Ntawv Nkauj 119:1-8
Nqe cim.
“Yog kuv ua raws li Koj tej lus samhwm, ces kuv yuav tsis poob ntsejmuag li.” (Ntawv Nkauj 119:6)
Lus nug rau sawvdaws xav:
- Tus sau Ntawv Nkauj 119 qhia hais tias leejtwg yog tus tau koob hmoov?
- Tus Tswv muab Nws tej kevcai cob rau peb ua dabtsi?
- Thaum ua raws Vajtswv Txojlus, peb yuav zoo licas?
- Peb tabtom tsom ntsees nqis peev rau yam dabtsi?
Ntawv Nkauj 119 yog zaj nkauj ntev tshajplaws nyob hauv Phau Ntawv Nkauj hais tshwjxeeb txog Vajtswv Txojlus. Zaj Nkauj no muab faib ua 22 tshooj pajhuam, ib tshooj twg muaj 8 nqe thiab pib raws li lus Henplais tej niam tsiaj ntawv. Yim nqe xubthawj pib ntawm tus niam tsiaj ntawv aleph, hais txog tej koob hmoov ntawm tus neeg xav ntsoov thiab ua raws li tus Tswv tej kevcai.
Qhib thawj, tus sau zaj nkauj hais meej hais tias cov neeg uas ua raws li tus Tswv tej kevcai yog cov uas tau “koob hmoov” (nqe 1-2). Txuas ntxiv, tus sau zaj nkauj hais tias “Tus TSWV, Koj tau muab Koj tej kevcai cob rau peb, thiab qhia kom peb niaj hnub coj raws li tej kevcai ntawd” (nqe 4). Tus Tswv “tej kevcai” yog hais txog Vajtswv Txojlus. Ntawm no yog hais txog tej kevcai thaum xubthawj tus Tswv samhwm rau Nws haivneeg thaum Nws xaiv lawv (II Kevcai 6:6-9), thiab tau muab hais mus hais los rau tus Tswv haivneeg yuav tsum nqis peev rau kev kawm Vajtswv Txojlus txhua hnub txhua hmo (Yausuas 1:8). Tiamsis, haivneeg Yixalayees thiab lawv tej vajntxwv, tsis hais Vajntxwv Daviv, ntau zaug tau hnov qab tus Tswv tej kevcai thiab ua raws tus kheej lub siab nyiam. Vim li ntawd, nyob hauv nqe 5, tus sau thiaj hais tias: “Thov pab kom kuv muaj lub siab npuab Koj thiab ua raws li Koj tej kevcai!” Ntawm no yog ib lo lus khuv xim, kheev lam yog thaum ub tus kheej ua raws li Vajtswv Txojlus qhia ces nimno twb tsis ntsib ntau kev txomnyem.
Dhau tej kev nyuaj siab tau ntsib, tus sau zaj nkauj hais khov kho hais tias: “Yog kuv ua raws li Koj tej lus samhwm, ces kuv yuav tsis poob ntsejmuag li” (nqe 6). “Ua raws” yog qhov uas saib ntsoov, ua tib zoo xav txog tus Tswv tej kevcai thiab ua raws nraim li ntawd, ces yuav tsis raug txajmuag. Thaum paub tus Tswv “tej kevcai ncaj ncees” lawm, tus sau zaj nkauj tau qhuas tus Tswv los ntawm lub siab dawb paug (nqe 7). Kev zoo siab yuav puv npo thiab ua suab tawm qhuas tus Tswv thaum peb tseg sijhawm los kawm tus Tswv Txojlus thiab xyuamxim ua raws ces yuav tau txais koob hmoov. Qhov kawg, tus sau zaj nkauj coglus hais tias: “Kuv yuav hwm Koj tej kevcai; thov Koj tsis txhob tso kuv tseg” (nqe 8). Ntawm no yog ib lo lus txiav txim siab hais tias yuav hwm thiab ua raws tus Tswv tej kevcai mus li thiaj tsis raug tus Tswv muab tso povtseg.
Tus sau Ntawv Nkauj 119 twb ntsib ntau kev tau zoo txomnyem hauv lub neej dhau los lawm, vim li ntawd nws thiaj sau ib zaj nkauj ntev heev los hais txog qhov tseemceeb ntawm kev kawm thiab ua raws Vajtswv Txojlus. Dhau tej kev txomnyem tau zoo uas nws ntsib, nws xam pom hais tias tsuas yog thaum kawm thiab ua raws tus Tswv tej kevcai thiaj yuav tau koob hmoov nplua mias. Niaj hnub nimno, yog peb tseg sijhawm los nrhiav tus Tswv, kawm Nws Txojlus thiab ua raws, ces peb yeej yuav tau txais tej koob hmoov zoo kawg nkaus hauv peb lub neej.
Thov Vajtswv
Tus Tswv, thov pab nyuam yaus nrhiav koob hmoov hauv Koj Txojlus. Thov qhia nyuam yaus xub tseg sijhawm los kawm Koj Txojlus txhua hnub hmo kom paub Koj lub siab nyiam thiab ua raws li Koj Txojlus qhia. Amees.
Peb puas xub tseg sijhawm rau kev kawm thiab ua raws li Vajtswv Txojlus txhua hnub lawm tau?
Nyeem Vajluskub hauv peb lub xyoos: Yelemis 51:49-64
Kênh Youtube BHKTHN:
