Luka 2:25-32
“… bôl buăl krao khan tơgŭm, ‘Bok Kei-Dei gô ăn kơ lu iĕm mă jĭ-jăn klaih praih iung. Bơngai mă lui kơjăp ưh kơ đei tơdrong yoch sư krao khan adrin tơpă na ‘Bok Kei-Dei gô tơl tơwih dôm tơdrong sư krao khan noh.” (Yakơ 5:16)
Nơ̆r jet tơchĕng pơwao:
– Sơ̆p Hla bơar ‘Bok Kei-Dei roi tơ’bôh ‘bok Simiôn jơ̆ bơngai thoi yơ?
– Tơdrong hơpơi sư đei yua thoi yơ?
– Pơm thoi yơ wă kơ bơ̆n adrin krao khan păng chang gô Kră Yang wă?
Sơ̆p Hla bơar ‘Bok Kei-Dei roi tơ’bôh ‘bok Simiôn oei tơ pơlei Jêrusalem, “sư bơngai ‘lơ̆ng tơpăt” păng “chang gô ‘bok Krist dŏng pơklaih lu bơngai Isơrael” păng “Yang Bơhngol ‘Lơ̆ng oei hơdai sư” (trong 25). Tơdrong hơpơi sư adrol kơ sư wă lôch gơh ‘bôh Kră Yang Dŏng Pơklaih lu bơngai Isơrael. Păng Yang Bơhngol ‘Lơ̆ng tơbăt ăn kơ sư, adrol kơ sư wă lôch sư gô ‘bôh ‘Bok Krist mă ‘Bok Kei-Dei wơh wă pơklaih kon bơngai. Lăp mĕ ‘bă Yêsu anhăk Yêsu mơ̆t tơ noh bơih wă pơyơ̆r Sư kơ ‘Bok Kei-Dei kiơ̆ kơ tơdrong juăt Kră Yang pơkă, na Simiôn iŏk pôk Yêsu krao khan bơnê kơ ‘Bok Kei-Dei. Nơ̆r hơri ‘bok Simiôn jơ̆ minh nơ̆r đei pơsĭt trŏ kơ gơnang kơ bơngai ‘lơ̆ng tơpăt tơdrong pơm ‘lơ̆ng đei Yang Bơhngol ‘Lơ̆ng oei hơdai.
‘Bok Simiôn đei lơ sơnăm krao khan păng chang gô wă kơ gơh ‘bôh Yang Mêsi, gơh dŏng pơklaih lu bơngai Isơrael. Anăn “Simiôn” wă khan “’Bok Kei-Dei kơtơ̆ng bơih”. Kră Yang đei kơtơ̆ng nơ̆r ‘bok Simiôn adrin krao khan păng tơl tơwih đei ăn kơ sư ‘bok Dŏng pơklaih kon pơlei Sư. Tơdrong adrin chang gô păng đĭ jơhngơ̆m gơnang kơ nơ̆r Kră Yang pơkă đei yua tơpă. ‘Bok Simiôn chơt hiôk tơpă kơplah sư ‘bôh păng iŏk pôk ‘Bok Krist. Dang ei, sư hiôk hian dêh mă adrol kơ sư “lôch achăng teh đak âu hiôk hian” ăn kơ kon pơlei sư (trong 29-30). Sư băt kơ tơdrong jang ‘Bok Krist jur tơ ala teh, lăm noh đĭ đăng bơngai Isơrael ưh kơ băt, sư hlôh hơđăl Kră Yang Yêsu jur wă jing “Sư dang pơchrang tơdrong hơdah kơ đĭ đăng kon pơlei.” “wă dŏng pơklaih đĭ đăng.” Păng “ăn kơ lu bơngai Isơrael jing hiôk tơpă.” (trong 31-32; Tơdrong jang 26:22-23).
Krao khan păng chang gô noh tơdrong ‘lơ̆ng kăl kơ đei lăm bơngai đĭ jơhngơ̆m gơnang păng chĕp kơjăp nơ̆r Kră Yang pơkă. ‘Bok Simiôn đei Kră Yang roi tơbăt lê̆ adrol sư ưh kơ lôch adrol kơ wă ‘bôh ‘Bok Krist. ‘Nâu bơih minh tơdrong pơkă rơđah dêh ‘măn kơ ‘bok Simiôn. Lu bơ̆n ưh kơ băt hơđăl ‘bok Simiôn dôm jĭt sơnăm mălei trong 26 păng 29 đei tơbăt sư đê̆ kră bơih, sư đei ‘măn tơdrong ‘lơ̆ng hloh lăm chăl arih sư noh chang gô nơ̆r Kră Yang adrol kơ wă lôch. Tơpă yơh, tuch luch sư chang gô lăm đon lui sư hiôk chơt tơpă.
Đĭ đăng kơ lu bơ̆n ‘bôh anat lăm tơdrong chang gô nơ̆r Kră Yang pơkă. Lơ wơ̆t bơ̆n krao khan apinh Kră Yang tơgŭm tơdrong anat ayơ noh lăm chăl arih bơ̆n, đơ̆ng noh bơ̆n chang gô wă kơ tĕnh tĕnh păng ‘bônh kơ hăl, ‘maih achăng lê̆. Rim ‘nu kơ bơ̆n kăl kơ chĕp kơjăp nơ̆r Kră Yang pơkă đei chih lăm kơthơ Yakơ 5:16 BTTHĐ: “… bôl buăl krao khan tơgŭm, ‘Bok Kei-Dei gô ăn kơ lu iĕm mă jĭ-jăn klaih praih iung. Bơngai mă lui kơjăp ưh kơ đei tơdrong yoch sư krao khan adrin tơpă na ‘Bok Kei-Dei gô tơl tơwih dôm tơdrong sư krao khan noh.” Wă kơ adrin krao khan păng chang gô nơ̆r tơl tơwih đơ̆ng Kră Yang, mă jơ năr đunh dang yơ hĭ.
Ơ Kră Yang, apinh Ih mơnat kơ inh yua kơ inh ưh kơ đĭ jơhngơ̆m chang gô kiơ̆ trŏ thoi Ih. Apinh Ih tơgŭm inh đei jơhngơ̆m adrin krao khan lăm jơ oei chang gô Ih tơl tơwih. Krao khan yua anăn Kră Yang Yêsu Krist, Amen.
Lu bơ̆n hăm biơh achăng lê̆ kơplah krao khan đunh na Kră Yang ưh kơ tơl tơwih ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 41
Kênh Youtube BHKTHN:
