Luka 22:39-46
“Lăp lu sư truh tơ ei, Yêsu khan kơ lu sư: Iĕm athei krao khan kơ ‘Bok Kei-Dei wă kơ iĕm huay kơ lui kơ yang Satan pơhlŭ.” (Luka 22:40)
Nơ̆r jet tơchĕng pơwao:
– Kră Yang Yêsu krao pơtơm lu bơngai pơhrăm păng Sư krao khan Sư kơnhăm tơdrong kiơ?
– Lu bơ̆n pơhrăm iŏk tơdrong kiơ đơ̆ng kơmĭl Kră Yang Yêsu krao khan?
– Lu bơ̆n pơkăm pơkă bơwei jơhngơ̆m pran lăm tơdrong krao khan lăm sơnăm ‘nao 2025 thoi yơ?
Kră YangYêsu tŏk tơ kông Ôliu kiơ̆ kơ tơdrong đei juăt, năm tơ pơgar Gêsêmanê krao khan adrol kơ wă yak năm lăm trong ‘long pơglang. Wă pơm keh tơdrong jang wă dŏng pơkalih kon bơngai. Tơdrong đei truh âu kăl dêh tơpă thoi noh lu bơngai chih hla bơar đei chih puăn sơ̆p Hla bơar Tơdrong ‘Nao ‘Lơ̆ng (mathiơ 26:36-56; Markôs 14:32-50; Yôhan 18:3-11). Rup Kră Yang khao khan păng nơ̆r Sư bơtho lu bơngai pơhrăm păng Sư đei ‘măn ăn kơ kon pơlei Kră Yang, lu ‘bai pơhrăm gĭt găl lăm tơdrong krao khan.
Blŭng a, kon pơlei Kră Yang kăl kơ krao khan hơdai băl păng krao khan tơgŭm dih băl. Kră Yang Yêsu chông ba lu bơngai pơhrăm păng Sư wang năm hăm Sư păng pơtơm lu sư krao khan. Tơdrong krao khan thoi tơmam pơih khoă wă tơgŭm lu sư: “huay kơ puh lăm tơdrong pơhlŭ pơlung” mălei, lu bơngai pơhrăm păng Sư ưh kơ krao khan, lu sư ‘maih tep mă khan “Jơhngơ̆m lu sư ‘maih dêh ră, mălei sĕch akar lu sư rơdu” (Markô 14:38). Kon pơlei Kră Yang kăl dêh kơ krao khan hơdai băl păng tơgŭm dih băl wă kơ hlôi đơ̆ng tơdrong pơhlŭ pơlung, wă kơ kĕ jei đơ̆ng tơdrong rơdu sĕch akar.
Pơtrơp dơ̆ng, kon pơlei Kră Yang athei krao khan thoi Kră Yang Yêsu đei krao khan, “’Nĕ pơm kiơ̆ kơ Inh, pơm kiơ̆ kơ Ih đĕch.” Kră Yang apinh ‘nĕ ăn tơdrong gleh truh kơ Sư, kơplah yoch kon bơngai tam mă tơpŭ kơ Sư, mălei kơplah (‘Bă wă). Yua kơ thoi noh, Sư krao khan dơ̆ng: “’Nĕ pơm kiơ̆ kơ Inh”. Kră Yang Yêsu pơyơ̆r tơdrong hơpơi wă Sư hăm nơ̆r pơkă pơkăm pơm kiơ̆ thoi ‘Bă wă.
Mă hơtuch, Kră Yang krao khan đĭ jơhngơ̆m, kơplah jĭ jăn pơmat tat, Sư krao khan truh tơ mah tuh bơuh bơang dang pham. Kră Yang Yêsu pơyơ̆r tơdrong gleh glăn pŭ trăp kơ Yang ‘Bă, kơplah tơ’bơ̆p tơdrong lôch yua kon bơngai hăm tơdrong mơn ‘brơ̆k mơnat phara băl. Kră Yang Yêsu Kon ‘Bok Kei-Dei đei ‘măn ăn kơ lu bơ̆n kơmĭl krao khan.
Yak năm lăm sơnăm 2025, apinh Kră Yang tơgŭm bơ̆n rok kiơ̆ kơmĭl Kră Yang, tơchĕng kơ tơdrong krao khan mă lơ hloh. Lu bơ̆n krao khan tơgŭm dih băl, hơdai dih băl, wă tơgŭm dih băl kĕ jei đơ̆ng tơdrong pơhlŭ pơlung. Krao khan apinh Kră Yang ăn kơ lu bơ̆n đei đon lui kơjăp lăm Sư. Krao khan păng arih pơm kiơ̆ Nơ̆r Kră Yang rim năr. Athei đĭ jơhngơ̆m klơm klak, đĭ jơhngơ̆m pran păng pơhrăm pơtơ̆p krao khan. Yang ‘Bă ưh kơ iŏk lê̆ tơdrong pơlong đơ̆ng Kră Yang Yêsu, mălei ăn đei jơhngơ̆m pran wă kơ tơblah păng kĕ jei đơ̆ng tơdrong pơlong truh. Lu linh jang ‘lơ̆ng sơ̆ đei tơgŭm Kră Yang Yêsu thoi yơ, lu bơ̆n kư̆m gô đei Yang Bơhngol ‘Lơ̆ng ăn pŭn hiôk, thim jơhngơ̆m pran kơ bơ̆n thoi ei mơ̆n. Athei ‘blŏk ưh kơ đei tơdrong pơhlŭ hơyơ mă hloh kơ jơhngơ̆m kĕ lu bơ̆n. Kră Yang ‘Bok Kei-Dei jơ̆ tơpăt Sư gô pơchoh kơ bơ̆n trong wă kơ bơ̆n lĕch hlôi (I Kôrintô 10:13). Athei lui mă kơjăp păng đĭ jơhngơ̆m krao khan rok kơmĭl Kră Yang Yêsu!
Yak năm lăm sơnăm 2025, lu bơ̆n pơkă hăm Kră Yang tơdrong kiơ đơ̆ng rŏng kơ bơ̆n tơchĕng kơ ‘bai pơhrăm ‘nâu?
Kơkuh kơ Ih ‘Bă mă oei tơ plĕnh, apinh Ih tơgŭm inh hăm lu ‘nhŏng oh bơngai lui đĭ jơhngơ̆m lăm tơdrong krao khan. Apinh Yang ‘Bă ăn đei jơhngơ̆m pran, ăn pŭn hiôk wă kơ kĕ jei hăm tơdrong pơlong truh lăm sơnăm ‘nao âu păng đei jơhngơ̆m ‘maih krao khan kiơ̆ thoi Ih lăp đon. Yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: Hơriso 25-26.
Kênh Youtube BHKTHN:
