Klei Aê Diê Blŭ: Y Mthiơ 10: 24-27
Êlan kliăng: “ … Krist msĕ mơh tŭ leh klei knap mñai kyua diih, čiăng brei kơ diih klei bi hmô, čiăng kơ diih tui hlue kru Ñu” (I Y-Pêtrôs 2:21).
Klei êmuh ksiêm mĭn: Ya klei Khua Yang Yêsu lŏ dơ̆ng mblang kơ phung khua ƀĭng kna? Ya ngă Ñu lač kơ phung khua ƀĭng kna “đăm huĭ ôh”? Ya klei Khua Yang Yêsu čiăng kơ phung khua ƀĭng kna ngă? Ya knuih brei phung đăo kơ Krist mâo sĭt tŭ klei knap mñai kyua Khua Yang? Si drei ba yua Klei Aê Diê Blŭ mtô?
Hlăm trăn Klei Aê Diê Blŭ hruê anei, Khua Yang Yêsu lŏ dơ̆ng blang kơ phung ƀĭng kna thâo săng kơ klei lông dlăng diñu srăng tlă anăp sĭt mă bruă kơ Khua Yang. Ñu lač kơ dua klei bi mguôp “ƀĭng kna – nai mtô” leh anăn “Khua – ding buăl” (êlan 24). Khua Yang čiăng kơ phung khua ƀĭng kna tui hlue Khua Yang leh anăn jưh knang kluôm ênŭm hlăm Ñu. Anei jing klei ngă čiăng diñu dưi tŭ klei knap mñai sĭt mă bruă kơ Khua Yang. Ñu ăt bi êdah phung ƀĭng kna srăng dưi mŭt tŭ mbĭt hlăm klei knap mñai Ñu (êlan 25a), anăn jing sa klei ktưn hưn hŏng phung dôk jing “ƀĭng kna” leh anăn “dĭng buăl” Khua Yang.
Khua Yang Yêsu lač kơ sa klei bi hmô, tơdah phung mkăn dưi pia Ñu jing Bêlsêbul, jing khua sang, snăn diñu ăt dlăng phung tui hlue Khua Yang jing phung roh brei ksŭng ngă. Khua Yang Yêsu thâo klei anăn, kyua anăn Ñu mđĭ ai phung ƀĭng kna hlăm êlan 26 snei, “Snăn đăm huĭ kơ diñu ôh…” Ya ngă đăm huĭ? Kyua amâo mâo ôh ya klei dưi mdăp nanao wăt tơdah bruă anăn hgăm snăk, hră Hêbrơ 4:13 čih leh klei anei, “Leh anăn ti anăp Ñu amâo mâo sa mnơ̆ng hrih leh dưi dôk hgăm, ƀiădah jih jang mnơ̆ng pŏk leh anăn bi êdah leh ti anăp ală Pô drei srăng hưn bruă drei ngă.” Năng ai hlăk anăn lu phung bi êmut kơ phung khua ƀĭng kna, ngă ruă êka, ƀiădah hlăm êdei anăp Khua Yang Yêsu srăng jing Pô ksiêm dlăng klei kpă ênô kơ diñu. Klei brei diñu ngă hlăk anăn jing “brei hiu hưn” “mtô” ya klei Khua Yang Yêsu mtô leh pô.
Grăp čô phung đăo hrue anei brei thâo săng pô jing Khua ƀĭng kna leh anăn dĭng buăl Khua Yang Yêsu. Brei drei hdĭp hlue si klei bi hmô mơ̆ng Khua Yang Pô bi mtlaih pô hlăm klei mă bruă, leh anăn brei ƀuh ktưn hưn sĭt dưi đru klam klei knap mñai hŏng Khua Yang Yêsu. Brei drei hdơr drei amâo tui ksiêm ya klei dleh dlan, bi kdơ̆ng, ƀiădah drei ăt kăn êdu ai, kdŭn tluôn grăp blư̆ tuôm hŏng klei bi kdơ̆ng, dleh dlan. Khua Yang Yêsu mđĭ ai drei đăm huĭ ôh lăn ala, năng ai ya klei lăn ala dôk blŭ ngă kơ arăng čhuai amâodah bi kdơ̆ng hŏng Khua Yang Yêsu leh anăn phung tui hlue Ñu, ƀiădah drei đăo kơ Klei Aê Diê Blŭ mtô leh drei kơ klei phat kđi kpă ênô hlăm hruê knhal tuč (Y-Mathiơ 13:24-30) djăp klei srăng dưi bi klă mngač. Bruă klam drei hlăk ară anei jing brei jhŏng “hưn”, “mtô” klei sĭt nik jing Klei Aê Diê Blŭ. Đăm brei klei blŭ, knuih amâodah bruă ngă anak mnuih hlăm lăn ala ngă kơ drei huĭ hlăm klei mă bruă kơ Khua Yang leh anăn hiu hưn Klei Mrâo Mrang Jăk Ñu.
Drei dôk tŭ klei knap mñai kyua Khua Yang mơ̆? Diih hmư̆ mơ̆ asăp Khua Yang blŭ hŏng pô “diih đăm huĭ ôh”?
Wah lač: Ơ Khua Yang, akâo kơ Ih đru kâo kjăp ai tiê sĭt mă bruă kơ Khua Yang, wăt tơdah tlă anăp hŏng lu klei dleh dlan, arưp aram. Akâo kơ Ih đru kâo kjăp ai tiê mă bruă kơ Ih leh anăn jhŏng hưn leh anăn mtô Klei Sĭt Nik.
Dlăng Klei Aê Diê Blŭ hlăm tlâo thŭn: Klei Mmuñ Hđăp 135:1-21; 136:1-26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
