Yakơ 5:13-15
“Sư mơnat ăn dôm tơdrong yoch đêl ih pơm, Pơklaih dôm tơdrong jĭ-jăn ih.” (Hơriso 103:3)
Nơ̆r jet tơchĕng pơwao:
– ‘Bok Yakơ bơtho lu bơngai lui đĭ tơklah tơklang pơm kiơ kơplah đei tơdrong jĭ jăn dah hiôk chơt?
– Yua kơ kiơ sư pơma ‘bơm tơdrong yoch?
– Bơ̆n pơm kiơ kơplah đei tơdrong jĭ jăn, dah đei tơdrong gleh truh, anat anot lăm tơdrong arih?
Krao khan đei pơtih thoi kơ dui jơhngơ̆m păng jơhngơ̆m pran tơdrong arih gah bơhngol bơngai lui. Krao khan ưh kơ trŏ kơ minh tơdrong jang, bơ̆jang wă rơih iŏk kiơ̆ kơ tơdrong gơh hơgei bơ̆n đei, mălei noh jơ̆ tơdrong tơ’bưh hăm ‘Bă tơ plĕnh ti mă kơplah ayơ, mă tơ anih ayơ kơdih bơ̆n thoi bơ̆n dui jơhngơ̆m rim năr rim măng mơ̆n. Lăm kơthơ chih ăn kơ mơjĭt ‘bar khul bơngai Isơrael đĭ tơklah tơklang. ‘Bok Yakơ pơlung lu bơngai mă đei đon lui kơjăp, lăng “mă đei tơdrong gleh kiơ truh, athei hiôk đĕch hŏ.” (Yakơ 1:2). Kư̆m athei đei nơ̆r krao khan hăm tơdrong hơri bơnê kơkuh kơ Kră Yang. Tơ̆ng bu đei tơdrong jĭ jăn, sư athei krao lu kră wei lăng lu bơngai lui năm krao khan kơ sư hăm pik đak pơgang tơ akâu sư. Tơdrong pik đak pơgang ưh kơ trŏ wă pơklaih tơdrong jĭ mălei noh wă tơ’bôh tơdrong mơnat ăn tơdrong yoch păng pơm rơgoh ăn kơ Kră Yang (LĐ Êyiptơ 30:26-29) Kră Yang gô pơklaih tơdrong jĭ jăn bơngai noh ăn kơ sư ‘lơ̆ng akâu dang đêl.
Trong 15 pơma ‘bơm tơdrong arih gah bơhngol bơngai jĭ Kră Yang gô “pơklaih bơngai jĭ,” “mă sư pơm yoch ‘Bok Kei-Dei kư̆m mơnat pơklaih yoch sư mơ̆n.” ‘Bok Yakơ yua chư “Tơdah” “mă” lăm âu tơ’bôh ăn ưh kơ trŏ jĭ jăn yua kơ đơ̆ng pơm yoch ngăl ôh, thoi bơngai măt tol đơ̆ng mĕ sư tơpŭ sơ̆ ưh kơ trŏ yua kơ đơ̆ng mĕ ‘bă sư pơm yoch (Yôhan 9:1-3). Dah mă đei tơdrong jĭ truh kơ ‘bok Jop dah mă ‘bok Pôl noh jơ̆ tơdrong pơlong lăng, mălei băt tơpă tơdrong arih gah bơhngol ưh kơ kĕ jei gô đei tơdrong yoch. Hla bơar nơ̆r ‘Bok Kei-Dei Pah so đei tơbăt tơdrong jĭ jăn păng tơdrong yoch đei ‘bơm băl. (Hơriso 38:3; Mika 6:12-13; Jêphania 1:17). Kră Yang Yêsu kư̆m khan tơdrong noh kơplah Sư pơklaih bơngai jĭ đunh sơnăm ưh kơ gơh yak (Yôhan 5:14). Nơ̆r bơtho ‘bok Yakơ tơ’bôh ăn krao khan ba ăn tơdrong pơklaih bơngai jĭ gah sĕch akar păng gơh mơnat ăn tơdrong yoch wă kơ bơhngol jơjăp krao khan, roi tơdrong yoch jơ̆ minh tơdrong lăm dôm tơdrong kăl tơpă kơ tơdrong arih bơngai lui wă kơ gơh đei tơdrong mơnat ăn păng pơklaih gah sĕch akar păng bơhngol hloi. Kơplah bơ̆n đei tơdrong jĭ jăn, dah tơ’bơ̆p tơdrong gleh truh, anat anot lăm tơdrong arih bơ̆n, hơdrol hloh athei tơchĕng lăm lăm akâu bơ̆n kơdih ‘mơ̆i hăm đei pơm yoch dah ưh kơ hli yom kơ Kră Yang dah mă pơm tơdrong kiơ tơplơ̆ hăm Kră Yang wă ưh? Athei roi păng tŭk lê̆, hăm đon lui pơyơ̆r nơ̆r krao khan kơ Kră Yang. Bơ̆n băt bơih, ưh kơ trŏ kơ layơ Kră Yang kư̆m pơklaih tơdrong jĭ gah sĕch akar ngăl ôh, mălei băt tơpă kơplah Kră Yang mơnat ăn, bơhngol bơ̆n gô hiôk ‘lơ̆ng, păng bơ̆n gô klaih tôm đơ̆ng gah sĕch akar păng bơhngol hloi lăm năr tơ’bơ̆p Kră Yang, oei hơdai hăm Sư.
Ơ ‘Bă ‘mêm mơnat, inh đei pơm yoch hăm ‘Bă lăm tơdrong tơchĕng, nơ̆r pơma păng tơdrong inh pơm. Inh tam mă ‘mêm kơ ‘Bă đĭ jơhngơ̆m, tam mă ‘mêm đĭ jơhngơ̆m krao khan kơplah đei tơdrong jĭ gah sĕch akar dah gah bơhngol. Apinh ‘Bă mơnat ăn kơ inh, pơklaih păng ăn hiôk hian kơ inh. Yua anăn Kră Yang Yêsu Krist, Amen.
Bơ̆n pơkă hăm Kră Yang tơdrong kiơ kơplah Kră Yang mơnat păng pơklaih?
Ưh kơ gô gleh glăn, pơma tat
Rim năr krao khan, băt kơ Kră Yang mơnat tơbral yoch bơ̆n
Tơdrong ‘mêm Kră Yang ăn bơhngol hiôk ‘lơ̆ng
Ăn liĕm akâu, hơđơ̆ng chơt hiôk
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 23
Kênh Youtube BHKTHN:
