Klei Aê Diê Blŭ: Klei Bi Hriêng 12:13-19
Êlan kliăng: “Ƀăng êgei blŭ klei sĭt nik dôk kjăp hlŏng lar, ƀiădah êlah blŭ luar dôk knŏng bhiâo.” (Klei Bi Hriêng 12:19).
Klei êmuh ksiêm mĭn: Si ngă klei Mtao Y-Salômôn bi hriăm anak kơ klei mdê plah wah klei blŭ jăk leh anăn klei blŭ jhat? Phung đaŏ kơ Krist êngao kơ bruă brei ngă djŏ djŏ, lŏ bre mđing dlăng thiăm kơ ya mta? Ya klei brei drei mđing hlăm klei drei blŭ čiăng ya klei drei blŭ bi guh kơang Anăn Aê Diê?
Mtao Y-Salômôn yua hdră bi mkă čiăng bi hriăm anak thâo kơ klei mdê plah wah klei blŭ jăk leh anăn klei blŭ jhat. Klei blŭ jăk jing klei blŭ mơ̆ng mnuih thâo mĭn, kpă ênô, bi klei blŭ jhat jing klei blŭ mơ̆ng mnuih mluk, blŭ luar. Tal sa, mnuih thâo mĭn thâo brei thâo răng hlăm klei blŭ. Anak đăm ôh kyua djŏ klhiăr hĕ boh blŭ tŭ mă klei rŭng răng (êlan 13). Klei blŭ jăk srăng ba kơ anak klei jăk mơak, bi klei blŭ jhat srăng tŭ mă boh jhat jing klei rŭ ênua mơ̆ng phung hmư̆. Tal dua, brei duah mđing kơ phung dôk hmư̆ pô jing si ngă pô anăn, kyua knŏng mnuih thâo mĭn kơh mđing kơ klei bi hriăm, bi mnuih mluk mgu dleh dưi tŭ klei kčĕ (êlan 15). Tal tlâo, brei anak ăt ksiêm dlăng ai tiê pô sĭt blŭ, đăm ôh “ngêñ đei luč klei thâo mĭn” leh anăn blŭ soh, ngă hmăi kơ knuih leh anăn rup anak (êlan 16). Tal pă, klei blŭ anak brei mâo klei jăk, ba klei khăp, jing hdră jăk bi juh klei êka hlăm ai tiê. Đăm brei ôh klei anak blŭ msĕ si đao gưm dua mta bi êka ai tiê mnuih hmư̆ (êlan 18). Knhal tuč, klei blŭ anak brei jing klei blŭ kpă ênô (êlan 17), klei sĭt nik (êlan 19) kyua “êlah blŭ luar” knŏng mplư mnuih bhiâo đuč leh anăn ăt arăng srăng thâo bi klei blŭ sĭk nik srăng dôk kjăp hlŏng lar (êlan 19).
Klei duê Việt Nam mâo klei lač: “Mah snăn lông čuh hlăm pui, pui lông čuh hdăng. Tiêng liêng lông hmư̆ ênai, mnuih thâo mĭn lông blŭ”. Arăng knŏng hmư̆ ênai tiêng liêng, thâo tiêng liêng jăk amâodah jhat, knŏng hmư̆ mnuih blŭ, thâo mnuih thâo mĭn amâodah mluk. Klei blŭ phung đaŏ kơ Krist brei thâo răng hĭn, amâo djŏ jing klei blŭ djŏ klă čiăng bi êdah kơ mnuih hmư̆ thâo pô thâo mĭn amâodah mluk ôh, ƀiădah bi êdeh Aê Diê kơ mnuih hmư̆. Khua Yang Yêsu mtô: “Brei klei ih blŭ ‘Ơ’ jing Ơ amâodah ‘Ơ ơh’ jing Ơ ơh; klei lŏ thiăm kơ klei anăn kbiă mơ̆ng yang jhat.” (Y-Mathiơ 5:37). Phung anak čô Aê Diê brei bi êdah klei kpă ênô, doh jăk mơ̆ng Aê Diê hlăm klei blŭ sĭk nik, djŏ klă. Amâo djŏ knŏng brei drei blŭ klei kpă ênô ôh, ƀiădah brei hưn mdah klei pô bŭ bi jăk, djŏ mmông, djŏ anôk, djŏ mnuih leh anăn ăt brei jih ai tiê thâo răng klei blŭ sĭt hmăi mơ̆ng ai tiê msĕ si hlơr ngêñ, ênguôt hnĭng, čiăng đăm hmăi amâo jăk kơ ƀĭng dôk hmư̆. Čang hmăng boh blŭ grăp čô drei brei bi êdah nanao klei khăp, klei pap leh anăn klei thâo mĭn kơ mnuih hmư̆ leh anăn klei blŭ anăn bi guh kơang Anăn Aê Diê, čiăng kơ grăp čô mnuih thâo ƀuh hlei Pô drei kkuh mpŭ.
Mâo mơ̆ ya klei brei drei bi mlih hlăm klei blŭ?
Ơ Khua Yang, kâo bi mni lač jăk kơ Ih bi hriăm leh kâo blŭ klei jăk. Akâo kơ Ih đru kâo mâo klei blŭ thâo mĭn hlăm klei kpă ênô hlăm klei blŭ, thâo mĭn hlăm klei blŭ, čiăng ba klei mơak, klei tŭ dưn kơ mnuih hmư̆ leh anăn bi guh kơang Anăn Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 14
Kênh Youtube BHKTHN:
