Klei Aê Diê Blŭ: Klei Mtô Mñă Klei Bhiăn 9:22-29
Êlan kliăng: “Ñu amâo ngă kơ drei tui si klei soh drei ôh, kăn bi kmhal rei tui si klei wê drei.” (Klei Mmuñ Hđăp 103:10).
Klei êmuh ksiêm mĭn: Y-Môis lŏ mñă kơ ya klei truh hlăm hƀuê ênuk aê aduôn phung ƀuôn sang Israel? Ya klei soh aê aduôn phung ƀuôn sang Israel ngă, tơl Aê Diê čiăng bi rai diñu? Kyua mơ̆ng ya klei, Aê Diê lŏ pap brei klei soh aê aduôn phung ƀuôn sang Israel? Ya klei drei ƀuh leh grăp bliư̆ êbuh lĕ, leh anăn Aê Diê pap brei klei soh?
Trăn Klei Aê Diê Blŭ anei lŏ yăl dliê kơ klei truh ti Kadês-Barnê, jing anôk aê aduôn phung ƀuôn sang Israel bi kdơ̆ng hŏng klei Aê Diê mtă, hngah kơ klei mă bha ala čar Aê Diê ƀuăn brei kơ diñu. Hlŏng jih ktuê êlan kbiă hriê mơ̆ng čar Êjip truh ti Kadês-Barnê, aê aduôn phung ƀuôn sang Israel ƀuh leh kngan myang Aê Diê ngă mơ̆ng hruê anei kơ hruê mkăn, wĭt lač jih djăp mta klei phung ƀuôn sang Ñu čiăng. Ƀiădah ti Kadês-Barnê, aê aduôn phung ƀuôn sang Israel amâo đăo knang ôh kơ klei prŏng Aê Diê dưi đru diñu bi blah hŏng phung ƀuôn sang hlăm čar Kanaan, kyuanăn diñu hngah mă bha ala čar anăn (êlan 23). Klei phung ƀuôn sang Israel amâo đăo leh anăn bi kdơ̆ng hŏng klei Aê Diê mtă, mčhur ai ngêñ Aê Diê tơl čiăng bi rai diñu. Ƀiădah Y-Môis kwưh akâo kơ Aê Diê lŏ hdơr wĭt kơ klei bi mguôp Ñu ngă leh hŏng aê aduôn đưm diñu, hdơr kơ phung ƀuôn sang Israel jing ngăn dưn Aê Diê, leh anăn ăt hdơr kơ Anăn kơhưm Ñu ti krah phung ƀuôn sang mkăn, snăn pap brei kơ klei soh diñu (êlan 24-29). Lŏ sa bliư̆ dơ̆ng, phung ƀuôn sang Aê Diê dưi lŏ mă tŭ klei Aê Diê pap brei klei soh diñu, bi knal klei jăk Aê Diê.
Phung dôk hmư̆ klei Y-Môis lŏ yăl dliê wĭt kơ dua mta klei soh prŏng êgao leh, jing phung hlăk ai dôk prăp miêt ksŭng blah mă bha ala čar Kanaan. Kyuanăn, klei yăl dliê kơ aê aduôn diñu dluh lĕ hlăk ênuk đưm ti Kadês-Barnê srăng đru diñu weh đuê̆ mơ̆ng gru êbuh lĕ kyua klei amâo đăo kơ Aê Diê msĕ si aê aduôn diñu, mbĭt hŏng klei anăn brei diñu ƀuh klei jăk, klei gĭr Aê Diê amâo mâo knhal, êbat mbĭt leh hŏng phung ƀuôn sang Israel hlăm jih thŭn mlan hlăm kdrăn tač jing prŏng prĭn êdimima.
Lŏ dlăng wĭt kơ êlan êbat klei hdĭp myang pô, grăp bliư̆ drei lĕ buh jing grăp bliư̆ drei dưi ƀuh klei awăt êdu drei pô, mbĭt anăn, dưi ƀuh klei jăk Aê Diê amâo mâo knhal ôh, Pô pap brei nanao klei soh drei, leh anăn pŏk blang păl kngan kăp kmiêk jum drei hlăm đah da Ñu, tơdah drei thâo kmhal sĭt klei soh drei. Lač msĕ snăn, amâo djŏ ôh drei knŏng ƀuh klei jăk Aê Diê grăp bliư̆ drei ngă soh hŏng Ñu, ƀiădah wăt êjai klei hdĭp myang drei đĭ hriê kơ prŏng leh hlue mbĭt hŏng thŭn mlan, tơdah lŏ dlăng wĭt kơ klei hdĭp drei pô, ƀuh klei Aê Diê thiê brei kơ pô, sĭt yơh drei sa ai mbĭt hŏng pô čih Klei Mmuñ Hđăp 103 thâo săng kơ klei Aê Diê ngă kơ drei amâo djŏ tui si klei soh drei ôh. Jih klei Aê Diê ngă kơ drei amâo djŏ kyuadah drei jing jăk hĭn, amâodah năng hĭn kơ Ñu ôh. Ƀiădah jih jang klei, kbiă hriê mơ̆ng klei jăk amâo mâo knhal Ñu pioh brei kơ phung mnuih soh amâo mâo năng msĕ si drei.
Si ngă drei tuôm bi knal leh mơ̆ klei jăk Aê Diê hlăm grăp gưl klei hdĭp drei?
Ơ Khua Yang, bi mni lač jăk kơ Ih kyua klei jăk Ih ăt pioh brei kơ sa čô anak amâo mâo năng msĕ si kâo anei. Akâo kơ Ih đru kâo dưi jing ktang hĭn leh anăn dôk hdĭp tui si klei Ih čiăng grăp hruê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 1
Kênh Youtube BHKTHN:
