II Hơ’mon 7:11-15
“Tơdah kon pơlei pơla Inh, đe krao lu sư kon Inh, drap bon kơkuh, krao khan, chơchă Inh păng tơbral achăng lê̆ trong kơnê̆ lei Inh oei kơpal plĕnh ti gô mơ̆ng, mơnat ăn huay pă jô̆ yoch lu sư păng ăn teh lu sư thoi đêl.” (II Hơ’mon 7:14)
Nơ̆r jet tơchĕng pơwao:
– Kră Yang tơ’bôh kơ Pơtao Sôlômôn wă tơ’blŏk ăn tơdrong kăl kiơ kơ pơtao păng teh đak?
– Tơdrong kiơ tơ’bôh ăn Kră Yang bơih Tơ’ngla ‘mêm mơnat ‘bĕnh tơdrong mơnat?
– Lu bơ̆n, hnam dơnŏ păng khul bơngai lui kăl kơ đei jơhngơ̆m thoi yơ kơplah tơ’bơ̆p tơdrong gleh pơmat?
Đơ̆ng rŏng kơ Pơtao Sôlômôn pơm keh hnam Kră Yang păng pơm phĕt pơyơ̆r pơih hnam akŭm, lăm măng noh hloi. Kră Yang tơ’bôh akâu Sư kơ Sôlômôn wơ̆t mă ‘bar (I Lu pơtao 9:2). Sư khan: “Inh kơtơ̆ng bơih nơ̆r Ih krao khan.” Păng sư rơih bơih anih ‘nâu wă pơm “hnam pơyơ̆r tơmam soi” wă khan hnam pơyơ̆r tơmam soi kơ Sư. Kră Yang lăp đon bơih păng tơl tơwih nơ̆r Pơtao krao khan noh “đei ŭnh đơ̆ng plĕnh jruh” (II Hơ’mon 7:1). Năr ‘nâu, đơ̆ng rŏng kơ pêng jĭt sơnăm, Kră Yang tơ’blŏk dơ̆ng ‘Bok Kei-Dei rơih bơih hnam akŭm tơ pơlei Jêrusalem ‘nâu pơm anih pơyơ̆r tơmam soi kơ Sư, wă kơ Kră Yang oei hơdai lu sư.
Hloh kơ ‘noh dơ̆ng, Kră Yang tơ’bôh kơ Pơtao Sôlômôn mălei Sư ưh kơ dơ̆ng ‘bơ̆t tơdrong tơ’bưh băl Sư hăm Pơtao đĕch ôh, mă Kră Yang kư̆m tơ’blŏk khan teh đak sư jing pran, pơtao kăl kơ chông anhăk kon pơlei Kră Yang, mă Kră Yang krao lu sư noh “Kon pơlei pơla Inh, đe krao lu sư Kon Inh.” ‘Nĕ kơ hiơt kơ Kră Yang na wă kơkuh kơ rup yang nai dơ̆ng. Athei đĭ jơhngơ̆m krao khan, krao chă Kră Yang lăm tôm tơdrong, dah ưh lei dôm tơdrong pŭn hiôk gô jing tơdrong gleh truh. Kră Yang bơih Tơ’ngla ‘lơ̆ng rơgoh, thoi noh kơplah kon pơlei Kră Yang pơm yoch, Sư gô ăn phep dôm tơdrong gleh truh thoi kơ phang ang, leps kăp sa ‘ba, jĭ hơbuh truh wă bơtho tơbăt kơ lu sư. Mălei Sư bơih Kră Yang ‘Bok Kei-Dei kư̆m ‘bĕnh tơdrong ‘mêm mơnat, huay kơ jô̆ yo, pơklaih lu sư đơ̆ng tơdrong gleh truh. Thoi noh, mă đei tơdrong kiơ truh lei dôm lu bơngai gah Kră Yang athei băt Kră Yang ‘Bok Kei-Dei ling lang ‘mêm mơnat kơ kon pơlei Sư păng ăn kơ lu sư gơh wih brŏk tơ Kră Yang dơ̆ng dah lu sư băt tơbral achăng lê̆ trong kơnê̆, drap bon kơkuh, krao khan chơ chă Kră Yang, Kră Yang ling lang mơ̆ng nơ̆r krao khan lu bơngai đei jơhngơ̆m băt tơbral.
Bơngai lui dang ei gơh tơ’bưh hăm Kră Yang ‘Bok Kei-Dei yua kơ đơ̆ng Tơdrong Kră Yang Yêsu chu lôch tang bơ̆n tơ ‘long pơglang. Lăm jơhngơ̆m rim ‘nu lu bơ̆n jing hnam Kră Yang, đei Yang Bơhngol ‘Lơ̆ng oei lăm bơ̆n. Lu bơ̆n Kră Yang kư̆m “rơih iŏk bơ̆n wă kơ bơ̆n jing adrĕch adrung Sư, bơ̆n kư̆m thoi lu bơngai soi kơ ‘Bok Kei-Dei Pơtao bơ̆n, bơ̆n dang pơlei pơla Sư. (I Pêtrôs 2:9). Bơ̆n kư̆m pơlei pơla Kră Yang thoi noh bơ̆n kư̆m đei iŏk nơ̆r pơkă Kră Yang gah tơdrong Sư mơnat ăn păng dŏng pơklaih bơ̆n đơ̆ng tơdrong gleh pơmat truh, pơlong lăng dah bơ̆n băt “bon drap kơkuh, krao khan, chơ chă Kră Yang păng wih brŏk tơ Sư, achăng lê̆ trong kơnê̆.” Apinh Kră Yang ăn kơ rim ‘nu lu bơ̆n đĭ jơhngơ̆m krao khan păng pơlung lu ‘nhŏng mŏ oh bơ̆n ling lang băt krao chă Kră Yang.
Kơplah tơ’bơ̆p tơdrong gleh truh, pơmat tat, pơlong lăng, bơ̆n păng khul bơngai lui hăm “bon drap kơkuh, krao khan chơchă” Kră Yang păng tơbral, tŭk lê̆ tơdrong yoch bơ̆n ưh?
Ơ Kră Yang, apinh Ih ăn kơ inh hơdrol hloh băt bon drap kơkuh, tơbral tơdrong yoch, apinh Ih mơnat ăn păng dŏng pơklaih đơ̆ng tơdrong gleh truh. Apinh Kră Yang tơgŭm inh minh jơhngơ̆m đon hăm ‘nhŏng mŏ oh gơh pơlung dih băl lăm hnam dơnŏ, khul bơngai lui lăm tơdrong krao khan. Yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 6.
Kênh Youtube BHKTHN:
