Henplais 11:4
Nqe cim
“Twb yog vim Anpees ntseeg, nws thiaj muab tej uas zoo dua Ka-ees li fij rau Vajtswv. Vim Anpees ntseeg, Vajtswv thiaj suav hais tias Anpees yog tus ncaj ncees, rau qhov tej uas Anpees muab fij rau Vajtswv ntawd haum Vajtswv siab. Txawm yog Anpees twb tuag lawm los nimno nws kev ntseeg tseem niaj hnub qhia peb.” (Henplais 11:4).
Lus nug rau sawvdaws xav:
– Ka-ees thiab Anpees nkawd yog leejtwg?
– Vim li cas Vajtswv txais Anpees tej khoom fij, thiab tsis txais Ka-ees tej khoom fij?
– Peb kawm tau dabtsi los ntawm Anpees kev ntseeg?
Zaj lus hais txog ob tug kwvtij uas yog Ka-ees thiab Anpees nkawd tau muab sau tseg hauv Chivkeeb 4:1-16. Nkawd yog Adas thiab Evas nkawd ob tug tub yug tom qab uas nkawd ua txhaum thiab raug ntiab tawm hauv lub Vaj Edees mus. Tej zaum nkawd ob kwvtij puavleej yog txojkev cia siab ntawm nkawd ob niamtxiv ntsig txog tus Tswv tej lus cog tseg rau nkawd (Chivkeeb 3:15). Thaum yug kiag tau Ka-ees los, Evas zeem paub tias qhov no yog tus Tswv txojkev npaj, yog li nws hais tias, “Vim tus Tswv pab kuv, kuv thiaj tau ib tug tub” (Chivkeeb 4:1b). Qhov uas muaj Ka-ees thiab Anpees qhia paub tus Tswv tsis tso tibneeg tseg. Nws yeej niaj hnub saib ntsoov, nrog nraim thiab ua haujlwm raws li Nws txojkev npaj coj neeg ntiajteb rov qab los cuag Nws. Txawm yog tibneeg nyob sab nraud lub vaj, txav deb tus Tswv txojkev dawbhuv, los Nws txaus siab los nrog lawv sib raug zoo, coj qhia lawv fij khoom kom nrog tau Nws sib raug zoo.
Vajtswv Txojlus tsis hais qhov vimchiv yog vim li cas Vajtswv txais yuav Anpees tej khoom fij thiab tsis txais Ka-ees tej khoom fij, tiamsis tsuas hais mentsis hais tias Anpees fij tej menyuam yaj, Ka-ees fij tej qoobloo (Chivkeeb 4:3-5a). Tsis yog tus Tswv saib qoobloo tsis muaj nqis, hauv Levis Kevcai qhia ob yam khoom no puavleej yog khoom fij. Anpees tej khoom fij muaj ntshav, pivtxog kev daws txim. Anpees zeem paub nws tej kev txhaum thiab thov tus Tswv zam txim, tej zaum yog li ntawd tus uas sau tsab ntawv Henplais hais tias Anpees fij tej khoom uas zoo dua “vim Anpees ntseeg”. Qhov kev pehawm hauv tiam Vajluskub Qub nws muaj ib qhov chaw, sijhawm thiab tus qauv qhia. Anpees qhia tawm nws kev ntseeg thiab ua raws li tus Tswv qhia.
Anpees fij khoom los ntawm kev ntseeg tau tus Tswv suav hais tias “ncaj ncees”. Anpees sawvcev rau cov neeg uas pehawm tus Tswv los ntawm txojkev ntseeg. Txawm yog raug Ka-ees tua tuag, los Anpees tus qauv kev ntseeg yeej tseem niaj hnub qhia ib tiam dhau tiam los. Anpees kev ntseeg qhia rau peb paub hais tias tus Tswv niaj hnub hlub thiab xav kom peb los pehawm Nws. Yog peb muaj lub siab zeem paub kev txhaum thiab lees txim, mloog Vajtswv tej lus qhia, Nws yuav lees yuav peb. Tiamsis yog peb xaiv mus cuag tus Tswv raws li siab nyiam, Xav tias yus cim civ muaj peev xwm ua rau tus Tswv “ntsia ntsoov kuv”, ces nqi zog yog tus Tswv yuav “tsis txaus siab” zoo ib yam li Ka-ees.
Thov Vajtswv,
Tus Tswv, nyuam yaus ua Koj tsaug vim Koj siv Anpees tus qauv los qhia nyuam yaus los cuag Koj ntawm txojkev ntseeg thiab kev mloog lus. Thov kom tej khoom nyuam yaus fij txhua hnub Koj lees yuav. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb tabtom pehawm raws li tus Tswv siab nyiam los yog pehawm li peb nyiam?
Nyeem Vajluskub hauv peb lub xyoo: I Yauhas 2:18-3:24
Kênh Youtube BHKTHN:
