Klei Aê Diê Blŭ: Klei Bi Hriêng 17:26-28.
Êlan kliăng: “Arăng yap mnuih mluk jing mnuih thâo mĭn tơdah ñu dôk ñăt, tơdah ñu kđhĭp kƀông ñu arăng yap ñu mnuih thâo săng” (Klei Bi Hriêng 17:28).
Klei êmuh ksiêm mĭn: Ya klei mtao Y‑Salômôn bi hriăm kơ klei tŭ mơ̆ng bruă dôk ñăt? Ya ngă phung thâo dôk ñăt dưi dlăng jing thâo mĭn? Si brei drei thâo răng klei blŭ čiăng ba klei tŭ kơ phung dôk hmư̆ leh anăn bi guh kơang Anăn Aê Diê?
Mtao Salômôn bi hriăm anak ñu hdĭp thâo mĭn hlăm klei bi mlih mơ̆ng knuih truh kơ klei blŭ tlao nao hriê. Kơ knuih, phung kpă ênô mâo ai tiê kpă, thâo bruă bi kmhal amâodah čăm phung kpă ênô jing soh leh anăn amâo djŏ. Phung kƀah klei thâo mĭn leh anăn amâo kpă ênô khăng phat kđi amâo djŏ. Mơ̆ng knuih, mtao bi mlih klei ngă, boh nik klei blŭ. Phung mluk si bĕ ngă čiăng dưi blŭ klei thâo mĭn: “Klei blŭ siam amâo năng ôh kơ sa čô mluk” (êlan 7). Mklăk wĭt phung thâo mĭn srăng amâo blŭ ôh klei mluk. Tơdah dôk kriêp, arăng srăng amâo thâo ôh knuih anak mnuih, ƀiădah sĭt blŭ lu, arăng srăng lač kơ knuih thâo mĭn amâodah mluk mơ̆ng pô blŭ. Phung thâo mĭn thâo ksiêm bi nik hlăm klei blŭ, kjăp ai tiê hlăm klei ngă. Wăt tơdah phung mâo ai tiê ka thâo mĭn, snăn knuih diñu dôk ñăt kriêp ăt dưi dlăng thâo mĭn. Kyua sĭt dôk ñăt, anak mnuih mâo mmông ksiêm bi nik hĭn, leh anăn dưi ñĕ kơ klei blŭ soh, mluk: “Êlah phung thâo mĭn blŭ klei thâo săng, ƀiădah ƀăng êgei phung mluk bi kbiă klei mluk” (Klei Bi Hriêng 15:2). Bi ư̆ ăn klei hlơr ai, amâo blŭ klei kƀah ksiêm mĭn jing dưi bi êdah klei thâo mĭn anak mnuih.
Phung đưm bi hriăm: “Thâo snăn blŭ man dưn, amâo thâo ôh snăn knang kơ kmeh dôk hmư̆” kñăm mñă kơ grăp čô thâo kơ boh klei snăn brei blŭ, bi tơdah amâo klă snăn brei dôk kriêp mđing hmư̆ čiăng lŏ dơ̆ng tui hriăm. Ƀiădah sa klei amâo djŏ hlăm ala ƀuôn drei khăng ƀuh jing phung thâo mĭn snăn khăng êmưt blŭ leh anăn blŭ ƀiă, mklăk wĭt phung mluk snăn khăp blŭ, ƀiădah blŭ klei mgao, hơăi mang. Knư̆ blŭ knư̆ bi êdah knuih êdu kƀah diñu leh anăn klei kthŭl mluk hlăm klei blŭ tlao. Phung snăn tlaih blŭ ôh jăk hĭn.
Jing phung đăo kơ Krist, klei drei blŭ brei bi êdah pô jing anak Aê Diê. Brei thâo răng bi mĭn boh phŭn drei blŭ kpă ênô, doh jăk mơ̆. Klei drei blŭ djŏ mông, djŏ mnuih, djŏ guôp hŏng klei mơ̆. Khua ƀĭng kna Y‑Pôl mtô leh phung đăo ti Êphêsô snei: “Đăm brei klei blŭ jhat kbiă mơ̆ng ƀăng êgei diih ôh, ƀiădah knŏng blŭ klei jăk dưi đru brei arăng hriê kơ prŏng, tui si mông găl, čiăng dưi bi mbha klei pap kơ phung dôk hmư̆” (Êphêsô 4:29). Čang hmăng grăp čô anak Aê Diê dưi hriăm klei tŭ dưn mơ̆ng klei dôk ñăt kriêp čiăng mĭn bi nik hlăm klei blŭ. Sĭt blŭ, brei blŭ klei tŭ dưn kơ phung hmư̆ leh anăn bi êdah klei kpă ênô, klei khăp Khua Yang.
Klei drei blŭ ba klei tŭ dưn kơ phung hmư̆ mơ̆?
Wah lač: Ơ Khua Yang, jing Ama hmei hlăm adiê. Bi mni kơ Ih kyua bi hriăm leh kâo, brei kơ kâo Klei Aê Diê Blŭ. Akâo kơ Ih đru kâo dưi ư̆ ăn klei đĭ ai, thâo ksiêm mĭn bi nik sĭt blŭ. Akâo kơ Khua Yang brei kâo klei blŭ ba klei tŭ dưn kơ phung hmư̆ leh anăn bi guh kơang Anăn Ih.
Dlăng Klei Aê Diê Blŭ hlăm tlâo thŭn: Khua Pô Mtô 2:1‑26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
