I Timôthê 1:1-3
“Chih hơpong kơ Timôthê. Hmach kơ ih, dăm. Ih kon inh tơpă kơlih kơ ih lui kơ Kră Yang Yêsu Krist đơ̆ng inh bơtho ih sơ̆…” (I Timôthê 1:2a)
Nơ̆r jet tơchĕng pơwao:
– Nơ̆r krao “Kon inh tơpă lăm đon lui” wă tơ’bôh ăn ‘bok Pôl wă tơbăt lăm anih pơm ‘Bă thoi yơ lăm chăl arih gah bơhngol kơ minh ‘nu bơngai tơdăm thoi kơ Timôthê âu?
– “Tơdrong mơnăt ăn đĕch, tơdrong ‘mêm mơnat păng tơdrong hiôk hian” mă kăl dêh hăm bơngai tơdăm Timôthê noh thoi yơ?
– Lu bơ̆n hŏk iŏk tơdrong kiơ đơ̆ng ‘bai pơhrăm âu?
Pơih nơ̆r blŭng a lăm kơthơ Timôthê, ‘bok Pôl roi tơbăt gah sư kơdih “Pơm Jơ̆ng ‘bang Kră Yang Yêsu Krist” păng bơngai sơng iŏk kơthơ noh “Timôthê jơ̆ kon tơpă inh lăm đon lui”. Tơdrong krao âu wă tơ’bôh ‘bok Pôl jing thoi bơngai pơm ‘bă, bơngai tơgŭm gah bơhngol hăm bơngai tơdăm Timôthê. Lu bơ̆n hŏk iŏk pêng tơdrong ăn kơ lu bơ̆n.
Mă minh, ‘bok Pôl chih kơthơ ăn kơ bơngai tơdăm Timôthê jơ̆ kon “gah bơhngol” ‘bok Pôl. Trong 3 wă tơ’bôh Timôthê đei ‘bok Pôl pơjao oei lăm Khul bơngai lui wă kơ wei rong Khul bơngai lui tơ Êphêsô wă pơgăn lu bơtho tơdrong ưh kơ trŏ. Bơngai tơdăm Timôthê ưh kơ sĭ bơngai ‘nao lui ôh păng ưh kơ sĭ bơngai lui rơdu, mălei noh bơngai wei triu! Ưh kơ đei gơh khan kơdih khan bơngai hlôh băt tôm tơdrong. Mă khan bơngai lui wơ̆ ‘lŏ tôch tơ̆l lăm Kră Yang dah bơngai wei lăng gah bơhngol na kư̆m kăl kơ oei pơtrơp jơ̆ “Kon tơpă lăm đon lui” lăm bơngai bu noh mă bơngai wơ̆ ‘lŏ hloh. Rim ‘nu lu bơ̆n athei đei minh ‘nu kon lăm đon lui, wă kơ tơiung păng wei rong gah bơhngol.
Mă ‘bar, ‘bok Pôl ‘blŏk tơtăm, tơiung bơngai pơm kon lăm đon lui sư hăm tơdrong chih ăn kơthơ (trong 3). Mă khan ataih băl gah anih oei, mălei tơdrong tơiung dih băl păng pơlung tơgŭm lăm đon lui sơlam ‘bok Pôl păng bơngai pơm bơngai “Kon tơpă lăm đon lui” ưh kơ đei tơdrong kiơ gơh pơgăn. Hăm tơdrong chih gơih ăn kơthơ, sư pơlung tơiung, wă tơ’blŏk kơ Timôthê bơngai tơdăm dôm tơdrong kăl dêh. Dang ei lu bơ̆n đei lơ tơdrong bơ̆n gơh pơm ‘bônh hloh, apinh Kră Yang tơgŭm lu bơ̆n tôch ai wă tơiung dih băl lăm đon lui.
Mă pêng, ‘bok Pôl hơpơi wă kơ bơngai pơm kon lăm đon lui sư gơnang kơ tơdrong mơnat ăn đĕch đơ̆ng Kră Yang. ‘Bok bơtho oei tơdăm thoi Timôthê âu đei bơngai pơm ‘bă gah bơhngol đei pơjao oei tơ lăm Êphêsô kơplah đei tơdrong pơlong truh tơ noh, tơdrong mă ‘bok Pôl hơpơi wă kơ Timôthê ưh kơ sĭ khan tơdrong gơh hơgei, dah gơh chă đon pơjah pơjăng hăm tơdrong hiôk hian” đơ̆ng Kră Yang ‘Bok Kei-Dei (trong 2). Lơ bơngai lăm lu bơ̆n lui gơnang kơ tơdrong mơnat ăn đĕch păng tơdrong ‘mêm mơnat đơ̆ng Kră Yang ‘bơ̆t kơplah ‘nao lui kơ Kră Yang mălei đơ̆ng rŏng kơ noh, lu bơ̆n aih lăm chăl arih Bơngai lui păng bơ̆jang awih awăn hăm tơdrong gơnang kơ hlôh băt bơ̆n kơdih. ‘Bok Pôl đei tơ’bôh mơnat ăn đĕch, ‘mêm mơnat noh kư̆m tơm sư đơ̆ng mơsêh pran wă kơ Timôthê đei tơ’bơ̆p hăm lu tơdrong pơlung lăm chăl arih păng lăm tơdrong jang. Păng tơm tơdrong hiôk hian jơ̆ oei tơmam apah pŭn hiôk hloh mă Kră Yang đei ăn kơ lu bơ̆n, mă khan lu bơ̆n thoi yơ hĭ păng đei tơ’bơ̆p tơdrong truh anat anot tơdrong kiơ, Sư oei ăn hiôk hian.
Ơ Kră Yang, apinh Ih tơgŭm inh ling lang iŏk đon ala wă kơ gơh wơ̆ ‘lŏ gah tơdrong lui. Apinh Ih tơgŭm inh ‘blŏk tơtăm, wei rong lu bơngai pơm kon gah bơhngol mă Ih đei ăn kơ inh. Yua anăn Kră Yang Yêsu Krist, Amen.
Đe bu noh pơm ‘bă gah bơhngol păng đe bu noh pơm kon gah bơhngol lăm lu bơ̆n? Lu bơ̆n tơiung dih băl lăm đon lui thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 30.
Kênh Youtube BHKTHN:
