Henplais 5:11-14
Nqe cim:
“Tus uas noj mis tus ntawd tseem yog menyuam yaus, nws tsis tau paub tseeb hais tias zaj twg yog zaj twg tsis yog. Tiamsis tej zaub mov tsuas yog cov laus thiaj noj taus xwb. Lawv twb xyaum los lawm, lawv thiaj paub hais tias yam twg phem yam twg zoo” (Henplais 5:13-14).
Lus nug sawvdaws xav:
- Tus sau phau Henplais cem cov ntseeg licas?
- Tus “noj mis” txawv tus “noj zaub mov” licas?
- Peb yuav ua cas thiaj noj taus “zaub mov” uas yog Vajtswv Txojlus kom peb thiaj loj hlob txhua hnub?
Thaum hais txog Tswv Yexus tes haujlwm uas yog Povthawj Hlob, tus sau phau Henplais thiaj hais tias: “Peb tseem muaj ntau zaj uas yuav piav qhia nej, tiamsis piav nyuaj heev, rau qhov nej tsis tshua totaub” (nqe 11). Tsis yog zaj hais txog Yexus Khetos nyuaj dhau ua rau tsis totaub, tiamsis vim lawv “tsis xav paub”. Muaj tej phau txhais hais tias “nej tsis nyiam mloog”, “pos ntsej tsis xav mloog”. Hais tau hais tias, lawv tsis muaj lub siab xav mloog zaj hais txog Yexus Khetos. Los ntseeg caij nyoog ntev npaum ntawd, tsimnyog lawv loj hlob thiab paub qhia Vajtswv Txojlus rau lwm tus lawm, tiamsis lawv tseem zoo li menyuam yaus, tseem cia lwm tus qhia tej yam yooj yim pub rau lawv.
Kua mis tsuas yog yam noj uas muab pub rau menyuam mosliab xwb, vim “tus uas noj mis tus ntawd tseem yog menyuam yaus, nws tsis tau paub tseeb hais tias zaj twg yog zaj twg tsis yog” (nqe 13). Tej zaum cov neeg zoo li ntawd tsuas paub hais tias ntseeg Yexus ces tau dim txim thiab tsis raug poob mus rau hauv ntuj tawg xwb, dua li lwm yam lawv tsis quav ntsej txog li. Lawv tsis totaub txog Vajtswv tes haujlwm pab cawm uas Tswv Yexus tau los ua pab tibneeg zoo li tus Povthawj Hlob tes haujhlwm. Lawv kuj tsis paub muab Vajtswv Txojlus los cob rau lubneej.
Txhua tus uas ntseeg Yexus lawm, yuav tsum txawj loj hlob, ua tus “noj mis” dhau mus noj taus “zaub mov”. Tu siab uas muaj ib txhia ntseeg tseem nroo hais tias, ua cas Xibfwb pheej niaj zaug qhia Vajluskub xwb tsis piav txog lwm yam uas qhov muag pom zoo li piav xov xwm tej… Lawv zoo siab rau tej lub sijhawm uas mus kawm xyaum txog kev ceev nyiaj txiag, kev txhim kho lub cuabyig thiab kev qhia menyuam… tiamsis lawv nkees mloog thaum qhia txog Yexus Khetos zaj thiab Vajtswv tes haujlwm pab cawm.
Tus uas loj hlob hauv tus Tswv, nws paub yam twg zoo yam twg phem (nqe 14). Cov ntseeg uas zoo li ntawd yog cov muaj lubneej coj raws cai ntawm sab ntsujplig, paub nyeem, kawm, xav thiab xyaum ua raws Vajtswv Txojlus txhua hnub hauv lubneej. Lawv paub yam twg tsimnyog ua yam twg tsis ua thiab yam twg ua rau Vajtswv zoo siab. Loj hlob hauv sab ntsujplig yog ua lubneej twb hau nrog ntau yam kev nyuaj, thiab kev sim siab, yuav tau raug kawm xyaum ntev loo, thiaj ua tau lubneej muaj nqis rau Vajtswv thiab coj tau ntau leej los cuag tus Tswv.
Thov Vajtswv,
Tus Tswv, ua Koj tsaug rau qhov Koj Txojlus ua rau paub hais tias, nyuam yaus yog menyuam lossis twb hlob tiav lawm. Thov pab nyuam yaus nyiam Koj Txojlus, ua lubneej raws cai tswj kom kev ntseeg pheej hlob txhua hnub, muaj nqis rau Vajtswv Koj tes haujlwm. Amees.
Peb puas ntshaw noj “tej zaub mov” uas yog Vajtswv Txojlus?
Nyeem Vajluskub hauv peb lub xyoo: Exekees 29
Kênh Youtube BHKTHN:
