Klei Aê Diê Blŭ: Y-Mathiơ 18:18-20
Êlan kliăng: “Čiăng bi êdah ti anăp Ñu Phung Sang Aê Diê anei bŏ hŏng klei guh kơang, amâo mâo anôk čhŏ, amâo mâo anôk kčŭng, amâo mâo mnơ̆ng msĕ snăn ôh, čiăng kơ gơ̆ dưi jing doh jăk amâo mâo anôk jhat ôh” (Êphêsô 5:27).
Klei êmuh ksiêm mĭn: Si klei Khua Yang Yêsu mtô kơ klei dưi Phung Sang Aê Diê? Čiăng yua klei dưi anăn, si klei hdĭp brei phung gĭt gai leh anăn phung ƀuôn sang Aê Diê mâo? Ya drei srăng ngă čiăng đru bi êdah klei doh jăk Phung Sang Aê Diê?
Leh mtô kơ êlan mkra mjuăt hlăm Phung Sang Aê Diê (Y-Mathiơ 18:15-17), Khua Yang Yêsu bi êdah kơ phung ƀĭng kna thâo klei dưi čiăng yua hlăm klei mkra mjuăt. Tal sa, Phung Sang Aê Diê jing anôk hưn bi êdah hnơ̆ng čuăn klei kpă ênô Aê Diê amâo mâo mlih ôh. Boh blŭ “kă” leh anăn “kleh” hlăm êlan 18 lač kơ klei Phung Sang Aê Diê čuăn ngă klei mkra mjuăt leh anăn pap brei klei soh. Phung Sang Aê Diê ngă klei dưi anei hŏng klei mtô kơ phung đăo thâo ti klei djŏ, ti klei soh jưh ti Klei Sĭt Nik hlăm Klei Aê Diê Blŭ, brei phung đăo thâo kơ digơ̆ dôk mâo klei phat kđi klei soh amâodah mâo klei Khua Yang pap brei leh kna ti klei sĭt nik jing Klei Aê Diê Blŭ. Tal dua, boh blŭ “sa ai” hlăm êlan 19 čiăng lač kơ klei Phung Sang Aê Diê bi mguôp sa ai. Brei Phung Sang Aê Diê sa ai hlăm klei mkra mjuăt, đăm ngă klei amâo sa ai ôh. Tơdah Phung Sang Aê Diê wah lač hŏng jih ai tiê leh anăn bi mguôp sa ai hưn sa čô mnuih đăo ngă soh kmhal kơ klei soh leh anăn mâo klei pap brei leh, amâodah hngah amâo mâo kmhal ôh tŭ klei mkra mjuăt djŏ tui si klei Aê Diê mtă, snăn jih jang klei digơ̆ wah lač anăn, Ama hlăm adiê srăng hmư̆. Tal tlâo, Aê Diê pô srăng mă bruă mbĭt hŏng Phung Sang Aê Diê hlăm klei čuăn ngă klei mkra mjuăt amâodah pap brei klei soh. Khua Yang srăng “dôk mbĭt” hŏng Phung Sang Aê Diê tơdah Phung Sang Aê Diê yua Anăn Khua Yang đru sa čô pô đăo thâo kral klei soh gơ̆, Ñu srăng atăt gai jih jang klei Phung Sang Aê Diê čuăn ngă klei mkra mjuăt amâodah pap brei čiăng jih jang klei čuăn ngă anăn ba hriê klei tŭ dưn, klei bi mđĭ ai kyuadah mkra mjuăt hŏng klei khăp.
Anei jing sa klei lông dlăng prŏng kyuadah čiăng yua klei dưi anei čoh čuăn phung gĭt gai Phung Sang Aê Diê leh anăn wăt phung bi đru đăo mâo klei hdĭp doh jăk tui si Klei Khua Yang Blŭ, thâo bi hmô jăk leh anăn đĭ hriê kơ prŏng hlăm klei đăo.
Hruê anei, Yang Mngăt Jăk ăt dôk bi klă Phung Sang Aê Diê, kyuanăn ăt čiăng kơ klei mkra mjuăt. Hră Êphêsô 5:27 lač brei Phung Sang Aê Diê bi êdah klei guh kơang, amâo mâo anôk čhŏ, amâo mâo anôk kčŭng, doh jăk leh anăn klă ênŭm ti anăp Aê Diê. Čiăng dưi mâo klei anei, brei Phung Sang Aê Diê yua klei dưi pô đru phung đăo thâo săng djŏ kơ Klei Aê Diê Blŭ leh anăn đĭ hriê kơ prŏng hlăm Klei Aê Diê Blŭ. Tơdah dôk ti anăp klei amâo mâo ênuah, brei Phung Sang Aê Diê sa ai hlăm klei blŭ, sa ai hlăm klei čuăn ngă, Khua Yang srăng dôk mbĭt kăp thiăm ai ktang kơ Phung Sang Aê Diê Ñu đru digơ̆ hdĭp djŏ tui si hnơ̆ng čuăn Ñu bi êdah leh. Jih jang klei Phung Sang Aê Diê čuăn ngă klei mkra mjuăt jing klei čuăn ngă kyua klei khăp, kyua klei guh kơang, klei doh jăk leh anăn klei jăk klă Phung Sang Aê Diê.
Si ngă drei bi êdah leh mơ̆ klei siam Phung Sang Aê Diê ti krah lăn ala soh jhat anei?
Wah lač: Ơ Khua Yang, kâo lač jăk kơ Ih kyuadah Ih dôk mkŏ mjing leh anăn dôk bi klă Phung Sang Aê Diê ti lăn ala anei. Đru kâo ƀrư̆ hruê ƀrư̆ đĭ hriê kơ prŏng hlăm Ih, čiăng kơ klei hdĭp kâo ba klei tŭ dưn kơ Phung Sang Aê Diê Ih, đru bi kjăp klei đăo kơ lu mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Hriêng 12-13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
