Klei Aê Diê Blŭ: Klei Bi Hriêng 12:8-12
Êlan kliăng: “Msĕ si kâo duah bi mơak kơ jih jang mnuih hlăm djăp mta klei kâo ngă, amâo duah klei jăk kơ kâo pô ôh, ƀiădah klei jăk kơ lu mnuih, čiăng kơ diñu dưi tlaih.” (I Kôrantô 10:33).
Klei êmuh ksiêm mĭn: Ya bruă ngă Mtao Y-Salômon bi hriăm anak dưi bi mni leh anăn ya bruă ngă arăng bi êmut, mưč mač? Mta kñăm mơ̆ng Mtao Y-Salômôn čiăng đru kơ phung anak ruah ya mta klei? Ya ngă brei drei hdĭp bi êdah klei thâo mĭn hlăm klei blŭ, bruă ngă leh anăn knhuah hdĭp jăk?
Mtao Y-Salômôn bi hriăm drei thâo dŭm mta bruă ngă dưi bi mni mklăk hŏng dŭm bruă mă arăng bi êmuh. Čiăng dưi bi mni, brei nak hdĭp thâo mĭn. Dŭm bruă anak ngă brei bi êdah klei thâo săng leh anăn klă mngač Aê Diê. Anak wăt tơdah amâo hing ang ôh snăn ăt brei jing mnuih jăk. Brei anak hdĭp thâo luă gŭ leh anăn gĭr mă bruă. Tơdah anak gĭr kuai lăn pô, anak srăng mâo mnơ̆ng ƀơ̆ng huă êbeh dlai. Êngao anăn, anak ăt ngă tăp mđơr wăt hŏng mnơ̆ng pô rông. Tơdah hlô mnơ̆ng anak ba klei tŭ dưn kơ anak, snăn ăt brei anak răng kriê leh anăn kriê pioh diñu. Brei anak hdĭp mâo klei thâo săng kơ klei bhiăn mâo leh snei: “agha phung kpă ênô srăng mboh lu” čiăng hdĭp jăk. Anak čiăng mâo mlâo biăp snăn brei rông ba, kriê dlăng êpul biăp, anak čiăng anah mboh, brei anak kriê dlăng ana mâo agha kjăp leh anăn đĭ yar jăk.
Mklă wĭt tơdah anak mâo klei mĭn jhat, hdĭp amâo thâo mĭn, kƀah klei thâo săng snăn arăng dlăng kơ anak hơaĭ mang. Anak srăng tŭ klei arăng mưč mač, mgao ƀiădah kƀah mnơ̆ng ƀơ̆ng, sĭt čiăng mă mlâo ƀiăp ƀiădah jing bi mdjiê êpul biăp, tơdah alah amâo gĭr mă bruă ƀiădah khăp duah mnơ̆ng dhơ̆ng amâo yuôm bhăn.
Dŭm klei mtô mơ̆ng Mtao Y-Salômôn jing sĭt. Ñu bi hriăm anak thâo ruah klei hdĭp thâo mĭn hlăm klei hdĭp anei, thâo kơ bruă ngă tŭ dưn, leh anăn đru anak djă pioh kjăp knhuah hdĭp jăk čiăng dưi hdĭp bi guh kơang Anăn Aê Diê mbĭt anăn ăt bi mơak kơ mnuih mơh.
Jing phung đaŏ kơ Krist, drei mâo djŏ knŏng brei hdĭp čiăng dưi bi mni amâodah hdĭp bi mơak kơ grăp čô mnuih ôh, ƀiădah klei hdĭp drei lŏ bi êdah klei kpă ênô, doh jăk mơ̆ng Aê Diê čiăng Anăn Ñu dưi mpŭ ni. Drei amâo djŏ knŏng hdĭp tŭ dưn kơ pô ôh ƀiădah kyua klei tŭ dưn kơ mngăt pô mkăn. Khua ƀĭng kna Y-Pôl lač: “Snăn thâodah diih ƀơ̆ng huă mnăm, amâodah ya klei diih ngă, ngă bĕ jih čiăng bi guh kơang kơ Aê Diê. Đăm bi têč hnêč ôh kơ phung Yuđa, kơ phung Grĕk, amâodah kơ Phung Sang Aê Diê, 33msĕ si kâo duah bi mơak kơ jih jang mnuih hlăm djăp mta klei kâo ngă, amâo duah klei jăk kơ kâo pô ôh, ƀiădah klei jăk kơ lu mnuih, čiăng kơ diñu dưi tlaih.” (I Kôrantô 10:31-33). Akâo kơ Aê Diê brei kơ drei thâo knang kơ Aê Diê grăp hruê, hdĭp bi êdah klei thâo mĭn hlăm klei blŭ, bruă ngă leh anăn klei hdĭp jăk mơ̆ng drei.
Klei hdĭp drei ba klei hưn ktưn kơ gŏ sang, Sang Aê Diê leh anăn bi guh kơang Anăn Aê Diê mơ̆?
Ơ Khua Yang, kâo bi mni lač jăk kơ Ih bi hriăm leh kâo klei hdĭp thâo mĭn čiăng bi guh kơang Anăn Ih leh anăn bi mơak kơ phung mkăn. Akâo kơ Ih đru kâo thâo kral leh anăn bi mlih bruă ngă, klei mĭn amâo bi mơak kơ Ih čiăng đru kơ lu mnuih thâo ƀuh Aê Diê hlăm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 8
Kênh Youtube BHKTHN:
