Mathiơ 21:12-13
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: Hnam Akŭm ‘Noh Hnam Krao Khan kiơ̆ kơ Sơ̆p Hla bơar ‘Bok Kei-Dei Mathiơ 21:12-13.
12 Yêsu mơ̆t tơ hnam akŭm ‘Bok Kei-Dei tơm, Sư ‘bôh đe mơdro lăm hnam noh, na Sư pơpuh tơlĕch lu đe mă mơdro noh, tơlơ̆ tơpơ̆k lu gơ’bang lu đe tơplih băl jên. Lu tangdŏ lu đe mă tĕch sem kơtơp Sư tơlơ̆ tơpơ̆k đĭ-đăng. 13 Sư khan kơ lu bơngai ei thoi âu: “Đe chih roi nơ̆r ‘Bok Kei-Dei lăm sơ̆p hla bơar Sư thoi âu: Hnam akŭm kơkuh kơ Inh wă lê̆ kơ đe krao khan kơ Inh lăm noh, Mă-lei iĕm mơdro lăm noh, pơgŏ athei đe răt kăp jên, iĕm pơm kơ hnam âu thoi lĕ kơ anih hnam đe tơtông klĕ.”
Trong tơm ‘bai pơhrăm ‘nâu:
“Sư khan kơ lu bơngai ei thoi âu: Đe chih roi nơ̆r ‘Bok Kei-Dei lăm sơ̆p hla bơar Sư thoi âu: Hnam akŭm kơkuh kơ Inh wă lê̆ kơ đe krao khan kơ Inh lăm noh, Mă-lei iĕm mơdro lăm noh, pơgŏ athei đe răt kăp jên, iĕm pơm kơ hnam âu thoi lĕ kơ anih hnam đe tơtông klĕ.” (Mathiơ 21:13)
Nơ̆r jet tơchĕng pơwao:
– Kră Yang Yêsu pơm kiơ tơ hnam akŭm Jêrusalem?
– Sư pơma hơđăl tơdrong kơnhăm tơm hnam akŭm noh kiơ?
– Đei tơ’blŏk kơ bơ̆n kiơ kơplah năm kơkuh kơ Kră Yang?
Kơkuh kơ đĭ đăng,
Đang kơ kon pơlei pơre ư-ang kơ Kră Yang Yêsu mơ̆t tơ pơlei Jêrusalem, năr đơ̆ng rŏng Sư năm tơ hnam akŭm. Tơ noh Kră Yang Yêsu đei “Pơpuh tơlĕch lu đe mă mơdro, tơlơ̆ tơpơ̆k lu gơ’bang đe tơplih băl jên, lu tang dŏ, lu đe mă tĕch sem kơtơp Sư tơlơ̆ tơpơ̆k đĭ đăng” (trong 12). ‘Nâu wơ̆t mă ‘bar Kră Yang Yêsu pơm tơdrong ‘nâu, wơ̆t mă mônh kơplah Sư wă pơtơm bơ̆jang (Yôhan 2:13-17). Lu bơngai mă mơdro tơ ‘nguaih cham hnam akŭm ‘noh ‘măn kơ lu bơngai tơmoi. Lu sư mơdro lu sem dơrong pơm tơmam soi kơ lu bơngai năm akŭm, lu sư tĕch kăp jên lơ dêh; tơdrong trŏ kơ pơma noh tơdrong mơdro sa ‘nâu ôn kơ ‘bok soi Ane! Kră Yang Yêsu yua nơ̆r “tơtông klĕ” wă pơma kơ bơngai mơdro tơ kơdeng gah ‘nguaih hnam akŭm lu sư pơm kơ anih noh kơnê̆ jing tơplih kơ anih kơkuh kơ Kră Yang.
Bơngai Juđê ưh kơ lăp đon kơ bơngai tơmoi, thoi noh lu sư ưh kơ hiơ̆k kơ lu bơngai tơmoi đei jơhngơ̆m ‘maih chă tơdrong Kră Yang wă kơ hlôh păng lu bơngai tơmoi kơkuh kơplah lu sư năm tơ hnam akŭm. Kră Yang Yêsu khan kơ lu bơngai Juđê thoi âu: “Sư khan kơ lu bơngai ei thoi âu: “Đe chih roi nơ̆r ‘Bok Kei-Dei lăm sơ̆p hla bơar Sư thoi âu: Hnam akŭm kơkuh kơ Inh wă lê̆ kơ đe krao khan kơ Inh lăm noh, Mă-lei iĕm mơdro lăm noh, pơgŏ athei đe răt kăp jên, iĕm pơm kơ hnam âu thoi lĕ kơ anih hnam đe tơtông klĕ.” (Mathiơ 21:13), Kră Yang đei pơma lăm Êsai 56:7 wă pơma hơđăl hnam Kră Yang ‘noh hnam krao khan kơ đĭ đăng bơngai, ưh kơ sĭ lăp lu bơngai Juđê đĕch mălei mă kon pơlei ayơ kư̆m gơh chă wă kơ hlôh gah Kră Yang păng krao apinh Kră Yang. Lăm âu, kon pơlei Juđê pơm kơ hnam Kră Yang jing “Hnam đe tơtông klĕ” thoi noh Kră Yang hil tơpă.
Lu kon pơlei Kră Yang dang ei kăl kơ băt thoi âu Hnam Kră Yang ‘Bok Kei-Dei ‘noh hnam krao khan. Khul bơngai lui kơ Kră Yang ‘noh anih rim bơngai năm tơ noh wă kơkuh păng pơma dơnuh hăm Kră Yang. Kon pơlei Kră Yang kăl kơ pơm tơ’bôh jơhngơ̆m lui yom kơ Kră Yang đơ̆ng nơ̆r pơma, jơhngơ̆m mơ̆ng nơ̆r Kră Yang, jơhngơ̆m ư-ang kơ Kră Yang. Hnăm akŭm khul bơngai lui noh kư̆m anih bơ̆n sơng iŏk lu bơngai buăl juăt năm akŭm gah tơdrong roi tơdrong ‘mêm Kră Yang Yêsu ‘măn kơ kon bơngai. Kơlih kơ thoi ei mă tơdrong ayơ wă pơgăn kon pơlei Kră Yang lăm tơdrong pơgơ̆p kơkuh kơ Kră Yang dah mă lu bơngai tam mă lui năm mơ̆ng nơ̆r Kră Yang kăl kơ tơ’blŏk wă hơmet păng hŭt lê̆. Lu bơngai tam mă lui kư̆m đei tơdrong pơgăn kơplah năm akŭm ưh kơ đei bơngai bu sơng iŏk, ưh kơ mơnat, dah mă pơma lu nơ̆r ưh kơ ‘mêm mơnat đơ̆ng tơduă bơngai lui lăm hnam akŭm. Athei ‘blŏk sơ̆ Kră Yang Yêsu đei pơma hơđal gah tơdrong pơgăn bơngai nai năm tơ hnam akŭm păng krao khan tơ’bưh hăm ‘Bok Kei-Dei lăm hnam Kră Yang, lei na dang ei kư̆m lei lăi. Rim ‘nu kơ bơ̆n athei pơ’lơ̆ng!
Lu bơ̆n pôm đon lăm tơdrong krao khan,
Kơkuh kơ Ih Kră Yang, inh bơnê kơ Ih yua kơ inh gơh rơngei wă kơkuh kơ Ih. Apinh Ih ăn kơ inh huay kơ đei nơ̆r pơma, pơm pơgăn ‘nhŏng, mŏ, oh inh lăm tơdrong kơkuh kơ Kră Yang. Apinh Ih tơgŭm inh ling lang ‘maih wă chă Kră Yang wă kơkuh kơ Ih. Krao khan yua anăn Kră Yang Yêsu Krist, Amen.
Ơ đĭ đăng lu bơngai mơ̆ng mă ‘mêm kơeng,
Hăm đei layơ bơ̆n pơm pơgăn lu bơngai nai lăm tơdrong kơkuh kơ Kră Yang ưh?
Gơh rơngei mơ̆t tơ lăm hnam ‘Bă
‘Noh Kră Yang hơlăng hơmrah
Ră roi anăn Kră Yang jơ̆p anih
‘Mêm mơnat, pơlung, krao lơ bơngai
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 13
Kênh Youtube BHKTHN:
