Bơtho Khôi Juăt 33:1-5
“Sư ‘mêm kơ kon pơlei pơla Sư tơpă; đĭ-đăng lu linh jang oei lăm tơpang ti Sư; Sơtơ̆p kŭltăng kơkuh ‘bơ̆t jơ̆ng Ih. Sơng iŏk nơ̆r bơtho khan đơ̆ng Ih.” (Bơtho Khôi Juăt 33:3)
Nơ̆r jet tơchĕng pơwao:
– ‘Bơ̆t kông Sinai ‘bok Môis đei tơ’blŏk kơ kon pơlei Isơrael tơdrong kiơ gah Kră Yang ‘Bok Kei-Dei?
– Yua kơ kiơ sư pơma gah tơdrong Kră Yang?
– Pơhrăm băt kơ ‘Bok Kei-Dei ‘mêm ưh kơ tơplih, đei pơlung bơ̆n arih thoi yơ?
Lăm chăl 33 ‘bok Môis đei pơih blŭng a păng pơtôch hăm tơdrong ưang anăn Kră Yang ‘Bok Kei-Dei, wă pơma khan, lăm trong năm chông anhăk kon pơlei Isơrael wă mơ̆t tơ dêh char pơkă, ‘bok Môis băt sĭt tơpă hlôi mơn gah tơdrong lăm ‘Bok Kei-Dei phara pha. Mălei tơdrong gĭt kăl hloh sư tơ’blŏk adrol wă tŏk tơkông Abraim păng hlôi kơ chăl noh, lăm Kră Yang ‘Bok Kei-Dei đei ‘mêm mơnat, lu bơ̆n đei ‘bôh tơdrong noh đơ̆ng pơih blŭng a hei “Kră Yang truh đơ̆ng kông Sinai” (trong 2). Anăn kông Sinai đei pơma ‘bơm Kră Yang krao kon pơlei Isơrael jing kon pơlei ‘lơ̆ng rơgoh ‘măn kơ Sư, păng ăn kơ lu sư khôi juăt (LĐ Êyiptơ 19:5-6; 20:1-17) pơma pha ‘biơ̆, kông Sinai jơ̆ anih chih răk tơdrong tơ’bưh gĭt kăl Kră Yang ‘Bok Kei-Dei hăm kon pơlei Isơrael, păng hơnă tơdrong tơ’bưh noh tơdrong ‘mêm Kră Yang ưh kơ tơplih.
‘Bok Môis đei tơ’blŏk gah tơdrong ‘mêm lăm Kră Yang noh bơih tơdrong gĭt kăl na kon pơlei Isơrael kăl kơ ‘blŏk răk, yua kơ đơ̆ng năr tơblah iŏk Kanaan păng truh tơ sơnăm arih tơ dêh pơkă, kư̆m gô đei jơ năr kon pơlei rơdu, đei tơdrong pơhlŭ, tơ’bơ̆p pơmat tat… kơplah noh, lu sư ‘blŏk ‘Bok Kei-Dei ‘mêm kơ lu sư ‘noh tơdrong kăl hloh. Lui ngeh tơpă Kră Yang ‘mêm kơ kon pơlei Sư, ưh kơ đei pơma ‘bơ̆r hoh đĕch ôh mălei ‘bok Môis mah tơ’blŏk ăn kơ kon pơlei Kră Yang, mălei ‘nâu dai tơdrong sư mơn lăm kơdih sư kơplah bơ̆jang kơ Kră Yang.
Trong năm, kiơ̆ Kră Yang, sĭt tơpă bơngai lui dai mơn tơdrong ‘mêm tih Kră Yang ‘măn kơ bơ̆n bơngai yoch. Tơpă bơih đơ̆ng mơn đei tơdrong ‘mêm Kră Yang păng tơdrong ‘mêm tih Sư ăn đĕch noh, đei tơgŭm kơ lu bơ̆n arih đei jơhngơ̆m ‘blŏk bơnê păng arih trŏ kơ kon pơlei ‘lơ̆ng rơgoh Kră Yang. Jơ̆ kon bơngai oei kiơ̆ kơ sĕch akar lu bơ̆n oei rơdu dêh, pơm yoch, mălei bơ̆n arih athei băt Kră Yang oei ‘mêm kơ lu bơ̆n bơngai rơdu dêh, păng Sư lăp đon pă jô̆ yo kơ bơ̆n kơplah bơ̆n tơbral, roi tơdrong yoch bơ̆n kơ Sư. Lu bơ̆n lăng ‘bôh tơdrong bơ̆n pơm yoch tih, na tơchĕng khan tơdrong ‘mêm ‘Bok Kei-Dei ưh kơ tôm mah wă mơnat kơ tơdrong yoch tih noh ôh, tuch luch sư ba bơ̆n weh ataih đơ̆ng Kră Yang đĕch. Rim tơdrong yoch sĭt tơpă gô pŭ iŏk kơnê̆ noh, mălei đei minh tơdrong ưh kơ tơplih noh ‘Bok Kei-Dei ling lang ‘mêm kơ kon bơngai yoch. Athei năm bĕ tơ Kră Yang, gơnang kơ tơdrong ‘mêm Kră Yang mă ưh kơ đei layơ tơplih.
Ơ Kră Yang, Ih Tơ’ngla mă ‘mêm kơ inh ưh kơ đei tơplih. Apinh Ih tơgŭm inh băt mơn tơdrong ‘mêm Ih, wă kơ inh arih băt ‘mêm păng arih trŏ kơ kon pơlei ‘lơ̆ng rơgoh Ih, krao khan yua anăn Kră Yang Yêsu Krist, Amen.
Tơdrong ayơ lăm chăl arih tơgŭm bơ̆n mơn tơdrong ‘mêm tih Kră Yang ‘măn kơ lu bơ̆n.
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 17
Kênh Youtube BHKTHN:
https://www.youtube.com/c/bhkthn
