Klei Aê Diê Blŭ: Klei Bi Hriêng 6:16-19
Êlan kliăng: “Mâo năm mta klei Yêhôwa bi êmut, boh nik nak mâo kjuh mta klei Ñu ăl snăk… pô hưn klei mčeh, leh anăn pô duah klei bi mneh msao hdơ̆ng ayŏng adei ” (Klei Bi Hriêng 6:16,19).
Klei êmuh ksiêm mĭn: Ya mta knuih Aê Diê bi êmut, čih hlăm trăn Klei Aê Diê Blŭ anei? Ya mta klei hưn êlâo brei drei răng kơ dŭm knuih mơ̆ng klei hriăm anei?
Klei Bi Hriêng čih hluê si klei duê, tơdah yua jar x = x+1 snăn mta klei knhal tuč jing yuôm hĭn kơ jih jang. Hlăm êlan 16‑19, mta klei Yêhôwa bi êmut hĭn, anăn jing “pô duah klei bi mneh msao hdơ̆ng ayŏng adei”. Snăn, năm mta klei êlâo anăn Aê Diê bi êmut kyuadah ñu atăt truh kơ klei “bi mneh msao hdơ̆ng ayŏng adei”.
Knhuah mdê tal êlâo hĭn “pô duah klei bi mneh msao” anăn jing “ală dlăng hŏng klei krưh” kyuadah klei krưh mgao yơh jing boh phŭn mtrŭt mčhur kơ jih jang klei ngă soh. Ya ngă sa čô bi kdơ̆ng hŏng pô mâo klei dưi hĭn kơ ñu leh anăn bi rai klei êđăp ênang, klei sa ai tiê phung ƀuôn sang? Ya ngă sa čô bi kah phung, bi rai Phung Sang Aê Diê, amâo lŏ uêñ ôh kơ klei hdĭp myang pô mkăn? Kyua mơ̆ng klei mgao yơh. Tơdah sa čô mgao mâo hĕ klei ruă ai tiê, snăn klei ñu bi kdơ̆ng wĭt jing huĭ hyưt snăk sơưn, amâo lŏ mđing mĭn kơ ya mta klei ôh, knŏng khă bi dưi krơ̆ng pioh ai tiê myưng mơang ñu pô đuč yơh. Knhuah mdê tal dua jing “êlah blŭ luar” čiăng lač klei mplư luar, klei lhiăr, klei bliư̆ blêč, ƀlêč ƀlir, kăp čiăng ngă jhat kơ arăng. Aê Diê bi êmut kơ phung yua êlah kƀông kăp mplư luar kyuadah Ñu jing klei sĭt nik. Mta klei êdei hĭn, jing “kngan tuh êrah mnuih amâo soh”. Boh blŭ “tuh êrah” lač kơ sa bruă ngă hŏng klei čŏng čiăng, čŏng čiăng bi mdjiê mnuih amâodah ngă jhat kơ mnuih mkăn.
Knhuah mdê lŏ čuê jing “ai tiê trông čhai kơ klei jhat”, yua klei pap yuôm bhăn Aê Diê brei, jing klei mĭn knŏng kăp bi mĭn kơ klei ngă bi ruă êka arăng leh anăn bi kah ƀuôn sang. Leh anăn jing “jơ̆ng ruăt čiăng êran nao kơ klei ƀai”, lač kơ klei hur har, ruăt kuăt duah djăp êlan, kăp truh ngă klei ai tiê ñu trông čhai leh kơ klei jhat, leh anăn hơ̆k mơak kơ jih klei ñu dưi ngă leh. Leh anăn knhuah mdê knhal tuč jing “hưn klei mčeh”, anei jing klei sa čô mnuih blŭ nanao hŏng pô mkăn klei luar, klei wê, amâo mâo klei sĭt ôh.
Hruê anei, mâo lu mnuih dlăng hơăi mang klei “duah klei bi mneh msao” hlăm Phung Sang Aê Diê, ƀiădah anei jing sa mta bruă kjham, jing sa mta klei Aê Diê bi êmut kheh. Klei Aê Diê Blŭ brei thâo, Aê Diê khăp čiăng kơ phung ƀuôn sang Ñu dôk sa ai (Klei Mmuñ Hđăp 133:1). Klei mneh msao leh anăn bi kah hlăm Phung Sang Aê Diê jing klei ngă soh kjham kjhuĕ, kyuadah klei anăn bi mklăk hŏng klei dôk sa ai hlăm klei hdĭp myang, Khua Yang Yêsu wah lač leh (Y‑Yôhan 17:21). Kyuanăn, grăp čô brei răng kơ klei drei ngă hdơ̆ng drei hlăm phung đăo, knang kơ Yang Mngăt Jăk đru drei dưi kiă kriê asei pô, djŏ hnơ̆ng hlăm jih klei drei ngă. Hdơr bĕ snei, phung arăng “pia diñu phung anak Aê Diê” jing “phung đru brei klei êđăp ênang hdơ̆ng mnuih” (Y‑Mathiơ 5:9), leh anăn mklăk wĭt, phung ba hriê klei rŭng, klei mneh msao amâo djŏ jing anak Aê Diê ôh, ƀiădah knŏng jing “mnuih hơăi mang”, jing “mnuih wê” (êlan 12).
Si ngă drei tuôm mơ̆, lĕ hlăm klei mplư bi luč klei kiă kriê asei pô leh anăn jing hĕ mnuih hơăi mang, mnuih wê?
Wah lač: Ơ Khua Yang, akâo Ih brei kâo bi êdah knuih djŏ hnơ̆ng jăk siam mơ̆ng boh Yang Mngăt Jăk hlăm phung ƀuôn sang Aê Diê. Akâo Ih yua kâo ba klei êđăp ênang, klei hơ̆k mơak, leh anăn klei sa ai hlăm Phung Sang Aê Diê Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 27:5-28:25
Kênh Youtube BHKTHN:
