Klei Aê Diê Blŭ: Y‑Mathiơ 25:35-40
Êlan kliăng: “Ya mta bruă diih ngă, ngă bĕ hŏng jih ai tiê, msĕ si mă bruă kơ Khua Yang, amâo djŏ kơ mnuih ôh” (Kôlôs 3:23).
Klei êmuh ksiêm mĭn: Ya klei Khua Yang Yêsu mtô mơ̆ng klei yăl dliê bi hriêng anei? Ya klei phung đăo dưi ngă kơ Khua Yang hlăm knhuah hdĭp grăp hruê? Hŏng si ai tiê Khua Yang čiăng kơ drei mă bruă kơ arăng? Si drei dôk mă bruă hŏng jih ai tiê kơ arăng?
Khua Yang Yêsu yua klei yăl dliê bi hriêng anei čiăng mtô kơ phung ƀĭng kna kơ klei phat kđi knhal tuč mơ̆ng Mtao tui si knhuah hdĭp leh anăn klei phung anak Aê Diê dôk dơ̆ng ƀơ̆ng huă hŏng arăng. Wăt tơdah drei amâo bi tuôm hŏng Khua Yang tlă anăp ƀiădah hlăk drei hŏng jih ai tiê đru mnuih mkăn êjai digơ̆ kƀah: êpa brei mnơ̆ng ƀơ̆ng, mhao brei êa mnăm, jum drông tue, čuă čhưn hlăk êdu awăt, răng kriê hlăk ruă duam… (êlan 35-36) jing drei dôk mă bruă kơ Khua Yang găn hŏng mnuih mkăn leh msĕ si Klei Blŭ lač klă: “êjai diih ngă leh klei anăn kơ sa čô hlăm phung ayŏng adei kâo đơ điêt anei jing klei diih ngă leh kơ kâo yơh” (êlan 40).
Trăn anei msĕ si klei mtă pioh kơ phung khua ƀĭng kna hlăk đưm leh anăn kơ jih jang phung anak Aê Diê hruê anei brei thâo uêñ mĭn kơ klei kƀah pô mkăn čiăng leh anăn brei drei hŏng jih ai tiê mă bruă. Khua Yang Yêsu ăt lač mơh hlăm Y‑Markôs 9:41 snei: “Kyuadah sĭt nik kâo lač kơ diih, hlei pô brei kơ diih mnăm sa atŏ êa kyuadah diih jing phung kâo, hơăi, ñu amâo srăng luč ôh klei mưn ñu”. Hŏng Khua Yang, tơdah hlei pô đru mnuih mkăn hŏng jih ai tiê, mblang jing pô anăn dôk ngă kơ Khua Yang leh anăn Ñu srăng čih pioh jih klei pô anăn mă bruă hŏng ai tiê khăp. Hlăk Khua Yang lŏ hriê, sĭt nik pô anăn srăng mâo klei mưn. Klei Blŭ hlăm Hêbrơ lač klă mơh: “Kyuadah Aê Diê amâo jing wê ôh; Ñu amâo wơr bĭt hĕ bruă diih leh anăn klei khăp diih bi êdah leh kyua Anăn Ñu, hlăm klei diih đru leh phung doh jăk, msĕ si diih ăt ngă” (Hêbrơ 6:10). Bi mklăk, hlei pô ngă ngơi, čuôt klih leh anăn amâo uêñ kơ mnuih dôk kƀah čiăng mâo klei arăng đru, snăn pô anăn dôk phưi lui mmông găl mă bruă kơ Khua Yang. Hlăm hruê phat kđi, pô anăn srăng tŭ klam kơ knhuah hdĭp amâo uêñ, čuôt klih ñu kyuadah klei đăo sĭt brei bi êdah hŏng bruă ngă.
Khua ƀĭng kna Y‑Pôl mtă mtăn: “Ya mta bruă diih ngă, ngă bĕ hŏng jih ai tiê , msĕ si mă bruă kơ Khua Yang, amâo djŏ kơ mnuih ôh” (Kôlôs 3:23). Tơdah drei mă bruă kơ arăng hŏng klei thâo săng drei dôk mă bruă kơ Khua Yang snăn drei srăng mă bruă hŏng jih ai tiê, amâo blŭ duñ duñ amâodah rŭng ênguôt ôh. Anei jing knhuah mă bruă leh anăn mă bruă kơ Khua Yang brei grăp čô phung đăo bi mâo, hriăm mjuăt čiăng jing klei mưng atăt kơ klei bi mjuăt klei hdĭp mngăt hlăm klei mă bruă. Aê Diê sĭt nik amâo wơr bĭt ôh hlei pô hŏng jih ai tiê mă bruă kơ Aê Diê, mă bruă kơ ayŏng adei, leh anăn Ñu ƀuăn srăng brei klei mưn hlăm hruê phat kđi.
Si ngă drei djă pioh klei bi mjuăt klei hdĭp mngăt hlăm klei mă bruă leh anăn hŏng jih ai tiê mă bruă kơ phung dôk găn klei dleh dlan mơ̆?
Wah lač: Ơ Khua Yang, akâo Ih pap brei kơ kâo kyuadah lu blư̆ kâo lač mă bruă kơ Khua Yang ƀiădah amâo mđing uêñ ôh kơ klei kƀah ayŏng adei čiăng. Akâo Ih brei kâo thâo mă bruă kơ Khua Yang hŏng jih ai tiê nanao leh anăn amâo wơr bĭt ôh đru ayŏng adei riêng gah dôk kƀah knap.
Dlăng Klei Aê Diê Blŭ hlăm tlâo thŭn: Klei Mmuñ Hđăp 11:1-7; 12:1-8; 13:1-6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
