Mathiơ 6:9-13
“Dah iĕm wă krao khan, iĕm athei tang ‘măng kơdrô̆ tơ anih hrĕp. Iĕm krao khan thoi noh na iĕm tơchĕng truh tơ ‘Bă bơ̆n Yang mă bơ̆n ưh kơ gơh ‘bôh. Mă iĕm krao khan tơ anih hrĕp Sư kư̆m ‘bôh mơ̆n, Sư ăn tơdrong iĕm apinh noh tơpă.” (Mathiơ 6:6).
Nơ̆r jet tơchĕng pơwao:
– Lu bơ̆n gơh krao kơ Kră Yang ‘noh kiơ?
– Lăm ‘bai Krao Khan hơdai, Kră Yang Yêsu đei tơ’bôh kăl tơm wă bơtho lu bơ̆n băt kơ Krao Khan ‘noh thoi yơ?
– Lu bơ̆n đei hŏk iŏk tơdrong kiơ đơ̆ng ‘bai bơtho kiơ̆ Kră Yang?
Lăm Mathiơ 6:9-13, Kră Yang đei tơ’bôh kăl tơm gah tơdrong lăm nơ̆r Krao khan, adrol hloh ‘noh gah ‘Bok Kei-Dei, đơ̆ng rŏng kơ noh gah lu bơ̆n: Kon pơlei Kră Yang đei tơdrong pŭn tih dêh gơh krao kơ ‘Bok Kei-Dei “’Bă” Nơ̆r “Lu nhôn” lăm đĭ ‘bai krao khan noh pơma ‘bơm tơpôl hloh kơ kơdih rim ‘nu. Khul bơngai lui đei pŭn dêh gơh krao kơ ‘Bok Kei-Dei ‘Bă, yua đơ̆ng Kră Yang Yêsu lôch tang yoch lu bơ̆n. Nơ̆r “Oei tơ kơpal plĕnh ti” tơ’blŏk Sư noh ‘Bok mă kơjung hloh, kơjung hloh kơ đĭ đăng tôm tơdrong. ‘Bok mă ‘bôh băt đĭ dôm tơdrong hlơp, ‘bôh đĭ lăm jơhngơ̆m păng tơl tơwih nơ̆r bơ̆n krao khan apinh. Pơtrŭt lu bơ̆n pơ̆n năm jê̆ Kră Yang, mălei athei năm hăm jơhngơ̆m băt lui yom (Hêbrơ 4:14-16).
Hăm Kră Yang, Sư bơih ‘lơ̆ng rơgoh “Anăn Ih jing ư-ang” (BTTHĐ), yua thoi noh nơ̆r krao khan đĭ jơhngơ̆m wă tơ’blŏk kơ lu bơ̆n yua chăl arih bơ̆n wă ư-ang anăn Kră Yang (I Kôrintô 10:31). Nơ̆r Kră Yang “Ăn dêh char Ih… mă tơ teh âu kư̆m thoi tơ plĕnh ti.” Tơ’bôh Dêh char Kră Yang jơ̆ anih Kră Yang pơgơ̆r. Dang ei, Dêh char Kră Yang ưh kơ ‘bôh păng măt, đơ̆ng lăm Yang Bơhngol ‘Lơ̆ng pơgơ̆r lăm jơhngơ̆m bơngai lui (I Kôrintô 6:19).
Hăm kon bơngai, nơ̆r “Apinh Ih ăn kơ nhôn đei sŏng sa mah rim năr” tơ’blŏk kơ bơ̆n Kră Yang jơ̆ Tơ’ngla ăn pŭn hiôk gah tơmam sa wă kơ lu bơ̆n đei jơhngơ̆m băt bơnê kơ Kră Yang, ‘nĕ kơ pơrŏ, pơang kơplah bơ̆n mơdrŏng mah tôm (Bơtho khôi juăt 8:17-18). Noh nai dơ̆ng, kư̆m ‘nĕ kơ mah hiơ̆k bơngơ̆t tơtok tơtăm dêh gah tơmam kăl yua. (Mathiơ 10:29-31).
Kơplah krao khan, “Apinh Ih ‘nĕ jô̆ yo kơ nhôn, thoi nhôn ưh kơ jô̆ yo kơ đe pơm yoch păng nhôn” tơ’blŏk kơ lu bơ̆n gah tơdrong bơ̆n hăm Kră Yang păng bơ̆n hăm bơngai nai. Tơdrong yoch noh lĕch đơ̆ng tơm sư bơ̆n jô̆ yo dih băl. Lu bơ̆n athei ling lang lăng hơmet bơ̆n kơdih, tơbral tơdrong yoch (I Yôhan 1:8-9) păng đei jơhngơ̆m huay kơ jô̆ yo kơ đe pơm kơnê̆ kơ bơ̆n (Mathiơ 6:14-15). Kơplah krao khan “Apinh Ih ‘nĕ ăn kơ nhôn lui kơ đe pơhlŭ pơlung đơ̆ng yang kơnê̆, ling lang răp wă rôp sa kon pơlei Kră Yang. Nơ̆r Kră Yang pơtrŭt lu bơ̆n athei dơ̆ng kơjăp lăm tơdrong lui gơnang kơ tơdrong mơsêh pran Kră Yang na kĕ tơblah hăm sư (I Pêtrôs 5:8-9).
Kră Yang đei bơtho tơdrong kăl tơm wă bơtho lu bơ̆n băt krao khan hăm Yang ‘Bă mă trŏ, lăp đon Sư. Kơplah krao khan athei băt lui yom păng lui gơnang kơ Kră Yang. Lu bơ̆n athei lăng bơ̆n kơdih, tơbral tơdrong yoch, athei kơchăng ưh kơ băt dôm yơ tơdrong pơhlŭ phara wă pơrăm lu bơ̆n, bơngai nai păng pơm kơ Kră Yang sơ’ngon.
Lu bơ̆n hăm ling lang krao khan kiơ̆ thoi Kră Yang đei bơtho ưh?
Ơ ‘Bă mă ‘mêm kơeng, bơnê kơ Ih đei bơtho inh krao khan, apinh Ih pơih măt inh wă kơ inh ‘bôh jơ phŭt tơ’bưh hăm Ih ‘noh jơ̆ phŭt ‘lơ̆ng rŏ păng pŭn hiôk, apinh Ih ăn kơ inh ling lang arih lăm tơdrong tơ’bưh hăm Ih tơ plĕnh ti. Yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: Hơriso 27-28
Kênh Youtube BHKTHN:
