Inh Gô Oei Hơdai Ih – 29/1/2025

320
Trình chơi Audio

 

 

Lĕch Đơ̆ng Êyiptơ 3:1-12

“Kră Yang ‘Bok Kei-Dei khan: Inh gô oei hơdai hăm ih; ‘nâu tơdrong wă kơ ih băt tơdra Inh wơh ih năm: Lăp ih chông kon pơlei lĕch đơ̆ng dêh Êyiptơ boih, na lu iĕm gô kơkuh awih awăn kơ Kră Yang ‘Bok Kei-Dei tơ kơpal kông ‘nâu.” (Lĕch Đơ̆ng Êyiptơ 3:12)

Nơ̆r jet tơchĕng pơwao:

– ‘Bok Môis sơngah kơ tơdrong mă Kră Yang ‘Bok Kei-Dei krao yua kơ tơdrong kiơ?

– Sư đei glăi tơdrong kiơ na jing sư ưh kơ drơ̆ng nơ̆r Kră Yang krao?

– Nơ̆r pơkă đơ̆ng Kră Yang đei tơgŭm bơ̆n thoi yơ lăm sơnăm ‘nao âu?

Lăm pêng năr têt sơnăm âu, lu bơ̆n hơdai pơwao tơchĕng tơdrong đei roi gah Kră Yang ‘Bok Kei-Dei krao ƀok Môis, wă tơgŭm bơ̆n đei jơhngơ̆m pran kơkuh kơ ‘Bok Kei-Dei păng bơ̆jang kơ Sư lăm sơnăm ‘nao plơ̆ng âu.

‘Bok Môis sư đei hŏk pơhrăm lăm hnam ‘bok pơtao Êyiptơ đe jô̆ sư jơ̆ minh ‘nu kon ‘bok pơtao, sư jing minh ‘nu bơngai hơgei. Mă lei đei minh tơdrong truh kơ sư na sư chă kơdâu ôn na jing wei triu kơ tơnei sư tơlăm char Mađian. Minh năr ei, Kră Yang ‘Bok Kei-Dei đei tơƀôh kơ sư hăm ŭnh sa jơbôt mă ưh kơ păt, krao  sư wih brŏk na dŏng pơklaih kơ pơlei Isơrael hlôi đơ̆ng tơdrong pơm đĭch lăm dêh Êyiptơ păng pơgơ̆r kon pơlei lĕch đơ̆ng dêh char Êyiptơ noh, sư wă ưh kơ drơ̆ng păng chă trong wă sơngah. Sư đei pơma hăm Kră Yang khan lu kon pơlei ưh kơ lui ngheh kơ sư, păng sư jơ̆ minh ‘nu bơngai pơma a-răk kơnh hơmơt kơ ưh kơ gơh pơma dơnuh hăm pơtao Pharaôn, sư tơchĕng hli kơ ưh kơ jing keh đang lăm tơdrong ‘Bok Kei-Dei jao tih dêh…

Kơplah ‘bok Môis đei pơma “Inh jơ̆ bu” mă jang tơdrong tih thoi âu? Mă lei ‘Bok Kei-Dei đei tơl “Inh Gô Oei Hơdai Ih” kơplah ‘bok Môis đei tơchĕng “Inh Pơm” mă lei Kră Yang ‘Bok Kei-Dei tơ blŏk kơ sư, ưh kơ trŏ kơ ih pơm, mă lei Inh gô oei hơdai ih, ăn jơhngơ̆m pran kơ ih, blah dŏng ih, mă lei inh kăl kơ ih iung na yak năm hloi păng pơtơm jang. Yua kơ sư hlôh glăI na sư sơngah kơ tơdrong Kră Yang ‘Bok Kei-Dei đei pơjao.

Minh sơnăm ‘nao đei dan ‘bơ̆t hơnăp lu bơ̆n, lăm rim nu lu bơ̆n gô tơ’bơ̆p phŏ kơnh đei tơdrong hiôk chơt mă lei kŭm dai đei năr kơnh đei tơdrong anat anot, păng kŭm gô đei tơdrong pơlong lăng, gô đei tơdrong chơt hiôk kŭm dai đei tơdrong sơngon dai truh, lăp kơnh tơdrong ưh kơ thoi bơ̆n wă… lăng tơdrong tơ hơnăp bơ̆n lăng kơ dih jơhngơ̆m pran bơ̆n phŏ ưh kơ kĕ kơ yak hlôi, phŏ kơnh kŭm wă kơdŭn tơ rŏng. Bơnê kơ Kră Yang dôm tơdrong noh Kră Yang băt đĭ bơih, ‘bôh đĭ bơih, mơ̆ng đĭ bơih (trong 7). Hăm lu bơ̆n sơnăm ‘nao đan ƀơ̆t anăp bơ̆n noh jơ̆ tơdrong tơ hơnăp mă lei hăm Kră Yang noh jơ̆ nhen thoi dang ei đĕch. Lu bơ̆n arih lăm khei năr mă lei Kră Yang ưh ôh sư hlôi kơ khei năr. Kră Yang Yêsu đei pơkă hăm lu bơngai jơ̆ng ƀang sư hơdrol kơ Sư tŏk tơ plĕnh thoi âu: “Inh oei hơdai hăm lu iĕm ling-lang truh năr tôch ning-mônh.” (Mathiơ 28:20). Noh jơ̆ nơ̆r pơchŭt, Kră Yang ling lang oei hơdai hăm bơ̆n, bơ̆jang hơdai hăm bơ̆n, ưh kơ đei la yơ ataih păng achăng lê̆ bơ̆n, athei pơkă hăm Kră Yang hăm tơduă bơ̆n lăm sơnăm ‘nao âu, rim ‘nu kơ lu bơ̆n athei iung rôp kơjăp Kră Yang păng nơ̆r Sư wang hơdai bơ̆jang kơ Kră Yang ‘Bok Kei-Dei.

Lu bơ̆n hăm băt ưh Kră Yang ling lang kơ oei hơdai hăm bơ̆n na bơ̆n đei jơhngơ̆m mơnơh kơ bơ̆jang kơ Kră Yang ưh?

Ơ Kră Yang, Inh bơnê kơ Ih yua kơ nơ̆r pơkă Ih ăn kơ inh đei jơhngơ̆m hiôk yua kơ Ih ling lang oei hơdai inh. Apinh Ih tơgŭm inh đĭ jơhngơ̆m bơ̆jang kơ Ih, ră roi tơdrong dŏng pơklaih Ih lăm sơnăm ‘nao âu hăm jơhngơ̆m pran đơ̆ng Ih ăn. Yua anăn Kră Yang Yêsu Krist. Amen.

Đŏk Sơ̆p hla bơar ‘Bok Kei-Dei lăm pêng sơnăm: II Samuel 24.

Kênh Youtube BHKTHN:

https://www.youtube.com/c/bhkthn

Bài trướcTa Sẽ Ở Cùng Con – 29/1/2025
Bài tiếp theoThơ: NĂM MỚI