Luka 6:12-18
“Kơplah ei Yêsu tŏk tơ groi kông wă krao khan kơ ‘Bok Kei-Dei. Sư krao khan tơ noh prăt măng hloi.” (Luka 6:12)
Nơ̆r jet tơchĕng pơwao:
– Yua kơ kiơ Kră Yang Yêsu jơ̆ ‘Bok Kei-Dei mălei Sư kư̆m oei krao khan?
– Tơdrong arih ‘lơ̆ng lăm tơdrong krao khan Kră Yang noh thoi yơ?
– Yua kơ kiơ Kră Yang krao khan kral prăt măng?
– Lu bơ̆n pơhrăm iŏk rok kiơ̆ kơmĭl Kră Yang krao khan noh thoi yơ?
Kră Yang Yêsu jơ̆ ‘Bok Kei-Dei (Yôhan 10:30), mălei gah anih anăn Yang lei Sư noh Yang Kon, Sư achăng lê̆ tơdrong hơtŏ hăm Kră Yang ‘Bok Kei-Dei jur jing bơngai (Philip 2:6-8). Lăm anih ‘noh. Sư chu phep đep yom Yang ‘Bă, păng ling lang krao khan hăm Yang ‘Bă jơ̆ ‘Bok Kei-Dei kiơ̆ thoi anăn Yang ‘Bă, Yang Kon. Kư̆m đei tơdrong tơchĕng Kon phara kơ tơdrong tơchĕng ‘Bă, mălei Kră Yang Yêsu ling lang pơyom păng chu kiơ̆ thoi ‘Bă wă (Mathiơ 26:42).
Hơ’mon tơdrong đei truh ei sơ̆ wă tơ’bôh Kră Yang Yêsu tơ’bơ̆p lăm tơdrong nơ̆r pơma chă tơdrong kơnê̆ đơ̆ng lu pharisi wă pơrăm, rơih chă 12 ‘nu jơ̆ng ‘bang, đei bơtho tơ’bôh păng pơklaih lu jĭ jăn kon pơlei (Luka 6:17-18). Kơplah wă pơtơm bơ̆jang, Kră Yang đei lơ tơdrong kăl kơ krao khan. Krao khan păng ‘bĕnh blai Yang Bơhngol ‘Lơ̆ng kơplah chu iŏk ‘Batem (Luka 3:21-22), ơ̆t kơ sŏng sa krao khan 40 măng, năr (Luka 4:2), krao khan rim pơgê hrôih “Lăp pơgê hrôih, Kră Yang lĕch đơ̆ng pơlei năm tơ anih kueng kơdrô̆, Sư krao khan kơdrô̆ Sư tơ ei.” (Markôs 1:35), dah mă kơplah layơ đei gơh krao khan (Luka 5:16), dah đĭ lăm năr ding kơsơ̆ măng, “Đơ̆ng noh na Kră Yang Yêsu sơlah đơ̆ng bơngai tơpôl noh tŏk tơ kông kơdrô̆ wă krao khan kơ ‘Bă Sư” (Mathiơ 14:23).
Hăm Kră Yang Yêsu, krao khan kơdrô̆ păng oei minh drô̆ hăm Yang ‘Bă ‘noh minh tơdrong kăl dêh, ‘noh jơ̆ minh tơdrong pơjuăt kơdih gah bơhngol mă Sư ling lang bơwei. Kră Yang Yêsu ling lang krao khan tơ anih hreh, anih noh tơ kông păng kơmăng ‘noh jơ̆ anih mă ‘lơ̆ng dêh. Kơplah krao khan, Kră Yang Yêsu ling lang krao ‘Bok Kei-Dei ‘noh “’Bă” mă ‘mêm kơeng tơpă, oei jê̆ păng lui gơnang.
Hloh kơ ‘noh dơ̆ng, kơplah oei lăm teh đak, Sư “… krao pơret ‘Bă Sư păng hmoi apơi kơ ‘Bă Sư… tơ lăm pơgar Gêtsêmanê (Hêbrơ 5:7). Kră Yang Yêsu jơ̆ Kon ‘Bok Kei-Dei mơsêh tôm tơdrong păng oei ‘măn tơdrong krao khan ‘noh hơdrol hloh păng pơm kơmĭl tơdrong ‘lơ̆ng rŏ kơ lu bơ̆n gah đei jơhngơ̆m krao khan.
Đơ̆ng rŏng kơ minh măng krao khan, Kră Yang Yêsu pơtơm lăm năr plơ̆ng ‘bĕnh tơdrong mơsêh mơyang lăm tơdrong rơih iŏk 12 ‘nu jơ̆ng ‘bang. ‘Nâu jơ̆ tơdrong jang kăl dêh lăm tơdrong jang Kră Yang yua kơ tơdrong rơih chă âu ưh kơsĭ ‘bônh ôh thoi rơih chă bơngai hơgei. Lu bơ̆n ‘bôh lăm lu jơ̆ng ‘bang đei tôm tơdrong kiơ̆ kơ rim ‘nu phara pha, lu bơngai gơh hơgei kư̆m đei lu bơngai juăt kơ chă ka ưh kơ đei hŏk, tơdrong jang teh đak, sơnăm phara băl, lăm tơdrong rơih iŏk Juđa Ikariôt kư̆m wă tơgŭm sư oei jê̆ Kră Yang wă kơ tơdrong arih đei tơplih. Đĭ đăng tôm tơdrong noh lăm tơdrong kiơ̆ thoi Kră Yang đei hơgăt lê̆ kiơ̆ thoi Sư lăp đon. Yua thoi noh, Kră Yang “Kral krao khan prăt măng”.
Kră Yang Yêsu, Kon ‘Bok Kei-Dei đei ‘măn kơ lu bơ̆n kơmĭl krao khan. Chăl arih lu bơ̆n gô tơ’bơ̆p lơ tơdrong anat anot, pơlong tơdrong kăl kơ pơm gơh jing dah ưh lăm chăl arih kiơ̆ Kră Yang ‘noh tơdrong krao khan.
Lu bơ̆n hăm ‘măn adrol hloh wă pơhrăm pơjuăt gah bơhngol krao khan rok kiơ̆ kơmĭl Kră Yang ưh?
Ơ ‘Bă mă ‘lơ̆ng rơgoh! Apinh Ih tơgŭm inh rok kiơ̆ kơmĭl Kră Yang Yêsu lăm tơdrong krao khan, ‘măn tơdrong krao khan adrol hloh, tơ năp yak kiơ̆ Kră Yang ding đĭ chăl arih. Yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: Hơriso 29-30.
Kênh Youtube BHKTHN:
