Yakơ 5:11
“…’bok Jop sơ̆ sư đei tơdrong gleh pơmat kơ sư dang noh mă sư oei adrin lui khŏm khŏm. Na đơ̆ng rŏng bơ̆n ‘bôh ‘Bok Kei-Dei mơnat kơ sư, ăn kơ sư hiôk jơnap, na bơ̆n kư̆m băt kơ ‘Bok Kei-Dei mơnat kơ bơ̆n thoi sư noh mơ̆n.” (Yakơ 5:11b)
Nơ̆r jet tơchĕng pơwao:
– ‘Bok Jop sư bu, thoi yơ, păng sư hlôi wei kơjăp thoi yơ bơih tơdrong tơchĕng tơdrong sư pơm lăm đon lui?
– Tơdrong arih ‘bok Jop, tuch-luch sư liơ?
– Kơmĭl ‘bok Jop noh tơgŭm pơlung bơ̆n wei kơjăp tơdrong tơchĕng tơdrong pơm lăm đon lui kơplah bơ̆n kiơ̆ Kră Yang‘nâu thoi yơ?
Kiơ̆ Kră Yang ưh kơ trŏ wă kiơ̆ kơplah jơ năr ayơ ei đĕch ôh, mă-lei minh tơdrong pơkă kiơ̆ đĭ chăl arih.Lu bơngai lui kơ Kră Yang, Kră Yang krao athei ‘nĕ tơplih tơdrong tơchĕng tơdrong pơm lăm đon lui, athei wei kơjăp tơdrong tơchĕng tơdrong pơm lăm đon lui dang lĕ kơdâu pơjei, tơnăp kơjăp truh tơ tuch-luch.
‘Bok Jop, đe băt kơ sư bơngai “‘lơ̆ng tơpăt tôm tơdrong, hli yom kơ ‘Bok Kei-Dei păng weh đơ̆ng tơdrong kơnê̆” (Jop 1:1). Mă khan lei ră, chăl arih sư đei tơplih yua kơ sư kơdih păng hnam dơnŏ sư đei tơdrong gleh pơmat truh hơnơ̆ng hơnong pă pơdơh hơi. Năr ei sơ̆, lăp minh năr đĕch ră, tơdrong truh tih pơm kơ sư hiong đĭ mŭk tơmam, hiong đĭch đam, hiong đĭ lu kon sư mă ‘mêm kơeng. Đei tơdrong truh răm dang noh bơih, mă-lei ưh kơ dơ̆ng ‘bơ̆t doh, kơdih akâu sư đei tơ’boch roch ‘bĕnh ‘bang kơ akâu jĭ pă kiơ bơih. Mă khan oei lăm tơdrong truh pơmat thoi noh ră, ‘bok Jop oei wei kơjăp đon lui păng pơsư̆ pơioi ăn kơ lu kon sâu se sư dôm tơdrong gĭt lăm đon lui noh. Hăm đon lui, ‘bok Jop khan: “ …Tơdrong pŭn hiôk đơ̆ng Kră Yang ‘Bok Kei-Dei ăn, bơ̆n sơng iŏk; na tơdrong pơmat truh, ba wă ưh kơ sơng iŏk hă?(Jop 2:10); păng “Mă Kră Yang pơlôch inh, inh kư̆m oei gơnang kơ Sư…” (Jop 13:15).
Lăm Hla bơar Jop chăl 42 noh, bơ̆n ‘bôh tuch-luch sư, đei yua tih đơ̆ng chăl arih ‘bok Jop ei, “Thoi noh Kră Yang tuh tơdrong pŭn hiôk ăn kơ Jop lăm sơnăm rai kră lơ hloh kơplah ‘nao iung sơ̆” (Jop 42:12). Kră Yang ăn kơ sư mă mŭk tơmam mă kon hơ’lơ̆p lơ hloh kơ sơ̆ ki dơ̆ng. Ưh kơ pôm pŭn hiôk gah akâu akar,mŭk drăm lăm teh đak âu đĕch ôh, mă-lei đơ̆ng đei tơdrong pơlong truh tih thoi noh, ’bok Jop kang rai hlôh hơđăl kơnăl kơ Kră Yang hloh dơ̆ng, păng ‘bôh kơdih akâu sư bơngai ưh kơ tôm ưh kơ tơ̆l. (lăng lăm Hla bơar Jop 42:5). ‘Bok Jop mơn đei tơdrong pŭn hiôk tơpă ‘bơ̆t sư hlôi chu iŏk bơih tơdrong gleh pơmat, tơdrong noh pơsĭt ăn “jơhngơ̆m ’Bok Kei-Dei ‘mêm mơnat” (Yakơ 5:11)
Bơ̆n dang ei kư̆m lei-lăi thoi ‘bok Jop mơ̆n,phŏ phŏ bơ̆n ưh kơ hlôh yua kơ kiơ kiơ̆ Kră Yang bơih, chăl arih bơ̆n kơdih păng hnam dơnŏ tă kơ tơ’bơ̆p lơ tơdrong gleh glăn pơmat tat. Ưh kơ trŏ kơ năr ayơ, jơ ayơ khan bơ̆n băt ngăl yua kơ đơ̆ng tơdrong kiơ ei mă pơm kơ bơ̆n đei tơdrong truh lăm chăl arih bơ̆n thoi âu thoi to noh ôh. Mă-lei minh tơdrong kăl, bơ̆n hŏk iŏk đơ̆ng ‘bok Jop noh đei jơhngơ̆m lui tơpă kơ tơdrong ‘Bok Kei-Dei pơgơ̆r noh kiơ̆ kơ Sư wă. Sĭt tơpă mưh bơ̆n wei kơjăp tơdrong bơ̆n tơchĕng tơdrong bơ̆n pơm lăm đon lui ding truh ‘bơ̆t jơ tuch-luch lei bơ̆n gô đei iŏk tơdrong apah đơ̆ng Kră Yang. Tơdrong Kră Yang apah bơ̆n ‘nei, Sư ăn kơ bơ̆n kang rai băt kơnăl kơ Sư hloh dơ̆ng.
Kơkuh kơ Ih Kră Yang,inh băt kơ inh arih lăm teh đak âu gô tơ’bơ̆p lơ tơdrong anat anot, tơdrong pơlong lăng. Kư̆m đei tơ’bơ̆p lu tơdrong truh anat mă inh ưh kơ gơh hlôh. Bơnê kơ Ih, yua kơ đơ̆ng kơmĭl ‘bok Jop noh pơlung inh mă khan tơ’bơ̆p tơdrong truh anat dang yơ,kư̆ kơ lui gơnang kơ Ih ling-lang, trong năm lăm tơdrong lui,inh khŏm wei kơjăp tơdrong tơchĕng tơdrong pơm lăm đon lui kiơ̆ kơ Ih wă,tơnăp kơjăp truh ‘bơ̆t jơ tuch-luch. Inh krao khan yua anăn Kră Yang Yêsu Krist, Amen!
Bơ̆n dơ̆ng ‘bơ̆t anăp lu tơdrong truh anat lăm chăl arih, bơ̆n hăm lăp đon lui gơnang kơ Kră Yang, kơplah kiơ̆ Kră Yang, bơ̆n hăm wei kơjăp tơdrong tơchĕng tơdrong bơ̆n pơm lăm đon lui dĭng truh ‘bơ̆t tuch-luch ưh?
‘Bok Jop wei kơjăp tơdrong tơchĕng tơdrong sư pơm lăm Kră Yang noh kăl pă băt dang yơ,
Oei chu yom kơ Kră Yang kơplah Kră Yang ăn tơdrong truh wă pơlong lăng đon lui,
Truh năr tơ’bơ̆p Kră Yang, Sư bơnê,
Ơ đam tơnăp, ih hiôk-hian ling-lang khŏm khŏm.
Đŏk Sơ̆p Hla bơar ‘Bok Kei-Dei lăm pêng sơnăm: Yakơ 4
Kênh Youtube BHKTHN:
