I Yauhas 3:14-18
Nqe cim zaj kawm:
“Yog nej ib leeg hlub ib leeg, sawvdaws thiaj yuav paub hais tias nej yog kuv cov thwjtim.” (Yauhas 13:35)
Lus nug xav:
– Yam dabtsi qhia tau hais tias peb yeej paub tus Tswv tiag tiag thiab yog Nws tug?
– Timthawj Yauhas hais txog ob yam dabtsi yuav tsum ua kom qhia tshwm kev hlub rau cov kwvtij nkauj muam?
– Kev hlub dhau ntawm tes haujlwm thiab qhov tseeb yog li cas?
Nyob hauv Timthawj Yauhas, tus uas tau tus Tswv hlub tej tsab ntawv, nws qhia meej hais tias txojkev hlub tsis yog ib txojkev ua neej xwb, tiamsis tseem yog tus cwjpwm tseem ceeb ntawm tus ntseeg lub neej. Nyob ntawm no, nws hais meej hais tias txojkev hlub hauv Pawg Ntseeg yog ib qho pov thawj qhia hais tias peb yeej paub tus Tswv tiag tiag thiab peb yog tus Tswv tug. Nws hais tias: “Peb paub hais tias peb twb dim txojkev tuag lawm, nimno peb muaj txojsia tshiab; peb paub li no rau qhov peb muaj lub siab hlub peb cov kwvtij. Tus uas tsis muaj lub siab hlub lwm tus, tus ntawd zoo ib yam li tus neeg uas tuag lawm” (nqe 14). Nws qhia meej li no vim txojkev hlub tsis yog pib ntawm tibneeg los, tiamsis pib ntawm Vajtswv tus mojyam: “Tus uas tsis muaj kev hlub, tus ntawd yeej tsis paub Vajtswv, rau qhov Vajtswv yog tus uas muaj kev hlub” (I Yauhas 4:8). Yog li ntawd, txojkev hlub hauv tus ntseeg lub neej lossis hauv Pawg Ntseeg yog txojkev hlub uas ntws hauv tus Tswv txojkev hlub uas Nws hlub peb ua ntej los. Peb pheej ua neej yuamkev vim peb sib hlub raws li tibneeg tej kev xav, kev coj zoo thiab tej kev cai. Tswv Yexus hlub peb, Nws ua qauv qhia txog kev ua haujlwm, kev txi yus tus kheej thiab nqua hu kom peb sib hlub ib yam li Nws.
Txuas ntxiv, Timthawj Yauhas qhia meej txog tej yam uas yuav tsum ua kom qhia tshwm txojkev hlub rau cov kwvtij nkauj muam. Qhov xubthawj, tsis txhob ntxub kwvtij (nqe 15). Nws rov hais txog Tswv Yexus tej lus qhia hais tias tus uas chim lossis cem nws tus kwvtij twb yog ua txhaum ib yam li tua neeg lawm (Mathais 5:22). Txojkev hlub pib ntawm kev hloov lub siab thiab txojkev xav dua tshiab thaum peb tau txais txojsia tshiab uas Vaj Ntsujplig pub, ces yuav tsis muaj kev khib ntxub nyob hauv peb lub siab lawm. Qhov ob, txojkev hlub tsis yog tsuas hais ntawm ncauj xwb, tiamsis yuav tsum nqis tes ua haujlwm los pab, txaus siab txi yus tus kheej thiab tsis xav kom luag them rov qab (nqe 16-17). Hais kom meej ntxiv, txojkev hlub cov kwvtij ua rau peb txaus siab faib tej uas peb muaj rau cov kwvtij uas tabtom raug kev txomnyem thiab cheemtsum kev pab. Kev sib faib tej uas peb muaj kuj yog ib txojcai ua neej kom peb tsis txhob qaug rau kev muaj txiag nplua nuj. Txawm li ntawd los, peb yuav tsum thov Vaj Ntsujplig coj kev, kom peb tsis txhob raug lwm tus dag peb noj.
Qhov kawg, Timthawj Yauhas kuj ceeb toom peb kom sib hlub tseeb tiag (nqe 18). Txojkev hlub tsis yog nyob ntawm “di ncauj ntsis nplaig” xwb, tiamsis yuav tsum qhia tshwm los ntawm tej haujlwm thiab nyob hauv tus Tswv qhov tseeb. Kev hlub hauv qhov tseeb txhais hais tias tsis zais kwvtij tej kev txhaum, tiamsis yuav tsum siv Vajtswv Txojlus los qhuab ntuas thiab ceeb toom thaum lawv mus yuamkev, los ntawm lub homphiaj pab kom lawv ua neej zoo dua qub. Txojkev hlub kuj yuav tsum hlub los ntawm lub siab dawb paug. Hlub lwm tus tsis yog kom tau txais kev qhuas, tsis yog vim xav tau txiaj ntsig rau yus tus kheej lossis xav tswj lwm tus, tiamsis yog vim hwm tus Tswv thiab muaj siab hmov tshua lwm tus tseeb tawm puag hauv nplooj siab hloov dua tshiab los.
Thov Vajtswv,
Leej Txiv uas hlub tshua, nyuam yaus ua Koj tsaug vim Koj yog txojkev hlub. Thov Koj hloov nyuam yaus lub siab dhau ntawm Koj txojkev hlub, kom nyuam yaus hlub taus kwvtij nkauj muam los ntawm txojkev hlub ntawd. Nyuam yaus tuav Tswv Yexus Khetos lub npe thov, Amees.
Peb tabtom ua neej sib hlub nrog txhua tus tswvcuab hauv Pawg Ntseeg li cas lawm?
Nyeem Vajluskub hauv peb lub xyoos: Yauj 3
Kênh Youtube BHKTHN:
