Tơdrong jang 1:4-11
“Ơ bơngai Galilê, iĕm lăng ‘bloh chă kiơ tơ plĕnh? Ning-mônh Sư gô jur dơ̆ng kư̆m thoi Sư tŏk mơ̆n.” (Tơdrong jang 1:11)
Nơ̆r jet tơchĕng pơwao:
– Hla bơar Tơdrong jang chih roi tơdrong Kră Yang Yêsu tŏk tơ plĕnh thoi yơ?
– Tơplih kơ dơ̆ng lăng‘bloh tơ plĕnh, bre linh jang ‘lơ̆ng tơ’blŏk kơ lu jơ̆ng ‘bang athei pơm kiơ?
– Rim ‘nu bơ̆n dang ei kăl kơ pơtrơp đơ̆ng tơdrong jang Kră Yang wơh thoi yơ?
Kră Yang Yêsu hlôi jur bơih tơ ala teh âu,chu lôch tơ ‘long pơglang, đe‘bŭ Sư lăm bơsat pêng năr,
mă-lei năr mă pêng noh Sư iung arih dơ̆ng păng Sư tơ’bôh akâu Sư kơ lơ bơngai‘bôh lăm puăn jĭt năr.
Tơdrong jang‘Bok Kei-Dei wơh Kră Yang Yêsu jang tơ teh đak âu dŏng pơklaih huai iŏk bơngai yoch, Sư jang keh bơih; năr mă puăn jĭt đơ̆ng rŏng kơ Sư iung arih, Sư đei tơ’bơ̆p băl hăm lu jơ̆ng ‘bang Sư wă tơtă ăn kơ lu sư nơ̆r tuch luch, đang kơ noh Sư tŏk tơ plĕnh,đei hơmơ̆l gom Sư, lu bơngai pơhrăm păng Sư lăng Sư ưh pă ‘bôh. Kơplah lu sư tŏk bŏk rŭng răng jơhngơ̆m, ngoi lăng tơ plĕnh, ‘bôh blư bla ‘bar ‘nu linh jang ‘lơ̆ng hrŭk ao kok jur ‘bơ̆t anăp lu sư khan kơ lu sư thoi âu: “Ơ bơngai Galilê, iĕm lăng‘bloh chă kiơ tơ plĕnh? Ning mônh Sư jur dơ̆ng kư̆m thoi Sư tŏk mơ̆n” (tr.11)
Nơ̆r “lăng ‘bloh” wă khan lăng hơlen pơnhen hăm jơhngơ̆m rŭng răng. Kơplah jơhngơ̆m lu sư thoi noh, blư kơ ‘bar ‘nu linh jang ‘lơ̆ng jur ‘bơ̆t anăp lu sư, pơlung sư khan Kră Yang Yêsu tŏk tơ plĕnh mă-lei Sư wă jur dơ̆ng, sơng iŏk lu bơngai bu mă kiơ̆ Sư brŏk tơ Sư (Yôhan 14:1-3). Dang ei, kơplah bơ̆n chang gô Kră Yang, đĭ-đăng bơ̆n ‘nĕ kơ hrăn lăng‘bloh tơ plĕnh đĕch, mă-lei athei lăng tơmang tăp dăr kơ bơ̆n wă pơtrơp iŏk đơ̆ng tơdrong jang Kră Yang Yêsu, ră roi ăn kơ lu sư hăm tơdrong mơsêh pran Yang Bơhngol‘Lơ̆ng thoi Sư đei bơtho pơkă bơih. Kră Yang Yêsu tŏk tơ plĕnh, kơplah ‘nâu bơih rim ‘nu bơ̆n kon Kră Yang pơtơm pŭ iŏk tơdrong jang Sư pơjao yak năm, ba tơdrong Kră Yang ’mêm mơnat dŏng pơklaih kơ lơ bơngai, rei tơdrong hơmĕng arih ăn kơ rim ‘nu bơngai. Yua kơ chăl arih kơpal teh âu ‘bônh kơ tôch; bơ̆n kăl kơ lăng hnhoi tơdrong arih mă Kră Yang hơmet lê̆ bơih tơ pơlei ‘lơ̆ng oei oei ling-lang noh, na roi tơbăt ăn kơ rim ‘nu bơngai băt tơdrong hlĭch chrơp ‘nâu.
‘Blŏk hơdơ̆r kơ Kră Yang Yêsu tŏk tơ plĕnh, kăl kơ pơtrơp iŏk tơdrong jang Kră Yang, “ưh kơ hrăn lăng’bloh tơ plĕnh ôh”,mă-lei jang tơdrong jang Kră Yang wơh athei,tơdrong jang Kră Yang pơjao. “Mă-lei lăp Yang Bơhngol ‘Lơ̆ng jur oei păng iĕm, iĕm gô đei jơhngơ̆m pran bơho tơdrong Inh tơ pơlei Jêrusalem, jơ̆p kơ dêh char Juđê, păng dêh Samari, đơ̆ng noh jơ̆p kơ teh đak.”(tr.8). Kră Yang tŏk tơ plĕnh noh kư̆m tu tơm pơdrŭt bơ̆n wă kơ bơ̆n huay kơ arih gơnang kơ mŭk drăm lăm teh đak âu ‘bônh kơ hiong tôch kiơ̆ kơ khei sơnăm, mă-lei lăng hnhoi lăng tơ dêh char mă oei oei ling-lang, tơ noh Kră Yang tŏk-bŏk hơmet anih oei ăn kơ lu bơ̆n.Apinh Kră Yang tơgŭm bơ̆n jang keh tơdrong jang mă Sư đei pơjao, bơ̆n jang pơkeh lăm jơ năr bơ̆n oei tơ teh đak âu truh tơ năr Kră Yang Yêsu Krist jur dơ̆ng, Sư sơng iŏk bơ̆n brŏk oei hơdai hăm Sư, pŭn hiôk ling-lang.
Kơkuh kơ Kră Yang Yêsu, inh bơnê kơ Ih hlôi lôch tang dŏng pơklaih, huai iŏk inh đơ̆ng yoch, Ih kư̆m hlôi tŏk bơih tơ plĕnh hơmet ăn kơ inh anih mă oei oei ling-lang.Apinh Ih tơgŭm inh huay kơ hưch ham mŭk tơ mam, hăt wă kơ đe ư-ang anăn lăm teh đak âu, mă-lei đĭ jơhngơ̆m lăng hnhoi tơ dêh char mă oei oei ling-lang, bơtho ră roi Anăn Ih wă kơ rai đunh rai lơ bơngai Ih pơklaih đơ̆ng yoch gơh arih ling-lang. Inh krao khan yua năn Kră Yang Yêsu Krist, Amen!
‘Blŏk hơdơ̆r kơ Kră Yang tŏk tơ plĕnh hăm đei tơgŭm ih klaih hlôi đơ̆ng tơdrong ala teh chô̆ pơkơ̆ng ưh? Bơ̆n tŏk-bŏk oei jang tơdrong jang mă Kră Yang wơh athei noh thoi yơ?
Đŏk Sơ̆p Hla bơar’Bok Kei-Dei lăm pêng sơnăm: Êsai 27.
Kênh Youtube BHKTHN:
