Klei Aê Diê Blŭ: I Kôrantô: 14:1-5
Êlan kliăng: “4Hlei pô blŭ klei blŭ amâo mâo pô thâo đru ñu pô, ƀiădah hlei pô hưn êlâo đru Phung Sang Aê Diê. 5Kâo čiăng kơ jih jang diih blŭ klei blŭ amâo mâo pô thâo, ƀiădah kâo čiăng hĭn diih blŭ klei hưn êlâo…” (I Kôrantô 14:4-5a).
Klei êmuh ksiêm mĭn: Ya klei Khua ƀĭng kna Y-Pôl hmăng hmưi? Si ngă ñu lač phung hưn êlâo yuôm bhăn hĭn kơ phung blŭ klei tue? Ya bruă klam Khua ƀĭng kna Y-Pôl mñă hlăm Sang Aê Diê? Ya klei drei srăng đru mguôp čiăng rŭ mdơ̆ng Sang Aê Diê?
Leh bi êdah dŭm klei bi knăl mơ̆ng klei brei thâo blŭ klei tue leh anăn hưn êlâo, khua ƀĭng kna Y-Pôl lač, “5Kâo čiăng kơ jih jang diih blŭ klei blŭ amâo mâo pô thâo, ƀiădah kâo čiăng hĭn diih blŭ klei hưn êlâo” (êlan 5a). Hlăm Klei Aê Diê Blŭ, klei blŭ hưn êlâo jing bi êdah Klei Aê Diê Blŭ amâo hưn mthâo klei bi êdah mơ̆ng Aê Diê tui hlue klei bi hriăm mơ̆ng Yang Mngăt Jăk, msĕ si phung khua pô hưn êlâo hlăm ênuk Klei Bi Mguôp Hđăp jing phung mâo bruă klam bi êdah klă mngač Klei Aê Diê mtă kơ diñu. Kyua khua pô hưn êlâo blŭ klei blŭ anak mnuih, sơnăn ênưih thâo săng, kyuanăn dưi mâo klei “… hriê kơ prŏng, bi mđĭ ai diñu, leh anăn bi juh diñu” (êlan 3). Bi phung blŭ klei tue tơdah amâo mblang klă srăng mkŏ mjing knŏng kơ pô, khădah mnuih blŭ klei tue amâo săng ôh boh tŭ dưn, diñu thâo mâo Yang Mngăt Jăk dôk mbĭt leh anăn brei diñu blŭ, ƀiădah phŭng đăo hmư̆ amâo săng ôh, kyuanăn amâo dưi rŭ mdơ̆ng ôh sang Aê Diê. Kyuanăn, Khua ƀĭng kna Y-Pôl lač leh: “Hlei pô hưn êlâo jing yuôm hĭn kơ pô blŭ klei blŭ amâo mâo pô thâo, knŏng tơdah mâo pô mblang brei, čiăng kơ Phung Sang Aê Diê dưi mâo klei mđĭ ai” (êlan 5b). Ñu amâo bi mkă ôh klei brei thâo hưn êlâo yuôm bhăn hĭn kơ klei blŭ klei tue, khădah klei blŭ klei tue amâo mâo mblang ôh kơ sang Aê Diê thâo săng leh anăn dưi rŭ mdơ̆ng, mnuih anăn amâo srăng yuôm bhăn msĕ hŏng pô blŭ klei hưn êlâo. Klei yuôm bhăn amâo djŏ mơ̆ng ya klei brei ôh ƀiădah kyua klei brei anăn ba klei rŭ mdơ̆ng sang Aê Diê amâo dah hơaĭ.
Snăn, jih dua klei brei thâo blŭ klei blŭ klei tue leh anăn hưn êlâo kbiă hriê mơ̆ng Yang Mngăt Jăk sơaĭ. Khădah phung đăo ti Kôrantô mjhua klei brei thâo blŭ klei tue ba klei rŭng răng hlăm mông kkuh mpŭ kơ Aê Diê, êngao kơ năn diñu mgao hlăm klei hdĭp myang kyua mĭn pô mâo klei brei thâo blŭ klei tue bi mnuih mkăn amâo mâo ôh. Snăn tơdah mâo mnuih thâo klei blŭ klei tue hlăm sang Aê Diê ƀiădah amâo thâo mblang ôh, jing diñu dôk bi mni kơ diñu pô, amâo djŏ mpŭ kơ Aê Diê ôh.
Sa blư̆ dơ̆ng, drei ƀuh Khua ƀĭng kna Y-Pôl mñă klă hdră kñăm klei Aê Diê brei kơ phung đăo hlăm Sang Aê Diê jing čiăng bi đru hdơ̆ng pô, anăn ăt jing mta phŭn ñu čang hmăng jih jang phung đăo ti Kôrantô mâo klei brei thâo blŭ hưn êlâo. Tơdah grăp čô yua klei Aê Diê brei čiăng mđĭ ai, bi đru ayŏng adei mkăn hlăm Sang Aê Diê srăng dưi mđĭ ai leh anăn Yang Krist srăng mâo klei mpŭ mni.
Drei mđing mơ̆ kơ bruă klam hdơ̆ng bi rŭ mdơ̆ng hlăm Sang Aê Diê mơ̆ng klei Aê Diê brei?
Ơ Yang Mngăt Jăk Aê Diê! Bi mni lač jăk kơ Ih kyua brei leh klei thâo mơ̆ng Ih kơ phung đaŏ kơ Ih, dưi mâo klei tŭ dưn leh anăn dưi mđĭ ai. Akâo kơ ih đru kâo ba yua dŭm klei Ih brei čiăng đru kơ lu mnuih hlăm Sang Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 14:11-38
Kênh Youtube BHKTHN:
