Mathais 25:35-40
Nqe cim
“Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg” (Kaulauxais 3:23).
Lus nug rau sawvdaws xav:
- Tswv Yexus qhia dabtsi dhau zaj lus pivtxwv no?
- Tus ntseeg ua tau dabtsi pub tus Tswv dhau los ntawm nws kev ua neej txhua hnub?
- Tus Tswv xav kom peb ua haujlwm pab lwm tus los ntawm nplooj siab zoo licas?
- Peb tabtom ua haujlwm tas siab ntsws pab lwm tus licas?
Tswv Yexus siv zaj lus pivtxwv no los qhia cov thwjtim txog Vajntxwv kev txiav txim zaug kawg, saib los ntawm tus Tswv haivneeg txojkev xav thiab tej uas lawv ua rau lwm tus. Txawm yog peb tsis tau ntsib tus Tswv tim ntsej tim muag, los thaum peb rau siab ntso pab lwm tus tej yam uas lawv cheemtsum, xws li: thaum tshaib pub noj, thaum nqhis pub haus, thaum ua qhua hu los tsev, thaum qaug zog mus xyuas, thaum muaj mob mus tu… (nqe 35-36) ces yog peb tabtom ua rau tus Tswv li Nws tej lus hais tias: “Kuv qhia tseeb rau nej hais tias, thaum uas nej tau pab kuv cov kwvtij no ib tug, txawm yog tus ntawd muaj hwjchim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag!” (nqe 40).
Ntu Vajluskub no zoo li ib lo lus samhwm rau cov timthawj thaum ub thiab cov ntseeg niaj hnub nimno hais tias peb yuav tsum txhawjxeeb txog lwm tus tej kev cheemtsum thiab tas siab ntsws ua haujlwm pab lawv. Tswv Yexus kuj hais tseg hauv Malakaus 9:41 hais tias: “Kuv qhia tseeb rau nej hais tias tus uas muab ib khob dej rau nej haus, vim nws paub hais tias nej yog kuv cov thwjtim, ces tus ntawd yeej yuav tau nqi zog.” Nyob ntawm tus Tswv, yog leejtwg tas siab ua zoo pab lwm tus ces yog tabtom ua rau tus Tswv thiab Nws yuav muab tus ntawd tej haujlwm zoo sau tseg cia. Thaum tus Tswv rov los, tus ntawd yeej yuav tau nqi zog. Vajtswv Txojlus nyob hauv Henplais kuj hais meej hais tias: “Vajtswv yog tus ncaj ncees! Nws yeej yuav nco ntsoov tej haujlwm uas nej tau ua los lawm thiab qhov uas nej pab cov ntseeg ib yam li niaj hnub no nej tseem pab. Nej ua li ntawd twb yog vim nej muab siab npuab Vajtswv.” (Henplais 6:10). Tiamsis, yog leejtwg tsis quav ntsej, qia dub thiab tsis muaj siab hlub cov neeg uas cheemtsum kev pab ces tus ntawd tabtom tso dhau sijhawm ua tus Tswv haujlwm. Txog hnub txiav txim, tus ntawd yuav raug ris lub txim ntawm lub siab tsis quav ntsej thiab qia dub, vim kev ntseeg tseeb yuav tsum qhia tshwm los ntawm tes haujlwm kev hlub.
Timthawj Paulus qhuab ntuas: “Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg.” (Kaulauxais 3:23). Thaum peb ua ib yam dabtsi rau lwm tus los ntawm kev xav hais tias yog ua rau tus Tswv ces peb yuav rau siab ntso ua, tsis yws tsis nkees. Ntawm no yog tej kev xav thiab kev ua haujlwm uas txhua tus ntseeg yuav tsum muaj, yuav tsum xyaum ua kom swm thiaj dhau los ua txojcai nyob hauv yus kev ua haujlwm. Vajtswv yeej tsis hnov qab tus uas rau siab ntso ua haujlwm rau Nws thiab rau lwm tus tibneeg, thiab Nws coglus thaum txog hnub txiav txim yuav muab nqi zog rau lawv.
Peb puas coj txojcai sab ntsujplig nyob hauv kev ua tus Tswv haujlwm thiab rau siab ntso ua haujlwm rau cov neeg txomnyem?
Thov Vajtswv
Tus Tswv, thov zam txim rau nyuam yaus vim ntau zaug nyuam yaus hais tias ua koj tes haujlwm tiamsis ho tsis txhawjxeeb txog cov ibncig tej kev cheemtsum. Thov pab nyuam yaus paub rau siab ntso ua Koj tes haujlwm thiab tsis hnov qab pab cov neeg ibncig tabtom raug txomnyem. Amees.
Nyeem Vajluskub peb lub xyoos: Ntawv Nkauj 11:1-13:6
Tshooj Youtube BHKTHN: https://www.youtube.com/c/bhkthn
