Klei Aê Diê Blŭ: H’Rut 1:1-17
Êlan kliăng: “16Ƀiădah H’Rut lač, “Đăm mgô̆ brei kâo lui ih amâodah wĭt amâo tui hlue ih ôh. Kyuadah ti anôk ih nao kâo srăng nao; leh anăn ti anôk ih dôk kâo srăng dôk; phung ƀuôn sang ih srăng jing phung ƀuôn sang kâo, leh anăn Aê Diê ih srăng jing Aê Diê kâo; 17ti anôk ih djiê kâo srăng djiê, leh anăn tinăn arăng srăng dơr kâo. Brei Yêhôwa ngă tui si Ñu čiăng kơ kâo leh anăn êbeh hĭn tŭ mơh knŏng klei djiê bi ktlah kâo hŏng ih.” (H’Rut 1:16-17).
Klei êmuh ksiêm mĭn: Ya klei truh, hlăk leh gŏ sang H’Naômi nao dôk bhiâo hlăm čar Môap? Si ai tiê thâo mpŭ H’Rut dôk dơ̆ng hŏng amĭ ung ñu? Si klei khăp H’Naômi hŏng mtâo mniê ñu? Ya klei drei mă hriăm mơ̆ng klei bi hmô mơ̆ng dua čô mniê djiê ung anei?
Kyuadah mâo klei ư̆ êpa, snăn gŏ sang H’Naômi čuăn lui ƀuôn Betlêhem nao dôk bhiâo hlăm čar Môap. Leh mâo pluh thŭn êgao, bi duê ung ñu leh anăn dua čô anak êkei ñu djiê sơăi, adôk hlăm sang hjăn tlâo čô mniê djiê ung amâo mâo anak čô ôh. Hlăm klei truh msĕ snăn, H’Naômi mâo klei phĭ ai tiê nanao, tơl kơ hlăk ñu čuăn lŏ wĭt kơ ƀuôn sang ñu hđăp, ñu akâo kơ arăng pia kơ ñu “H’Mara” mblang jing phĭ, hrô kơ “H’Naômi” mblang jing mmih (êlan 20). Êjai dôk ti Môap, năng ai H’Naômi ăt djă pioh knhuah hdĭp huĭ mpŭ leh anăn ƀiă lu ăt blŭ hưn kơ Aê Diê leh anăn phung ƀuôn sang Aê Diê ruah hŏng dua čô mtâo mniê ñu, ƀiădah ñu amâo mâo mgô̆ digơ̆ đăo kơ Aê Diê ôh. Hlăk dơ̆ng lŏ wĭt kơ čar, ñu brei dua čô mtâo mniê ñu lŏ wĭt kơ sang amĭ digơ̆ lŏ dôk ung mrâo, H’Ôrpa hmư̆ ngă hluê, bi H’Rut khut khat ruah tui nao hŏng kmha mniê ñu. Klei ñu lač “Aê Diê ih srăng jing Aê Diê kâo” brei ƀuh ñu dưm klei đăo ñu kluôm dhuôm kơ Aê Diê.
Dlăng hdruôm hră H’Rut, drei ƀuh H’Rut mâo ai tiê mpŭ kơ kmha ñu kluôm dhuôm êdi, ñu dôk dơ̆ng hŏng gơ̆ amâo mâo mdê hŏng kơ amĭ kkiêng ôh. Wăt tơdah ñu dưi wĭt kơ sang lŏ dôk ung mkăn ƀiădah ñu jih ai tiê săn asei lui klei hơ̆k mơak hjăn pô ruah tui nao hŏng amĭ tơl tuč klei hdĭp, knŏng klei djiê đuč dưi bi ktlah diñu. Leh anăn kyuadah khăp kơ amĭ, snăn ñu lui jih phung yang ti čar Môap čiăng đăo leh anăn kkuh mpŭ kơ Aê Diê amĭ ñu. Êdei tinăn, ñu nao mă bruă, răng kriê kmha ñu hŏng klei jăk sĭt suôr snăk. H’Naômi jing amĭ wăt tơdah mâo ai tiê phĭ êđal dhal, lač kơ Aê Diê brei ñu wĭt hŏng “tlâo mta klei êhŏng”, kngan êhŏng, amâo mâo ung, amâo mâo anak, ƀiădah ñu amâo thâo ôh kơ Aê Diê dơ̆ng bi bŏ kơ ñu hŏng klei yuôm bhăn êdimi. Klei jăk mơ̆ng H’Naômi, ñu jing sa čô amĭ bŏ hŏng klei thâo khăp kơ mtâo mniê ñu, ñu dlăng kơ gơ̆ msĕ si anak ñu pô kkiêng, mĭn čiăng klei jăk mơak kơ gơ̆ hĭn kơ klei jăk mơak kơ ñu pô leh anăn ktrâo atăt mtô lač kơ gơ̆ djăp mta klei, hlăk mrâo truh ka thâo săng klei hdĭp hlăm čar tue.
Hlăm knăm bi hdơr Hruê Mpŭ Kơ Amĭ Ama thŭn anei, akâo kơ phung amĭ ama ngă hluê klei bi hmô mơ̆ng H’Naômi khăp kơ anak pô, thâodah anak pô kkiêng amâodah mtâo mniê, mtâo êkei. Phung anak brei hriăm klei bi hmô mơ̆ng H’Rut, hŏng jih ai tiê thâo khăp, răng kriê bi jăk amĭ ama kkiêng amâodah amĭ ama ung, amĭ ama mô̆. Tơdah jih jang gŏ sang hdĭp bi khăp hdơ̆ng găp msĕ snăn wăt tuôm hŏng ya mta klei truh dưn, klei jăk mơak mơ̆ng Aê Diê brei srăng bŏ dlai nanao.
Ya klei drei wah lač akâo kơ Aê Diê brei hlăm hruê Mpŭ kơ Amĭ Ama thŭn anei?
Ơ Khua Yang, akâo kơ Ih brei kâo ngă hluê klei bi hmô mơ̆ng H’Naômi leh anăn H’Rut, hdĭp thâo khăp kơ gŏ sang, ngă hluê Klei Aê Diê Blŭ mtô, čiăng kơ klei jăk mơak mơ̆ng Aê Diê brei bŏ dlai nanao hlăm gŏ sang kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 3:40-4:20
Kênh Youtube BHKTHN:
