Klei Aê Diê Blŭ: Y-Mathiơ 6:25-34
Êlan kliăng: “Snăn đăm uêñ hnĭng ôh kơ hruê mgi, kyuadah hruê mgi diih srăng uêñ kơ hruê mgi. Grăp hruê mâo klei dleh kơ grăp hruê.” (Y-Mathiơ 6:34).
Klei êmuh ksiêm mĭn: Ya klei Khua Yang Yêsu bi hriăm phung ƀĭng kna đăm rŭng răng? Ya ngă? Ya jing mta phŭn mơ̆ng klei rŭng răng? Si ngă phung đaŏ kơ Krist bi êdah klei pô đaŏ kơ Khua Yang hlăm djăp mta klei?
Khua Yang Yêsu bi hriăm phung ƀĭng kna đăm rŭng răng kơ mnơ̆ng ƀơ̆ng huă, mnơ̆ng mnăm leh anăn kdrăp čŭt hơô. Rŭng răng ti nei jing bi mĭn, rŭng răng, amâo hơĭt ai tiê ti anăp klei čiăng hlăm hdĭp. Khua Yang Yêsu yua gru rup bi hmô čiăng bi hriăm phung ƀĭng kna thâo ƀuh mta phŭn mơ̆ng klei rŭng răng. Êlâo hĭn, Ñu dưm ti jhưng mkă plah wah klei hdĭp hŏng mnơ̆ng ƀơ̆ng huă mnăm, asei mlei leh anăn kdrăp čŭt hơô, čiăng kơ diñu thâo kral klei yuôm bhăn hĭn jing klei hdĭp leh anăn asei mlei (êlan 25). Lehanăn, Khua Yang Yêsu yua dua rup bi hmô kơ čĭm čap hlăm dliê leh anăn mnga čiăng đru kơ phung ƀĭng kna thâo săng, Aê Diê jing Pô kiă kriê leh anăn mkăp djăp mnơ̆ng kơ djăp mta mnơ̆ng. Anak mnuih brei gĭr mă bruă msĕ si čĭm čap hiu duah mnơ̆ng ƀơ̆ng, khădah klei hdĭp amâo djŏ hriê mơ̆ng klei gĭr mơ̆ng hjăn anak mnuih ôh, ƀiădah Aê Diê jing Pô thiê brei leh anăn mđĭ lar klei hdĭp anăn. Snăn ya ngă phung đaŏ kơ Khua Yang lŏ rŭng răng hĕ kơ bruă ya mnơ̆ng srăng ƀơ̆ng, ya čhum ao srăng hơô hlăk êjai Khua Yang jing pô djă kliăng kơ klei hdĭp?
Mơ̆ng klei mrâo lač brei ƀuh mta phŭn mơ̆ng klei rŭng răng jing mơ̆ng kƀah klei đaŏ kơ Khua Yang. Anăn jing klei bi knăl mơ̆ng klei đaŏ knang kơ klei gĭr ktưn mơ̆ng pô hĭn kơ đaŏ knang hlăm klei kiă kriê mơ̆ng Aê Diê hlăm klei hdĭp.
Drei dôk hdĭp hlăm wưng mâo lu đei klei rŭng răng. Klei čiăng mnơ̆ng ƀơ̆ng huă, čhum ao čŭt hơô ƀrư̆ hruê brư̆ lu ngă kơ klei rŭng răng ya mta mnơ̆ng srăng ƀơ̆ng, chum ao srăng hơô mâo lu hlăm klei hdĭp leh anăn bi hrŏ klei đaŏ mơ̆ng phung đaŏ kơ Krist. Drei ênưih brei klei hdĭp gĭt gai drei, hrô kơ bruă “êlâo hĭn, brei tui duah Aê Diê leh anăn klei kpă ênô mơ̆ng Ñu” snăn drei lŏ hdĭp msĕ si mnuih amâo thâo Khua Yang. Leh anăn kyua ƀiă đei klei đaŏ knang anăn drei wơr hĕ Aê diê bŏ hŏng klei khăp jing Pô kiă kriê atăt gai hlăm djăp klei mâo. Phung đaŏ brei hdĭp hlăm klei đaŏ knang khă gơ̆ ya boh klei mâo snăn Aê Diê ăt khăp leh anăn kriê dlăng phung đaŏ kơ Ñu. Khua Yang Yêsu čiăng kơ phung drei hdĭp hlăm ai tiê đaŏ knang jih ai tiê kơ Khua Yang hrô kơ klei hdĭ rŭng răng msĕ si phung amâo đaŏ. Ƀiădah lač snăn amâo djŏ ôh jing drei hdĭp amâo bruă klam hlăm bruă kriê dlăng klei suaih pral pô amâo dah hdĭp amâo thâo săng ôh hlăm bruă răng mgang mnơ̆ng Aê Diê jao kơ phung drei kriê dlăng. Brei drei hdĭp hlăm klei thâo mĭn Khua Yang brei čiăng thâo kral ya bruă dưi ngă leh anăn amâo dưi ngă, ƀiădah êlâo hĭn jing đaŏ knang jih ai tiê kơ Khua Yang.
Ya klei ngă kơ diih rŭng răng leh anăn gĭr tui duah hŏng ai ktang pô?
Ơ Khua Yang jing Pô kiă kriê leh anăn mkăp djăp mta mnơ̆ng hlăm klei hdĭp kâo. Akâo kơ Ih pap brei klei kâo kƀah klei đaŏ kyua lu blư̆ kâo duah hdră msir klei mâo hŏng ai ktang pô. Akâo kơ Ih bi hriăm kâo jao jih klei rŭng răng kơ Khua Yang leh anăn hdĭp đaŏ knang kơ Khua Yang kluôm ênŭm. Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 9
Kênh Youtube BHKTHN:
