Mathais 10:24-27
Nqe cim:
“…rau qhov Yexus Khetos twb raug kev tsimtxom this nej thiab ua yam ntxwv rau nej xyaum lawm, nws ua li ntawd nej thiaj yuav ua tau li nws ua” (I Petus 2:21).
Lus nug rau sawvdaws xav:
- Tswv Yexus piav qhia yam dabtsi ntxiv rau cov thwjtim?
- Vim licas Nws hais rau cov thwjtim hais tias “nej tsis txhob ntshai neeg”?
- Tus Tswv xav kom cov thwjtim yuav tsum ua dabtsi?
- Tus ntseeg yuav tsum muaj kev xav licas thaum tiv kev txomnyem vim tus Tswv lub npe?
- Peb ua raws Vajtswv Txojlus qhia licas?
Nyob hauv ntu Vajluskub hnub no, Tswv Yexus piav qhia ntxiv rau cov thwjtim totaub txog tej kev sim siab uas lawv yuav ntsib thaum ua tus Tswv tes haujlwm. Nws hais txog ob txojkev sib txuas ntawm “tub kawm ntawv – xibhwb” thiab “tub qhe – tus tswv” (nqe 24). Tus Tswv xav kom cov thwjtim raws Nws tus neev taw thiab vamkhom Nws. Ntawd yog txoj haukev pab kom lawv tiv taus kev txomnyem thaum ua Nws haujlwm. Nws kuj qhia ua ntej hais tias, cov thwjtim yuav nrog Nws tiv kev txomnyem (nqe 25a), ntawd yog ib txoj koobhmoov rau cov uas yog tus Tswv cov “tub kawm ntawv” thiab “tubqhe”.
Tswv Yexus hais ib zaj timkhawv hais tias, yog muaj neeg twb muab Nws hu ua Npexenpus, txhais hais tias “tus thawj dab” lawm, ces lawv kuj saib cov uas raws Nws qab zoo li yeebncuab yuav tsum tawmtsam thiab. Tswv Yexus paub tej ntawd, Nws thiaj txhawb cov thwjtim lub zog hauv nqe 26 hais tias: “Yog li ntawd, nej tsis txhob ntshai neeg…” Vim licas txhob ntshai? Vim tsis muaj ib yam uas yuav muab npog cia tau mus ibtxhis, txawm tias ntawd yog tej uas tsis muaj leejtwg paub, nyob hauv Henplais 4:13 hais meej txog qhov no: “Tsis muaj ib yam dabtsi uas neeg yuav muab ntis tau tsis pub Vajtswv pom. Ib puas tsav yam uas Vajtswv tsim los lawm Vajtswv yeej pom huv tibsi, thiab peb txhua tus nyias yuav tsum piav nyias lub neej qhia rau Vajtswv.” Nimno cov thwjtim raug ntiajteb ntxub, nrhiav kev tsimtxom, tiamsis muaj ib hnub tomntej tus Tswv yuav nrhiav kev ncaj ncees rau lawv. Yam uas lawv yuav tsum ua lub sijhawm no yog “cia li piav”, “cia li tshaj tawm” tej uas Tswv Yexus tau qhia rau lawv lawm.
Cov ntseeg niaj hnub nimno yuav tsum xam pom hais tias yus yog tus Tswv li thwjtim thiab yog tus Tswv li tubqhe. Peb yuav tsum ua lubneej raws Tswv Yexus tus qauv hauv kev ua haujlwm, thiab yuav tsum hnov zoo siab thaum tau koom nrog Tswv Yexus tiv kev txomnyem. Yuav tsum nco ntsoov hais tias, peb tsis txhob txwm mus nrhiav tej kev tawmtsam lossis tej kev txomnyem, tiamsis peb kuj tsis yoojyim poob siab, tsis thim rov thaum ntsib kev txomnyem lossis kev tawmtsam. Tswv Yexus txhawb peb lub zog txhob ntshai lub ntiajteb; tej zaum tej uas ntiajteb hais ua rau lwm tus xav yuamkev lossis tawmtsam Tswv Yexus thiab cov uas raws Nws qab, tiamsis peb cia siab rau Tswv Yexus tej lus txog kev txiavtxim ncaj ncees hnub kawg (Mathais 13:24-30) thaum ntawd txhua yam dawb dub yuav pom meej. Peb feemxyuam nimno, yog ua siab tawv “piav” thiab “tshajtawm” Vajtswv Txojlus uas yog qhov tseeb. Txhob cia neeg ntiajteb tej kev xav, lus hais, lossis tes haujlwm ua rau peb ua xyemxyav hauv kev ua tus Tswv haujlwm thiab tshajtawm tus Tswv Txojmoo Zoo.
Nej puas tabtom tiv kev txomnyem vim tus Tswv lub npe? Nej puas tau hnov tus Tswv lub suab hais tias “tsis txhob ntshai” lawm tau?
Tus Tswv, thov pab nyuam yaus ua siab ntev ua Koj tes haujlwm txawm yuav ntsib ntau kev khwv, kev txomnyem. Thov pab nyuam yaus muaj lub siab tawv ua Koj tes haujlwm thiab piav qhia, tshajtawm txog Koj Txojlus tseeb rau lwm tus. Amees.
Nyeem Vajluskub hauv peb lub xyoos: Phau Ntawv Nkauj 135:1-136:26
Kênh Youtube BHKTHN:
