Klei Aê Diê Blŭ: II Têsalônik 1:11-12
Êlan kliăng: “Kơ klei anăn hmei wah lač nanao kyua diih, čiăng kơ Aê Diê srăng mjing diih năng kơ klei Ñu iêu leh anăn dưi bi sĭt jih klei čiăng jăk leh anăn bruă klei đăo hŏng klei myang Ñu” (II Têsalônik 1:11).
Klei êmuh ksiêm mĭn: Ya phŭn knhal klei khua ƀĭng kna Y-Pôl brei ƀuh kơ klei ñu wah lač kơ phung đăo ti Têsalônik? Si knhuah dôk hdĭp brei diñu mâo, čiăng dưi dôk hdĭp năng hŏng klei Aê Diê iêu pioh leh kơ diñu? Si drei dôk hdĭp čiăng năng kơ Khua Yang?
Hlăm hră čih kơ phung đăo ti Têsalônik, lu bliư̆ khua ƀĭng kna Y-Pôl bi mni kơ klei đăo diñu (I Têsalônik 1:2-7; II Têsalônik 1:3-4). Hlăm kdrêč 11, leh bi êdah kơ klei srăng truh, Khua Yang Yêsu srăng lŏ hriê čiăng phat kđi phung amâo mâo đăo, leh anăn kơ klei phung doh jăk dôk mdei tlaih leh mơ̆ng klei knap mñai (êlan 7-10), lŏ sa bliư̆ dơ̆ng ñu brei kơ digơ̆ thâo, ñu srăng “wah lač nanao kyua diih” (êlan 11) čiăng kơ digơ̆ dưi djă pioh klei đăo kơ Aê Diê tơl truh knhal tuč leh anăn năng kơ klei Ñu iêu pioh leh kơ digơ̆.
Khua ƀĭng kna Y-Pôl wah lač leh anăn hmăng hmưi kơ diñu dôk hdĭp tui si klei iêu leh kyua klei pap leh anăn klei khăp Aê Diê. Ñu brei thâo: “Aê Diê brei kơ diih klei năng kơ ƀuôn ala mtao Aê Diê, kyua ƀuôn ala mtao anăn diih dôk tŭ klei knap mñai” (II Têsalônik 1:5). Tui tluôn anăn, khua ƀĭng kna Y-Pôl wah lač kơ diñu dưi mâo ai mĭn khut khat, mă tŭ klei myang mơ̆ng Aê Diê čiăng dưi bi sĭt jih klei čiăng jăk Ñu. Boh blŭ “klei čiăng jăk” (êlan 11) leh anăn “êmhač” hlăm Galati 5:22, hlăm klei blŭ phŭn klei Grek jing agathōsunē sơăi. Đa đa hră mkăn mblang “jăk siam”, “jăk” amâodah “kpă ênô”. Jih jang ăt msĕ sa klei mblang sơăi, Aê Diê drei jing Pô Klei Jăk leh anăn jăk êmhač, kyuanăn Ñu čiăng kơ phung anak Ñu dôk hdĭp êmhač msĕ mơh, bi êdah klei jăk êmhač leh anăn klei jăk Ñu kơ jih jang mnuih. Phung đăo brei dôk hdĭp năng kơ Khua Yang kyua klei đăo, bi êdah hŏng bruă jăk siam.
Ti knhal tuč, khua ƀĭng kna Y-Pôl hmăng hmưi kơ Anăn Aê Diê mâo klei guh kơang hŏng “bruă klei đăo” mơ̆ng phung đăo ti Têsalônik. Dôk hdĭp năng jing hdĭp “čiăng kơ anăn Khua Yang drei Yêsu dưi mâo klei guh kơang hlăm diih, leh anăn diih mâo klei guh kơang hlăm Ñu” (êlan 12). Tinei, mâo sa klei bi mguôp sĭt suôr ti krah phung anak Aê Diê hŏng Aê Diê Pô. Tơdah drei dôk hdĭp bi guh kơang Anăn Khua Yang snăn drei ăt mâo klei guh kơang hlăm Ñu tui si klei pap Ñu msĕ mơh.
Snăn, dôk hdĭp năng hŏng klei Aê Diê iêu, mblang jing phung anak Aê Diê brei dôk hdĭp hŏng klei hmăng čiăng ngă bruă jăk, msĕ si Khua Yang Yêsu Pô Bi Mtlaih ngă leh. Brei drei thâo knang kơ klei myang Khua Yang, čiăng dưi bi sĭt jih klei čiăng jăk Ñu hlăm drei leh anăn klei đăo drei hlăm Ñu. Êjai dôk guôn hruê Khua Yang Yêsu Pô Bi Mtlaih lŏ hriê, phung anak Aê Diê brei dôk hdĭp năng kơ klei Ñu iêu hŏng knhuah dôk hdĭp bi êdah klei đăo leh anăn bi guh kơang kơ Anăn Ñu grăp hruê. Brei drei čuăn ngă bruă jăk Khua Yang hlăm hruê anei mtam.
Si ngă drei dôk hdĭp năng hŏng klei Aê Diê iêu drei leh mơ̆?
Ơ Khua Yang, akâo Ih đru kâo dưi dôk hdĭp năng hŏng klei Ih iêu leh, čiăng kơ klei hdĭp kâo dưi bi guh kơang kơ Anăn Ih leh anăn Ƀuôn Ala Mtao Ih truh djăl.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 22:22-23:25
Kênh Youtube BHKTHN:
