Klei Aê Diê Blŭ: I Klei Yăl Dliê 28:11-21
Êlan kliăng:
“Leh anăn Y-Đawit lač kơ Y-Salômôn anak êkei ñu, “Jing ktang bĕ leh anăn đăm huĭ ôh, leh anăn ngă klei anăn. Đăm huĭ ôh, đăm êdu ai ôh; kyuadah Yêhôwa Aê Diê, jing Aê Diê kâo, dôk mbĭt hŏng ih. Ñu amâo srăng kƀah klei đru ih ôh, amâodah kăn lui ih rei, tơl bi leh jih jang bruă sang Yêhôwa.” (I Klei Yăl Dliê 28:20).
Klei êmuh ksiêm mĭn: Ya klei Mtao Y-Đawit brei kơ Y-Salômôn? Dŭm mta bi hmô anei mơ̆ng mphŭn mâo? Ya klei Mtao Y-Đawit mđĭ ai Y-Salômôn? Ya ngă? Ya mta klei Mtao Y-Đawit mđĭ ai đru phung drei hlăm klei mă bruă kơ Aê Diê?
Y-Salômôn dôk mda asei leh anăn dơ̆ng đĭ ngă mtao, jing mnuih Aê Diê ruah pioh rŭ mdơ̆ng sa sang yang prŏng siam “pioh kơ adŭ doh jăk” (êlan 10). Anei jing sa klei Aê Diê brei kơ Y-Salômôn ƀiădah mbĭt anăn ăt jing sa klei lông dlăng prŏng ngă kơ êkei êdam hlăk dua pluh thŭn anei huĭ hyưt. Mtao Y-Đawit, ama ñu, sa cô mtao hing ang, bŏ hŏng klei thâo, dơ̆ng djiê. Ñu mprăp ngă bruă klam prŏng prĭn ƀiădah mâo ama kăp đru, leh anăn yuôm bhăn hĭn jing bruă rŭ mdơ̆ng sang yang.
Hlăk anăn, Mtao Y-Đawit jao kơ Y-Salômôn hră rup kač sang yang, adring, jih jang adŭ jŭm dar, adŭ ngăn drăp sang Aê Diê, leh anăn adŭ ngăn drăp pioh mnơ̆ng arăng myơr. Anăn jing rup bi hmô mâo Yang Mngăt Jăk brei mtao thâo (êlan 12). Mtao ăt mâo hră mtrŭn mbha bruă kơ phung khua ngă yang leh anăn phung Lêwi, kơ dŭm bruă hlăm Sang Yang leh anăn kơ jih jang mnơ̆ng dhơ̆ng hlăm Sang yang, dưi lač klă kơ ênoh mah, kông kơ dŭm mta mnơ̆ng yua hlăm djăp bruă… Jih jang mơ̆ng Khua Yang pô čih čiăng ktrâo lač kơ Mtao Y-Đawit.
Drei lông bi mĭn hlăm boh klei Y-Salômôn hlăk anăn, năng ai ñu bŏ hŏng huĭ hyưt ti anăp bruă klam prŏng prĭn, boh nik ngă bi djŏ djăp mta hluê si hră rup mơ̆ng mtao ama mâo Aê Diê pô bi êdah. Thâo anak pô huĭ hyưt, Mtao Y-Đawit mtă kơ anak êkei ktang bĕ, amâo huĭ ôh ngă bruă dưi jao, đăm huĭ ôh kyua Yêhôwa Aê Diê ăt “dôk mbĭt.” Mtao brei thâo “Ñu amâo srăng kƀah klei đru ih ôh, amâodah kăn lui ih rei, tơl bi leh jih jang bruă sang Yêhôwa.”
Sĭt dôk ti anăp sa bruă klam prŏng prĭn hlăm bruă Khua Yang amâo dah tlă anăp hŏng sa klei dleh dlan, drei ăt khăng ênưih wơr hĕ Khua Yang dôk mbĭt, wơr hĕ Khua Yang kiă kriê nanao, amâo đuê̆ kbưi hŏng phung drei leh anăn leh anăn ai tiê drei amâo êđăp ênang. Brei drei mđing hmư̆ klei Mtao Y-Đawit mtă, sa čô mnuih tuôm thâo leh klei khăp, klei myang mơ̆ng Aê Diê bŏ hŏng klei khăp ñu jing “Aê Diê kâo” (êlan 20), čiăng kơ drei kjăp ktang ai tiê, lŏ dơ̆ng sĭt suôr hlăm bruă dưi jao amâodah sĭt tuôm hŏng klei lông dlăng, dleh dlan hlăm klei hdĭp anei.
Sĭt tuôm hŏng klei dleh dlan, lông dlăng, di ih đaŏ mơh Aê Diê pô dôk mbĭt êla jih jang bruă dưi bi leh, jih klei dleh dlan êgao hĕ?
Ơ Khua Yang, akâo kơ Ih đru kâo đăm dlăng kơ klei lông dlăng, dleh dlan ôh ƀiădah hlăm djăp klei mâo ƀuh Aê Diê dôk mbĭt nanao čiăng jih ai tiê kâo tui hluê Khua Yang leh anăn ngă bruă kơ Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
