Mathais 12:33-37
Nqe cim:
“Tus neeg siab zoo yeej hais tej lus zoo. Tus neeg siab phem yeej hais tej lus phem, rau qhov nws lub siab xav li cas, nws lub ncauj hais li ntawd.” (Lukas 6:45).
Lus nug rau sawvdaws xav:
- Tswv Yexus hais txog qhov sib txuas ntawm kev hais lus thiab lub siab zoo li cas?
- Nws siv ob tug duab dabtsi los pivtxwv?
- Tswv Yexus ceebtoom li cas txog tej uas peb hais txhua hnub?
- Yuav ua li cas kom peb hais thiab ua tau tej uas zoo?
Thaum cov neeg Falixais tsis lees Tswv Yexus lub hwjchim ntiab tau dab thiab nkaug hais tias tus Tswv siv hwjchim dab los ntiab dab (Mathais 12:22-32), Tswv Yexus thiaj siv ob daim duab los pivtxwv qhia paub lawv lub siab. Daim duab tim ib, tus Tswv hais tias “saib txiv ces paub tsob ntoo”, lawv lub siab yeej phem yog li tsis muaj leejtwg yuav tau txais qhov kev zoo ntawm lawv li. Daim duab tim ob, tus Tswv hais tias lawv yog cov niag nab, tus yamntxwv txhaum yog li lawv hais tsis tau yam zoo thiab muaj nqis. Yauhas tus uas muab neeg ua kevcai raus dej kuj cem cov neeg Falixais thiab cov Xadukais li ntawd (Mathais 3:7).
Tswv Yexus hais txog cov neeg Falixais lub neej sab ntsujplig, tsis yog hais lus txhaum Vajtswv xwb tiamsis hauv lawv lub siab muaj qhov phem, qhov kev phem ntawd qhia tshwm los ntawm tej lus lawv hais. Muaj tseeb li ntawd, “rau qhov nws lub siab xav li cas, nws lub ncauj hais li ntawd.” tus Tswv kuj ceebtoom rau lawv paub txog nqi zog ntawm tej lus hais, vim lawv yuav tau mus sawv ntawm Vajtswv lub rooj txiav txim ris lawv feem xyuam. Los ntawm tej lus hais, lub neej yuav raug txiav txim, ncaj ncees lossis rau txim.
Dhau los ntawm ntu Vajluskub no, Vajtswv Txojlus qhia rau peb hais tias tus yamntxwv sab hauv txiav txim siab rau kev hais lus lossis kev ua haujlwm ntawm ib tug neeg. Peb yuav zais tsis tau lossis npog tsis tau tus yamntxwv phem ntawd li, rau qhov nws yuav xwbtim qhia tshwm los ntawm peb tej lus hais thiab kev ua haujlwm. Tsuas yog thaum peb ntseeg Yexus thiab mloog Nws lus ces Nws yuav hloov peb tus yamntxwv phem, lub sijhawm ntawd peb thiaj hais tau thiab ua tau tej uas zoo. Tej zaum nimno tsis tau muaj leejtwg paub peb tus yamntxwv tiag, tiamsis cia li nco ntsoov hais tias tsis ntev xwb peb tus yamntxwv tsis zoo yuav qhia tawm zais tsis tau li. Tswv Yexus kuj ceebtoom hais tias tagnrho tej lus uas peb hais tsis zoo li nthwv cua ya mus, tiamsis peb yuav tsum muaj feem xyuam rau yus cov lus hais. Ntawm Vajtswv lub rooj txiav txim ncaj ncees, txhua yam phem yuav raug qhia tawm tagnrho. Tus Tswv xav kom peb lees txim kom Nws hloov tau peb tus yamntxwv zoo ib yam li I Yauhas 1:9 hais: “yog peb lees peb tej kev txhaum rau Vajtswv, Vajtswv yog tus ncaj ncees, nws yuav ua raws li nws tau coglus tseg lawm, nws yuav zam peb tej kev txhaum thiab nws yuav ntxuav peb tej kev txhaum huv tibsi mus.”
Thov Vajtswv,
Tus Tswv, thaum nyuam yaus nyeem Koj Txojlus, thov Koj qhia nyuam yaus, paub lees txim kom Koj hloov tau nyuam yaus hais tej lus zoo thiab ua los ntawm tus yamntxwv uas Koj pub. Amees.
Peb twb txaus siab cia tus Tswv hloov peb tus yamntxwv phem lawm tau?
Nyeem Vajluskub hauv peb lub xyoo: Hauxeyas 9:10-10:15
Kênh Youtube BHKTHN:
