Philêmôn trong 13-16
13 Inh oei lăm hnam phak kơlih inh bơtho tơdrong ‘nao ‘lơ̆ng Yêsu. Inh wă ră kơ Ônêsim oei păng inh khŏm khŏm tơdŏng tơdrong jang inh, sư jang tang ih kư̆m dang ih jang mơ̆n. 14 Mă-lei inh ưh kơ wă pơgŏ ih athei ih ăn kơ Ônêsim oei tơ âu khŏm khŏm wă bơ̆jang kơ inh ôh. Dah inh pơgŏ ih, na ih kư̆ kơ pơm kiơ̆ yua kơ ih lui yom kơ inh pơgŏ ih đĕch ‘noh. Dah inh ưh kơ pơgŏ ih dah wơh ih, na ih tơdŏng hloi tơdrong jang inh, ‘noh inh băt kơ ih đei đon ‘mêm mơnat kơ inh tơpă, na ih tơdŏng. 15 Ônêsim jăk đơ̆ng ih ưh kơ đunh ôh na rŏ-lăng ‘Bok Kei-Dei ăn thoi noh wă kơ sư tơ’bơ̆p inh na lui kơ Yêsu Krist. Yua kơ sư lui boih, na dang ei sư wă wih oei păng ih ling lang. 16 Thoi noh dang ei ih lăng sư ‘nĕ mah dang sư đĭch ih mă adrol sơ̆ hŏ. Dang ei sư đĭch ih mơ̆n, mă-lei inh wă kơ ih lăng sư thoi lĕ kơ oh ih tơnơm. Sư jing oh ih boih, sư oh inh mơ̆n mă inh ‘mêm kơdih tơpă. Mă-lei ih ‘mêm mơnat kơ sư hloh kơ inh mơ̆n kơlih sư bơngai jang kơ ih păng sư kư̆m oh ih mơ̆n, yua kơ sư kư̆m lui kơ Kră Yang Yêsu Krist.
Trong tơm ‘bai pơhrăm ‘nâu:
“Mă-lei inh ưh kơ wă pơgŏ ih athei ih ăn kơ Ônêsim oei tơ âu khŏm khŏm wă bơ̆jang kơ inh ôh. Dah inh pơgŏ ih, na ih kư̆ kơ pơm kiơ̆ yua kơ ih lui yom kơ inh pơgŏ ih đĕch ‘noh. Dah inh ưh kơ pơgŏ ih dah wơh ih, na ih tơdŏng hloi tơdrong jang inh, ‘noh inh băt kơ ih đei đon ‘mêm mơnat kơ inh tơpă, na ih tơdŏng.” (Philêmôn trong 14)
Nơ̆r jet tơchĕng pơwao:
– Yua kơ kiơ ‘bok Pôl ba ‘bok Ônêsim tơ Philêmôn?
– ‘Bok Philêmôn đei kiơ kơplah sư băt mơnat ăn tơpă?
– Nơ̆r Kră Yang pơlung lu bơ̆n athei mơnat ăn kơ ‘nhŏng, mŏ, oh bơ̆n kơplah lu sư tơbral thoi yơ?
Kơkuh kơ đĭ đăng,
Hăm tơdrong ‘mêm ‘măn kơ kon gah bơhngol yua kơ đe rơneh sư lăm pơmat tat, păng wă kơ đei bơngai tơgŭm bơ̆n, trŏ sư ‘bok Pôl ưh kơ gơh ba Ônêsim tơ Philêmôn, sư khan: “Inh oei lăm hnam phak kơlih inh bơtho tơdrong ‘nao ‘lơ̆ng Yêsu. Inh wă ră kơ Ônêsim oei păng inh khŏm khŏm tơdŏng tơdrong jang inh, sư jang tang ih kư̆m dang ih jang mơ̆n.” (trong 13). Mălei sư athei ba Ônêsim wih brŏk păng đĭ jơhngơ̆m apinh ‘bok Philêmôn ưh kơ sĭ ‘mêm mơnat păng sơng iŏk Ônêsim thoi minh ‘nu bơngai đĭch ôn klĕnh na jing thoi minh ‘nu ‘nhŏng oh lăm Kră Yang Yêsu Krist, ‘bok Pôl hơpơi ‘bok Philêmôn băt mơnat ăn tơpă kơ ‘bok Ônêsim ưh kơ trŏ khan pơgŏ dah yua kơ sư đĕch dah hăm tơdrong kiơ nai.
Arih hơdai băl, kon bơngai bơ̆n đei mă bu bu kư̆m dai đei glăi ngăl păng gô đei glăi hăm bơngai nai mơ̆n, na bơ̆n athei pŭ iŏk noh tơdrong tơ’bưh răm rai. Lu tơdrong glăi ‘bok Ônêsim đei pơm glăi đei ‘mong ăn tơdrong kơdâu klĕnh đơ̆ng ‘bok Philêmôn păng tơdrong juăt, mălei ‘Bok Kei-Dei gơh pơm tôm tơdrong păng lơ bơngai wă pơyua kơ tơdrong jang Kră Yang hăm tơdrong ‘lơ̆ng Kră Yang, sư ăn phep ‘bok Ônêsim ataih đơ̆ng Philêmôn wă tơ’bơ̆p ‘bok Pôl păng lui sơng iŏk Kră Yang Yêsu, wă pơyua kơ Tơdrong ‘Nao ‘Lơ̆ng Kră Yang. ‘Bok Kei-Dei kư̆m yua ‘bok Pôl tơgŭm ‘bok Philêmôn athei mơnat păng ‘mêm kơ Ônêsim. “Thoi noh dang ei ih lăng sư ‘nĕ mah dang sư đĭch ih mă adrol sơ̆ hŏ. Dang ei sư đĭch ih mơ̆n, mă-lei inh wă kơ ih lăng sư thoi lĕ kơ oh ih tơnơm. Sư jing oh ih boih, sư oh inh mơ̆n mă inh ‘mêm kơdih tơpă. Mă-lei ih ‘mêm mơnat kơ sư hloh kơ inh mơ̆n kơlih sư bơngai jang kơ ih păng sư kư̆m oh ih mơ̆n, yua kơ sư kư̆m lui kơ Kră Yang Yêsu Krist.” (trong 16 BTTHĐ). Kơplah mơnat ăn, ‘bok Philêmôn ưh kơ sĭ ưh kơ đei đơ̆ng bơngai đơ̆ng pơm đĭch mă đêl hiong bơih, păng hloh kơ noh dơ̆ng, đei thim dơ̆ng minh ‘nu ‘nhŏng oh ‘mêm kơeng lăm Kră Yang Yêsu Krist.
Nơ̆r Kră Yang đei pơlung kăl kơ đei jơhngơ̆m mơnat kơ ‘nhŏng, mŏ, oh bơ̆n kơplah lu sư tơbral tơdrong glăi lu sư pơm. Dah lu bơ̆n ưh kơ mơnat, wă khan lu bơ̆n oei ưh kơ hiơ̆k lăng ‘bôh akâu ‘bok Krist đei tơklah. Kră Yang ưh kơ wă tơdrong noh truh. Bơ̆n bơngai lui bơih đei Kră Yang Yêsu dŏng pơklaih hăm akâu jăn Sư kơdih, lei na athei băt ‘mêm mơnat noh bơih tơdrong tơm kăl “Mă-lei inh ưh kơ wă pơgŏ ih athei ih ăn kơ Ônêsim oei tơ âu khŏm khŏm wă bơ̆jang kơ inh ôh. Dah inh pơgŏ ih, na ih kư̆ kơ pơm kiơ̆ yua kơ ih lui yom kơ inh pơgŏ ih đĕch ‘noh. Dah inh ưh kơ pơgŏ ih dah wơh ih, na ih tơdŏng hloi tơdrong jang inh, ‘noh inh băt kơ ih đei đon ‘mêm mơnat kơ inh tơpă, na ih tơdŏng.” (trong 14). Dah lu bơ̆n oei arăng jơhngơ̆m ưh kơ mơnat ăn yoch, lei Kră Yang oei gơh pơgơ̆r đĭ đăng lăm tôm tơdrong ‘lơ̆ng kiơ̆ thoi Kră Yang wă yua pơjing akâu jăn Yêsu Krist.
Lu bơ̆n pôm đon lăm tơdrong krao khan,
Kơkuh kơ Kră Yang, inh bơnê kơ Ih mă khan tơdrong yoch inh ‘brê ‘breo, na Ih kư̆m lăp đon lôch tang inh wă kơ inh ‘lơ̆ng rơgoh thoi prĕl. Apinh Ih tơgŭm inh đei tơdrong ‘mêm mơnat, băt mơnat kơ bơngai mă pơm kơ inh sơ’ngon. Krao khan yua anăn Kră Yang Yêsu Krist, Amen.
Ơ đĭ đăng bơngai mơ̆ng mă ‘mêm kơeng,
Lu bơ̆n athei băt mơnat kơ ‘nhŏng, mŏ, oh hăm jơhngơ̆m thoi yơ?
‘Nhŏng oh băt mơnat dih băl
Bơ̆n jing kon Kră Yang bơih pă đei hlĭch kiơ dơ̆ng
Tơdrong ‘mêm Kră Yang tih dêh
Arih kiơ̆ kơmĭl Kră Yang, chih răk lăm jơhngơ̆m
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 18
Kênh Youtube BHKTHN:
