Klei Aê Diê Blŭ: Klei Kbiă 25:10-16.
Êlan kliăng: “Brei diñu ngă kơ kâo sa anôk doh jăk, čiăng kơ kâo dưi dôk ti krah diñu.” (Klei Kbiă 25:8)
Klei êmuh ksiêm mĭn: Hip klei bi mguôp srăng dưi ngă ƀhĭ klĭ si ngă? Mnơ̆ng mkra mjing, klei mkra mjing leh anăn klei bi mguôp dưm hlăm lam brei drei thâo si ngă Aê Diê hŏng phung ƀuôn sang Ñu? Ya klei mñă kơ drei mơ̆ng klei hriăm hruê anei?
Aê Diê mâo asăp mtrŭn kơ phung ƀuôn sang Ñu ngă Hip klei bi mguôp ƀhĭ klĭ kơ boh prŏng, mnơ̆ng pioh mkra mjing leh anăn ya mnơ̆ng dưm hlăm lam. Anăn jing sa Hip hŏng kyâo hŏng kyâo akasi; awan ñu dua heh mkrah, găn ñu sa heh mkrah, leh anăn boh dlông ñu sa heh mkrah (sa heh hlăk anăn hlăm brô 44-45cm), dưi luôm hŏng mah doh hlăm lam leh anăn nah êngao, êlan griŏ kmăn jŭm dar hŏng mah. Brei ngă pă kwang hŏng mah dưm ti pă ƀĕ jơ̆ng hip, sa nah dua kwang, leh anăn sa nah mkăn dua kwang mơh. Brei ngă giê kkung hŏng kyâo akasi luôm hŏng mah; leh anăn hrô giê hlăm ƀăng kwang ti djiêu hip anăn čiăng kkung ñu. Giê anăn brei dưm nanao hlăm ƀăng kwang ti hip; arăng amâo srăng suê̆ hĕ digơ̆ ôh (êlan 10-15).
Akasi jing mta ana đĭ kyar ti krĭng lăn khăng; kyâo akasi khăng snăk leh anăn kjăp, mâo êa mil hrah mngač. Anei jing mta mnơ̆ng rŭ mdơ̆ng yuôm hĭn leh anăn djŏ guôp hĭn čiăng mjing dŭm kdrêč dưi krơ̆ng kjăp hlăm boh sang. Mah jing sa mta yuôm, bi hmô kơ sang mtao. Anôk mơ̆ng Aê Diê dôk brei dưi mkra hŏng mah doh, amâo bi luk hŏng êa kông amâodah dŭm mta mnơ̆ng mkăn ôh. Dŭm mta mnơ̆ng yuôm bhăn hŏng hnơ̆ng jăk mrô sa dưi yua pioh mkra mjing Hip klei bi mguôp, anôk Aê Diê srăng dôk čiăng lač hŏng Y-Môis. Klei anei brei drei ƀuh Aê Diê jing Pô prŏng hĭn leh anăn myang hĭn, Ñu dôk ti anôk yuôm bhăn leh anăn kdrưh kơang hĭn.
Hip Klei bi mguôp mâo pă kwang hŏng mah dưm ti pă ƀĕ jơ̆ng hip leh anăn giê kkung dưm nanao hlăm ƀăng kwang ti hip čiăng kơ mnuih amâo dưm bi sô̆ ôh hlăm Hip klei bi mguôp sĭt kkung. Kyua Aê Diê doh jăk kluôm dhuôm bi anak mnuih jing phung soh jhat anăn amâo mâo ôh hlei pô dưi bi sô̆ ti anôk Aê Diê dôk. Klei mkra mjing Hip klei bi mguôp mâo kwang leh anăn giê kkung snăn čiăng kơ phung ƀuôn sang Aê Diê ruah dưi kkung hiu Hip mbĭt hŏng diñu sĭt nao mơ̆ng anôk anei truh kơ anôk mkăn. Klei anei brei ƀuh wăt tơdah Aê Diê jing doh jăk ƀiădah Ñu ăt hrăm mbĭt hŏng phung ƀuôn sang Ñu leh anăn ti krah phung ƀuôn sang Ñu ruah leh.
Hlăm lam Hip klei bi mguôp mâo sa mta mnơ̆ng yuôm bhăn snăk jing klei bi mklă. Klei bi mklă jing dua boh tâo čih Pluh Mta Klei Bhiăn Aê Diê srăng brei kơ Y-Môis leh anăn (êlan 16). Snăn klei bi mguôp plah wah Aê Diê hŏng phung ƀuôn sang Aê Diê ruah Israel jing mơ̆ng klei bhiăn Aê Diê, tur knơ̆ng mơ̆ng klei bhiăn Aê Diê jing Pluh Mta Klei Bhiăn klă klơ̆ng. Hlăm klei bi mguôp anei, phung ƀuôn sang Aê Diê brei jih hnơ̆ng kriê pioh Pluh Mta Klei Bhiăn leh anăn Yêhôwa Aê Diê srăng jing Mtao ti krah diñu. Klei hriăm mñă kơ drei bi mni nanao kơ Aê Diê kyua hruê anei drei dưi dôk hlăm klei bi mguôp mrâo hlăm êrah Khua Yang Yêsu. Grăp hruê brei hdĭp năng hŏng klei Aê Diê brei.
Drei thâo mơ̆ Aê Diê doh jăk dôk hlăm drei?
Ơ Khua Yang, Mtao kơ phung mtao, Khua Yang kơ jih jang yang. Kâo bi mni lač jăk kơ Ih êdimima kyua Ih doh jăk tŭ djiê hrô kơ klei soh kâo. Akâo kơ Ih răng mgang kâo hlăm klei bi mguôp mrâo hlăm êrah Anak Aê Diê, đru kâo grăp hruê mpŭ mni kơ Ih leh anăn jing msĕ si Ih hĭn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 15
Kênh Youtube BHKTHN:
