Yakơ 4:13-16
“Na iĕm kuă kơ kiơ kơ pơma thoi âu trŏ: “Dah ‘Bok Kei-Dei oei ăn kơ bơ̆n arih, bơ̆n gơh jang sa tơdrong âu tơdrong to.” (Yakơ 4:15)
Nơ̆r jet tơchĕng pơwao:
– Lu bơngai jang chă mơdro sa hơmet kơ tơdrong tơ anăp ning mônh thoi yơ?
– Yua kơ kiơ tơdrong ‘nâu jing tơdrong yoch lăm chăl arih?
– Bơngai lui athei pơm kiơ kơplah tơchĕng tơ anăp ning mônh?
Lu bơngai Juđê hlôi kơ lơ jơ hnơr đei tơdrong arih chă mơdro sa lu bơngai lui lăm mơjĭt khul đe pơm kơnê̆ jing tơklah tơklang jơ̆p jang anih kư̆m đei lơ bơngai chă mơdro sa. Lu bơngai ‘nâu tơchĕng gah tơ anăp tơdă hơmet: “Năr âu dah năr dơning bơ̆n năm tơ pơlei to chă mơdro sa, kơtĕch kơ minh sơnăm bơ̆n đei lơi dêh” (trong 13). Dah hơmet lê̆ kơ tơ anăp ưh kơ glăi ôh. Ưh kơ đei minh ‘nu bơngai gơh hơgei păng đei tơdrong jang hiơ̆k ayơ mă ưh kơ đei hơmet lê̆ adrol. Kră Yang Yêsu kư̆m pơma kơ tơdrong gĭt kăl tơdrong jang ‘nâu: “Pơtih gia dah iĕm wă pơm hnam tih kơjung, lei iĕm athei tơchĕng lăng hơdrol ‘mơ̆i wă kơ băt huach dôm yơ, hli kơ jên iĕm ưh kơ mah kơ wă pơm.”(Luka 14:28).
Tơdrong hơmet lê̆ tơ anăp noh kăl, mălei tơdrong ‘nâu gơh jing minh tơdrong yoch lăm chăl arih. ‘Noh kơplah bơ̆n lăng bơ̆n kơdih nhen thoi bơngai pơgơ̆r tơdrong arih bơ̆n kơdih păng achăng lê̆ ‘Bok Kei-Dei, na “iĕm ưh kơ băt kơ năr dơning iĕm thoi yơ!” (Yakơ 4:14). ‘Noh kơplah bơ̆n pơang tơdrong kĕ pran bơ̆n kơdih, khan tơdrong bơ̆n kĕ jei păng ưh kơ kĕ jei ‘noh đơ̆ng bơ̆n kơdih (trong 16). ‘Noh bơih kơplah bơ̆n lăng tơdrong arih lăm chăl ‘nâu thoi anih bơ̆n arih ling lang mă bơ̆n ưh kơ băt tơdrong arih lăm chăl ‘nâu noh tơdrong arih pơdơh đĕch, “Thoi lĕ kơ tŭk, dang ei bơ̆n oei ‘bôh sư gom kông, pă ‘biơ̆ kơ noh ưh pă ‘bôh kiơ dơ̆ng” (trong 14).
Thoi noh, tơdrong ưh kơ sĭ “hăm kăl hơmet lê̆ ưh?” na “kăl kơ hơmet lê̆ thoi yơ?” jing Bơngai Lui, bơ̆n kăl kơ hơmet lê̆ hăm jơhngơ̆m iŏk đon ala, gơnang kơ Kră Yang lăm tôm tơdrong, hăm tơchĕng ‘blŏk pơm thoi ‘Bok Kei-Dei wă ‘noh tơdrong tơm kăl kơ tơdrong hơmet lê̆, tơdrong tơdă kơ chăl arih, “dah ‘Bok Kei-Dei oei ăn kơ bơ̆n arih, bơ̆n gơh jang sa tơdrong âu tơdrong to” (trong 15). Hăm tơdrong tơchĕng ‘blŏk thoi noh, adrol bơ̆n krao khan kiơ̆ thoi Kră Yang krao khan kơ tơdrong jang bơ̆n wă jang, lăng lăng tơdrong kiơ Kră Yang lăp đon wă kơ bơ̆n pơm kiơ̆. Đơ̆ng noh dơ̆ng, athei pơting lăng tơdrong hơgăt kơ chăl arih ‘nâu wă hơmet lê̆ kơ tơdrong băt tơpă, lăp trŏ hăm tơdrong kĕ pran bơ̆n, păng huay kơ hmach kơ dôm tơdrong đêl hlôi bơih dah mă tơdrong hiơ̆k bơngơ̆t dêh gah tơdrong tơ anăp ning mônh. Tuch luch, athei gơnang kơ Kră Yang wă pơm dôm tơdrong kiơ mă bơ̆n đei dan hơmet lê̆, hăm jơhngơ̆m. “Mă tôm tơdrong jang, iĕm athei jang mă tơpă, jang hăm đĭ jơhngơ̆m, ‘nĕ kơ pơm đon, yua kơ iĕm jang wă pơhiôk Yŏng bơ̆n Yêsu Krist, ưh kơ sĭ iĕm jang wă pơhiôk kon bơngai đĕch ôh.” (Kôlôsse 3:23).
Kơkuh kơ Ih Kră Yang, apinh Ih mơnat kơ inh yua kơ lơ wơ̆t inh arih nhen thoi băt hơmet lê̆ kơdih tơdrong arih inh tơ anăp! Năr ‘nâu, inh dơ̆ng ‘bơ̆t anăp Ih, apinh Ih pơgơ̆r păng bơtho tơ’bôh kơ chăl arih inh. Apinh Ih ăn kơ dôm tơdrong hơpơi păng hơmet lê̆ kơ chăl arih inh lăp trŏ ‘lơ̆ng thoi Ih wă, wă kơ chăl arih gơh đei pơyua ăn kơ dêh char Ih ling lang. Yua anăn Kră Yang Yêsu Krist, Amen.
Bơ̆n hăm dan hơmet lê̆ kơ tơdrong arih bơ̆n tơ anăp, kiơ̆ thoi Kră Yang wă dah mă kiơ̆ trong ayơ nai? Bơ̆n oei yak năm hăm Kră Yang thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Ê-sai 49
Kênh Youtube BHKTHN:
