Klei Aê Diê Blŭ: II Klei Yăl Dliê 2:1-4.
Êlan Kliăng: “Snăn hlăm Ñu brei drei myơr nanao mnơ̆ng ngă yang bi mni kơ Aê Diê, boh mơ̆ng kƀông hưn anăn Ñu jing Khua Yang. Đăm wơr bĭt ôh ngă klei jăk leh anăn bi mbha mnơ̆ng diih mâo kơ phung mkăn, kyuadah klei ngă yang msĕ snăn bi mơak kơ Aê Diê.” (Hêbrơ 13:15-16).
Klei êmuh ksiêm mĭn: Ya bruă Mtao Y-Salômôn bi mklă srăng ngă? Ya klei mtao tiŏ nao mnuih nao lač hŏng Mtao Y-Huram? Si ngă klei Mtao Y-Salômôn čiăng mkŏ mjing klei kkuh mpŭ? Ya mta mnơ̆ng drei myơr srăng bi mơak kơ Aê Diê?
Mtao Y-Salômôn bi mklă rŭ mdơ̆ng Sang kơ Yêhôwa. Ñu čih hră leh anăn tiŏ nao mnuih ba kơ Mtao Y-Huram ti ƀuôn Tir akâo klei đru. Ñu brei thâo pô čiăng rŭ mdơ̆ng sa boh Sang kơ Aê Diê pô, Sang yang anăn srăng dưi pioh doh jăk. Hlăm Sang yang anei phung ƀuôn sang Aê Siê srăng kkuh mpŭ hŏng klei čuh mnơ̆ng ƀâo mngưi ti anăp Ñu, myơr nanao kpŭng myơr kơ Aê Diê, leh anăn kơ mnơ̆ng myơr čuh aguah leh anăn tlam. Klei kkuh mpŭ tinei srăng mkŏ mjing grăp hruê hlăm “grăp aguah leh anăn hlăm grăp tlam,” ti hruê sabat leh anăn ti hruê mlan mrâo ƀlĕ, leh anăn kơ hruê knăm bi kčah leh kơ Yêhôwa Aê Diê. Ñu čiăng Sang yang ñu rŭ mdơ̆ng srăng đru kơ phung ƀuôn sang Israel kkuh mpŭ kơ Aê Diê leh anăn myơr mnơ̆ng yơr nanao (êlan). Ai tiê Mtao Y-Salômôn čang hmăng mâo sa boh sang yang prŏng siam čiăng kơ phung ƀuôn sang Aê Diê srăng dôk nanao hlăm klei Aê Diê kiă kriê.
Hruê anei, kyua êrah yuôm Khua Yang Yêsu, phung đaŏ kơ Krist dưi dôk ti anăp Aê Diê hlăm anôk doh jăk (Hêbrơ 10: 19-25). Drei dưi “nao giăm Aê Diê” (Hêbrơ 10:22) ƀiădah amâo lŏ čuh ôh mnơ̆ng bâo mngưi, myơr nanao kpŭng myơr kơ Aê Diê, leh anăn kơ mnơ̆ng myơr čuh aguah leh anăn tlam, ti hruê sabat leh anăn ti hruê mlan mrâo ƀlĕ. Jih jang klei dưm jih êyui kơ klei hruê anei mâo leh hlăm Yang Krist (Kôlôs 2:16-17). Ƀiădah klei kkuh mpŭ kơ Aê Diê ăt brei ngă hlăm grăp hruê, grăp hruê kăm, grăp mlan, grăp thŭn leh anăn nanao hlăm klei dhĭp phung mâo Yang Krist bi mtlaih leh. Pô čih hră Hêbrơ iêu mthưr phung đaŏ kơ Krist “brei myơr nanao mnơ̆ng ngă yang bi mni kơ Aê Diê, boh mơ̆ng kƀông hưn anăn Ñu jing Khua Yang.” Êngao anăn, drei ăt “Đăm wơr bĭt ôh ngă klei jăk leh anăn bi mbha mnơ̆ng diih mâo kơ phung mkăn, kyuadah klei ngă yang msĕ snăn bi mơak kơ Aê Diê” (Hêbơrơ 13:15-16). Ya mta mnơ̆ng drei myơr kơ Khua Yang hlăm grăp hruê, grăp hruê kăm, grăp mlan, grăp thŭn brei jing klei bi mni kơ Aê Diê hŏng jih klei blŭ leh anăn bi êdah hŏng bruă ngă mơ̆ng klei gưt asăp.
Jing phung kkuh mpŭ kơ Aê Diê, hruê anei drei ăt nao giăm Khua Yang “grăp aguah leh anăn grăp tlam.” Knăm kjuh, drei lui bruă ti lăn ala anei čiăng nao ti Sang kkuh mpŭ kơ Aê Diê. Grăp mlan drei nao hlăm Klei ƀơ̆ng mnăm sĭt suôr. Anăn ăt jing sa “klei mtă…” kơ drei. Grăp hruê drei ăt myơr kơ Khua Yang mnơ̆ng myơr jing klei gưt asăp. Klei hdĭp phung jing dŏ Khua Yang mơ̆ng đưm truh ară anei jing “brei myơr nanao” kơ Aê Diê mnơ̆ng myơr bi mơak kơ Ñu.
Ya klei drei myơr leh čiăng bi mơak kơ Aê Diê ?
Ơ Khua Yang, kâo myơr kơ Ih mnơ̆ng myơr bi mơak kơ Ih hŏng klei kkuh mpŭ, hơêč hmưi kơ Aê Diê Ama, Aê Diê Anak, Yang Mngăt Jăk hŏng klei blŭ wăt bruă kâo mă hlăm grăp hruê leh anăn jih klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 5:10-6:21
Kênh Youtube BHKTHN:
