Yakơ 4:7-10
“Thoi noh na iĕm athei chu yom kơ ‘Bok Kei-Dei, apinh ‘Bok Kei-Dei pơpuh yang Satan yŏng pơgơ̆r yang kơnê̆, ‘nĕ ăn oei jê̆ iĕm, na yang Satan ưh kơ pơ̆n oei jê̆ iĕm, jăk hloi tơ nai.” (Yakơ 4:7)
Nơ̆r jet tơchĕng pơwao:
– Chu yom kơ ‘Bok Kei-Dei wă khan kiơ?
– Bơngai chu yom kơ Kră Yang gô tơ’bôh tơdrong arih sư thoi yơ?
– Bơ̆n kăl kơ pơm kiơ wă kơ arih chu yom kơ Kră Yang?
Tơdah jet rơih iŏk Kră Yang dah rơih iŏk tơdrong ala teh, lei sĭt tơpă đĭ-đăng bơ̆n gô tơl khan rơih iŏk Kră Yang ngăl, mă-lei wă kơ dơ̆ng gah Kră Yang, ưh kơ đei trong kiơ nai hloh kơ khŏm chu yom kơ Kră Yang. Chư “chu yom” ’nâu tơdrong gĭt yua sư pran hloh kơ “chu kiơ̆ nơ̆r”. Đơ̆ng nơ̆r tơm, nơ̆r Grĕk, nơ̆r ‘nâu hei wă khan dan bơ̆n kơdih ala kơ đe pơgơ̆r. Nơ̆r “chu yom” ‘nâu, bơ̆n kư̆m hlôh thoi âu: chu kơ bơngai pơm tih kơpal kơ bơ̆n pơgơ̆r bơ̆n, păng chu pơm kiơ̆ kơ sư wơh athei bơ̆n. Chu yom kơ ‘Bok Kei-Dei wă khan băt kơnăl kơ Kră Yang Sư Tơ’ngla pơgơ̆r chăl arih bơ̆n, dôm tơdrong bơ̆n ‘maih wă, dôm tơdrong bơ̆n tơdă hơmet tơdrong kiơ,khŏm mơ̆ng kơ Kră Yang wă, khŏm chu kiơ̆ Kră Yang wơh athei, chu kiơ̆ dôm nơ̆r Sư tơtă.
Lăm lu nơ̆r ‘Bok Kei-Dei ‘nâu, ‘bok Yakơ tơhlâu tơ’bôh ăn kơ bơ̆n tơdrong arih bơngai chu yom Kơ Kră Yang. Adrol hloh, athei blah plơ̆ yang kơnê̆ (tr.7). Yang kơnê̆ chă lơ trong wă hơrui dui hiot kon bơngai ataih đơ̆ng Kră Yang. Mă-lei bơ̆n đei trong gơnang kơ mơsêh Kră Yang blah plơ̆ yang kơnê̆ yua kơ Kră Yang pơkă tơpă khan yang kơnê̆ gô weh ataih đơ̆ng lu bơ̆n. Lăm trong 8, ‘bok Yakơ khan gah tơdrong “sŭt ti” păng “pơm kơ jơhngơ̆m rơgoh”. “Sŭt ti” pơma kơ tơdrong bơ̆n pơm,bơ̆n arih ‘lơ̆ng rơgoh lăm tơdrong yak năm, jang pơm mă ‘bôh gah ‘nguaih. Na “pơm kơ jơhngơ̆m rơgoh” ‘nâu wă pơma kơ tơdrong ‘lơ̆ng rơgoh gah lăm bơngai noh. Thoi noh, bơngai chu yom kơ Kră Yang athei adrin khŏm pơtôch lê̆ tơdrong yoch, tơplih đơ̆ng gah lăm truh tơ gah‘nguaih. Đei thoi noh ‘mơ̆i na gơh năm jê̆ ‘Bok Kei-Dei. “Iĕm athei nhơ̆m hmoi ơh kơdih tơdrong yoch đêl iĕm pơm, hmoi ơh kơdih đêl iĕm hiĕk ‘nă, hmoi ơh kơdih đêl iĕm hiôk chơt” (tr.9). ‘Nâu nơ̆r Krao athei tơbral. Đơ̆ng juăt kơ hưch ham, ‘maih wă hiôk chơt ala teh âu, bơngai mă chu yom kơ Kră Yang băt kơnăl kơ tơdrong arih thoi noh ưh kơ lăp đon Kră Yang, ưh kơ dơ̆ng gah Kră Yang, kăl kơ weh achăng lê̆ tơdrong noh. Đĭ-đăng đơ̆ng tơdrong adrin blah plơ̆ yang kơnê̆, pơtôch lê̆ tơdong yoch,tơbral păng tơplih tơdrong arih ‘nao, dôm tơdrong noh gơh đei kơplah bơ̆n “băt tơjur kâu ‘bơ̆t anăp Kră Yang đĕch na gơh đei kơ bơ̆n lu tơdrong noh.” Yang Bơhngol ‘Lơ̆ng Tơ’ngla mơsêh pran kĕ pơm kơ bơ̆n chu yom, tơhlâu tơ’bôh dôm lu tơdrong yoch glăi lăm chăl arih bơ̆n. Kơplah bơ̆n tơjur akâu ‘bơ̆t anăp Kră Yang, bơ̆n ăn Yang Bơhngol ‘Lơ̆ng rơngei mơ̆ng kơ Sư bơ̆ jang lăm jơhngơ̆m bơ̆n, ba bơ̆n truh tơ tơdrong tơbral tơpă, đơ̆ng dei ‘mơ̆i na gơh mơn đei tơdrong arih tơplih ‘nao.
Bơngai lui bơ̆n, bơ̆n arih sơlam ‘bar pah dêh char: Dêh char Pơlei ‘lơ̆ng păng ala teh. Trong năm đơ̆ng năr bơ̆n tơ’bơ̆p Kră Yang noh trong năm rai ataih, rai ataih đơ̆ng ala teh na năm tơ anăp ‘net ‘net rai jê̆ Pơlei ‘lơ̆ng. Chu yom kơ Kră Yang ưh kơ pơm ‘măng bruh, ưh kơ hơyuh minh jơ năr ayơ đĕch ôh, mă-lei noh trong tai,lăp đon chu yom khŏm khŏm ling-lang rim năr rim jơ phŭt lăm chăl arih.
Kơkuh kơ Ih Kră Yang, apinh Ih tơgŭm inh chu yom kơ Ih tôm tơdrong, păng chu yom ling-lang rim năr. Apinh Ih dui inh năm jê̆ Ih hloh, wă kơ inh đei jơhngơ̆m pran ‘nao na kĕ blah plơ̆ yang kơnê̆, kĕ jei đơ̆ng dôm tơdrong pơhlŭ pơlung, mơn đei tơdrong arih tơplih ‘nao đơ̆ng lăm jơhngơ̆m tơlĕch truh tơ gah ‘nguaih lăm tơdrong arih jang pơm. Apinh Yang Bơhngol ‘Lơ̆ng chrih tơbăt tơdrong glăi inh, bơtho tơ’bôh, chông anhăk inh, ăn jơhngơ̆m pran ‘nao wă kơ inh yak năm lăm tơdrong Ih wă păng arih ư-ang kơ anăn ‘Bă. Inh krao khan yua anăn Kră Yang Yêsu Krist, Amen!
Bơ̆n arih hăm chu yom kơ Kră Yang rim năr ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 26
Kênh Youtube BHKTHN:
