I Timautes 1:18-20
Nqe cim:
“Kuv tus tub Timautes, tej lus uas kuv qhia koj no yog raws li tej lus uas yav tas los cov neeg uas paub tej uas yuav muaj los yav tom ntej no twb hais txog koj lawm. Koj yuav tsum muab tej lus ntawd los ua ntaj ua riam, koj thiaj yuav tawmtsam yeej yeebncuab. Koj yuav tsum muab siab rau ntseeg thiab muaj lub siab ncaj siab ncees.” (I Timautes 1:18-19a)
Lus nug sawvdaws xav:
– Vim li cas Timthawj Paulus thiaj qhia rau Timautes kom nws yuav tsum tawmtsam yeej yeebncuab?
– Nws muab txoj kev ntseeg sib txuas nrog lub siab ncaj siab ncees licas?
– Qhov txiaj ntsig uas Himena-us thiab Alexades raug ceeb toom peb li cas?
Tom qab ua Vajtswv tsaug, Timthawj Paulus rov qab los hais txog lub ntsiab lus tseem ceeb ntawm tsab ntawv uas nws tau sau hauv I Timautes 1:3-11: Tawmtsam cov neeg qhia tej zaj uas tsis tseeb. Nws pib nrog lo lus tias: “Kuv tus tub Timautes” kom tus xibhwb hluas uas yog nws tus menyuam sab ntsujplig paub tseeb tias tej yam uas nws tabtom nyeem yog tseem ceeb. Txij nqe 18 mus txog nqe 20, Timthawj Paulus sau tej lus qhia tseem ceeb rau tus phoojywg nrog nws ua haujlwm hais tias: “Koj yuav tsum muab tej lus ntawd los ua ntaj ua riam, koj thiaj yuav tawmtsam yeej yeebncuab” (nqe 18), txhais tau tias yuav tsum muaj lub siab tawv tawmtsam. Hauv tsab ntawv no, muaj ob zaug Timthawj Paulus tau qhia nws tus phoojywg hluas kom ua li ntawd (I Timautes 1:18; 6:12). Thiab hauv tsab ntawv tom qab, Timthawj Paulus hais txog nws tus kheej tias: “Kuv twb siv zog khiav kawg kuv lub zog lawm, kuv twb khiav mus txog qhov kawg lawm. Kuv muab siab npuab Vajtswv” (II Timautes 4:7). Raws li Timthawj Paulus, cov ntseeg lub neej yog ib pluav rog sab ntsujplig ntev heev nrog lub ntiaj teb, sab nqaij tawv, thiab tej dab phem mus txog thaum peb mus cuag Vajtswv. Dab ntxwgnyoog yeej tsis tseg kev tawmtsam, pheej tua tuaj ua rau peb tsis tuav ruaj txoj kev ntseeg, kom peb tsis tau txais kev kaj siab thiab lub neej puv npo, npluamias hauv Vajtswv.
Dhau ntawm Timthawj Paulus cov lus qhia nyob hauv nqe 19 thiab nqe 20, nws xav kom nws tus tub sab ntsujplig pom qhov sib txawv ntawm ob pawg neeg ua tsov rog ntawm sab ntsujplig. Tus sawv cev ntawm pawg thawj yog Timautes, uas yuav tsum “tawmtsam yeej yeebncuab,… muab siab rau ntseeg thiab muaj lub siab ncaj siab ncees”. Tus sawv cev ntawm pawg ob yog ob tug npe hu ua Himena-us thiab Alexades, vim “tsis ua raws li lawv lub siab qhia, lawv thiaj tso Vajtswv tseg lawm” (nqe 19-20). Timthawj Paulus muab txoj kev ntseeg tseeb txuas nrog lub siab ncaj ncees thiab dawbhuv. Thaum ib tug neeg pheej tsis mloog lub suab ntawm nws lub siab, thiab tsis mloog Vajtswv tus Ntsujplig Dawbhuv tej lus qhuab ntuas, ceeb toom, taw qhia, ces tus neeg ntawd txoj kev ntseeg kuj poob lawm. Thaum ntawd, tus neeg ntawd yuav tsum raug muab “tso rau dab Ntxwgnyoog” uas txhais tau tias raug cais tawm Pawg Ntseeg. Lo lus ntxiv hais tias “kom nkawd tsis txhob thuam Vajtswv” qhia tau tias lub hom phiaj ntawm kev cais tawm hauv Pawg Ntseeg tsis yog rau txim xwb, tiamsis yog pab kom tus neeg raug txim ntawd zeem paub tej yam yuam kev nws ua thiab tig rov los cuag Vajtswv thiab Pawg Ntseeg dua.
Qhov uas Himena-us thiab Alexades raug yog ib qho ceeb toom rau peb kom tuav ruaj txoj kev ntseeg hauv Tswv Yexus Khetos, thiab tuav ruaj lub siab ncaj ncees kom tawmtsam yeej hauv pluav rog sab ntsujplig, vamkhom Vajtswv Txojlus pab kom peb yeej mus txog hnub uas ntsib tus Tswv.
Thov Vajtswv,
Vajtswv, thov pab kom nyuam yaus hnov tej lus qhia hauv nruab siab, kom nyuam yaus tuav ruaj txoj kev ntseeg thiab muaj kev zoo siab nyob hauv lub neej puv npo uas Koj pub. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Muaj yam kev txhaum twg peb tau Vaj Ntsujplig qhuab ntuas hauv nruab siab tiamsis peb tsis mloog raws?
Nyeem Vajluskub hauv peb lub xyoo: Yelemis 40
Kênh Youtube BHKTHN:
