Klei Aê Diê Blŭ: Klei Kbiă 25: 1-9.
Êlan kliăng:
“Blŭ bĕ kơ phung ƀuôn sang Israel, brei diñu djă ba mnơ̆ng myơr kơ kâo. Brei ih mă brei mnơ̆ng anăn kơ kâo mơ̆ng jih jang mnuih myơr hŏng ai tiê čŏng čiăng.” (Klei Kbiă 25:2).
Klei êmuh ksiêm mĭn: Klei tal êlâo brei mâo hlăm klei myơr ya jing? Ya mnơ̆ng phung ƀuôn sang Aê Diê myơr kơ Aê Diê? Klei Aê Diê ƀuăn kơ phung ƀuôn sang ya klei brei thâo kơ Ñu? Ya klei hriăm drei mâo mơ̆ng klei hriăm hruê anei?
Bruă myơr mnơ̆ng kơ Aê Diê tal êlâo brei mâo mơ̆ng ai tiê klei mĭn čŏng čiăng (êlan 2). Phung ƀuôn sang čŏng myơr mnơ̆ng kơ Yêhôwa mâo mah, prăk, kông, čhiăm ñuôm êa piơk, hrah jŭ, hrah huč, kbuă điêt aruăt; leh anăn mlâo bê, klĭt biăp knô mkra leh, klĭt jăk siam, leh anăn kyâo akasi; êa boh ôliwơ kơ pui diăn; mnơ̆ng ƀâo mngưi kơ êa ƀâo mngưi pioh trôč leh anăn pioh kơ mnơ̆ng ƀâo mngưi; boh tâo ônik leh anăn lu boh tâo yuôm mkăn. Jih jang mnơ̆ng yuôm anei dưi yua pioh mkŏ mjing sa anôk doh jăk kơ Aê Diê dôk, leh anăn ăt jing anôk phung ƀuôn sang kkuh mpŭ kơ Ñu.
Mprăp ai tiê myơr mnơ̆ng yuôm bhăn bi êdah ai tiê mpŭ kơ Aê Diê. “Kyuadah ti anôk mâo ngăn drăp yuôm ih, tinăn mơh ai tiê ih srăng dôk.” (Y-Mathiơ 6:21). Hlăm jih pă êtuh thŭn jing hlŭn ti čar Ệip, phung ƀuôn sang Aê Diê ruah ngă bruă suăĭ êmăn leh anăn tŭ klei arăng ktư̆ juă djăp mta, knŏng čiăng mâo djăp mnơ̆ng ƀơ̆ng grăp hruê. Êlâo kơ phung ƀuôn sang Aê Diê ruah kbiă mơ̆ng čar Êjip, Aê Diê mtă mtăn phung ƀuôn sang Aê Diê brei akâo mnơ̆ng hŏng mah, kông, čhum ao mnuih Êjip. Ñu brei digơ̆ mâo klei pap ti anăp phung Êjip leh anăn diñu “plah mă” dŏ dô phung Êjip (Klei Kbiă 3:21-22; 11:2; 12:35-36). Aê Diê kpă ênô brei phung Êjip tla ai kơ phung ƀuôn sang Aê Diê ruah čiăng kơ ară anei diñu dưi rŭ mdơ̆ng Sang čhiăm kơ Aê Diê.
Phung ƀuôn sang Aê Diê brei rŭ mdơ̆ng Sang chiăm djŏ tui si klei gĭt gai ƀhĭ klĭ mơ̆ng Aê Diê snăn Ñu ƀuăn srăng dôk ti krah diñu (êlan 8). Aê Diê jing Pô doh jăk. Djăp mta klei Aê Diê ktrâo lač brei dưi hluê ngă kluôm ênŭm hŏng ai tiê čŏng čiăng, amâo dưi kčah ênoh amâodah ngă khă bi leh. Sang čhiăm Yêhôwa jing anôk doh jăk. Klei Aê Diê dôk tinei ngă kơ anôk anei jing doh jăk. Sang čhiăm Yêhôwa srăng dôk ti krah leh anăn riêng gah jing sang čhiăm phung ƀuôn sang. Klei Aê Diê dôk ti krah phung ƀuôn sang Israel ngă kơ djuê ana anei jing doh jăk. Mâo Aê Diê kiă kriê leh anăn atăt gai, klei hdĭp diñu srăng êbeh dlai hlăm djăp mta bruă.
“Prăk jing dŏ kâo, leh anăn mah jing dŏ kâo, Yêhôwa kơ phung kahan lač” (Y-Agê 2:8). Aê Diê jing Pô Hrih Mjing. Ñu hrih leh jih lăn ala êngĭt adiê knŏng hŏng klei Ñu lač. Ñu mprăp leh djăp klei jăk hĭn kơ drei dưi dưn. Jih jang ya klei drei dôk păn kjăp, mâo klei hdĭp drei pô jing dŏ Aê Diê sơaĭ. Aê Diê doh jăk leh anăn Ñu mơak dôk hlăm sa Sang Yang doh jăk. Sang čhiăm Aê Diê dưi rŭ mdơ̆ng mơ̆ng dŭm mta mnơ̆ng yuôm bhăn, jăk siam leh anăn kjăp hĭn. Hruê anei, asei mlei grăp čô phung đaŏ kơ Krist jing sa Sang kơ Aê Dôk, kyua anăn brei mă asei mlei pô bi guh kơang Anăn Aê Diê (I Kôrantô 6:19-20).
Si ngă drei ngă leh, leh ăñ dôk rŭ mdơ̆ng Sang Yang kơ Aê Diê?
Ơ Khua Yang, kâo bi mni lač jăk kơ Ih kyua mâo Ih kâo mâo jih jang mnơ̆ng. Akâo kơ Ih đru kâo răng kriê asei mlei jing Sang doh jăk čiăng kơ Aê Diê dôk, čiăng hluê ngă klei Ih čiăng leh anăn thâo mơak myơr klei jăk hĭn kâo mâo kơ Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 13
Kênh Youtube BHKTHN:
