a păng tuch luch hloi mơ̆n, kiơ̆ Kră Yang tơchĕng phara kơ ‘Bă Sư! Tơdrong noh tơ’bôh pŭ iŏk tơdrong yoch tih krưp dang yơ! Kră Yang ưh kơsĭ adrin krao khan lăm pơgar Gêtsêmanê đĕch ôh, mălei adrol noh sư krao khan đunh năr kơ tơdrong ‘lơ̆ng păng pôm jơhngơ̆m đon lu bơngai lui kơ Sư. (Yôhan 17) Mă truh dang ei, Kră Yang oei krao khan tơgŭm kơ lu bơ̆n: “Lu ‘bok soi nai, rim năr lu sư soi kơ ‘Bok Kei-Dei. Lu sư soi pơ’lơ̆ng gah tơdrong yoch lu sư kơdih ‘mơ̆i, na soi kơ lu kon pơlei pơla. Mă-lei gah Yêsu ưh ôh, Sư soi akâu Sư kơ ‘Bok Kei-Dei minh ‘măng tơ ‘long pơglang tôm boih.” (Hêbrơ 7:25)
Kră Yang Yêsu Kon ‘Bok Kei-Dei rai adrin krao khan ding truh jơ tuch luch sư arih tơ ala teh. Na lu bơ̆n bơngai yoch kơnê̆ dêh mălei ưh kơ wă krao khan mă khan krao khan chă pơtrŏ đĕch khan huay ngăl bơih! Kră Yang Yêsu đei pơm kơmĭl kơ lu bơ̆n wă kơ lu bơ̆n pơm rok kiơ̆ Sư, adrin khan khan ưh kơ pơdơh.
Ơ Kră Yang mă inh ‘mêm kơeng. Apinh Ih tơgŭm inh kral kơchăng krao khan wă huay kơ puh lăm tơdrong pơhlŭ, păng pơhrăm kiơ̆ kơmĭl Kră Yang Yêsu adrin krao khan ding đĭ chăl arih, yua anăn Kră Yang Yêsu Krist, Amen!
Tơdrong anat lăm chăl arih, lu bơ̆n adrin krao khan thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 2
Kênh Youtube BHKTHN:
