Ntawv Nkauj 89:14
Nqe cim zaj kawm:
“Koj lub tebchaws cog ruaj khov rau ntawm txojkev ncaj ncees thiab kev tseeb, txhua yam uas koj ua qhia rau peb paub hais tias koj yog tus siab zoo thiab muaj kev hlub.” (Ntawv Nkauj 89:14)
Lus nug xav:
– Ntawv Nkauj 89:14 qhia txog Vajtswv txojkev ncaj ncees thiab kev hlub li cas?
– Pawg Ntseeg tau nqua hu los tsim tsa rau saum lub hauvpaus ntawd li cas?
– Peb tau nqua hu ua neej muaj kev haujsim ntawm kev ncaj ncees thiab kev hlub li cas?
Ntawv Nkauj 89:14 qhia meej hais tias: “Koj lub tebchaws cog ruaj khov rau ntawm txojkev ncaj ncees thiab kev tseeb”, txhais hais tias Vajtswv txhua yam kev tswjhwm puav leej nyob saum tus qauv uas ncaj ncees, dawb huv kawg nkaus. Nws tsis ua raws li kev xav lossis kev xaiv ntsej muag, tiamsis Nws ibtxwm txiav txim ncaj ncees thiab raws li qhov tseeb. Tsis tas li ntawd xwb, nqe Vajluskub no tseem qhia ntxiv hais tias: “txhua yam uas koj ua qhia rau peb paub hais tias koj yog tus siab zoo thiab muaj kev hlub”, qhov no qhia rau peb pom hais tias txhua yam uas Vajtswv ua puavleej yog los ntawm kev hlub thiab kev ncaj ncees rau Nws tej lus cogtseg, kom coj txojsia los rau txhua tus. Xibhwb Spence Jones tau hais meej txog lub ntsiab no hais tias: “Txhua yam uas Vajtswv ua, Nws yeej ua hauv qhov tseeb thiab ncaj ncees.” Qhov no qhia hais tias Vajtswv txojkev tswjkav tsis yog tsuas ncaj ncees xwb, tiamsis tseem muaj puv npo koob hmoov hlub, niaj hnub coj mus rau kev cawm dim thiab txhim kho tibneeg. Vajtswv tus uas ncaj ncees txiav txim rau kev txhaum, tiamsis Nws yog tus hlub tshua kuj pub koob hmoov hlub los cawm cov neeg txhaum uas hloov siab lees txim. Yog li ntawd, Vajtswv yog tus dawb huv hauv txojkev ncaj ncees thiab yog tus nyob ze tibneeg hauv txojkev hlub; ob yam no cais tsis tau, tiamsis sib txuam ua ke zoo kawg nkaus.
Pawg Ntseeg kuj tau nqua hu kom tsim tsa rau saum lub hauvpaus ntawd, ua neej raws li Vajtswv Txojlus qhov tseeb thiab tuav lub neej ncaj ncees tabmeeg Nws. Thaum txhua tus ntseeg ua neej ncaj ncees hauv lawv tej kev xav, tej lus hais thiab tej haujlwm, ces Pawg Ntseeg yuav sawv ruaj thiab qhia tshwm Vajtswv txojkev dawb huv. Tseeb tiag, Vajtswv tsis yog tus ncaj ncees xwb, tiamsis Nws tseem puv npo txoj kev hlub thiab kev ua raws nraim Nws tej lus cogtseg. Nws txojkev hlub mus ua ntej, qhia tshwm Nws lub siab dawb siab zoo thiab nyob ze tibneeg. Yog li ntawd, Pawg Ntseeg tsis yog tsuas tuav qhov tseeb xwb, tiamsis tseem yuav tsum ua neej sib hlub, uas yog: paub zam txim, ua siab ntev thiab sib txhawb zog. Kev hlub ua rau qhov tseeb muaj sia thiab coj kev txhim kho los rau hauv cov ntseeg.
Ntawv Nkauj 89:14 qhia meej ob tug mojyam tseem ceeb ntawm Vajtswv los ua lub hauvpaus rau Pawg Ntseeg kev ua neej. Thaum kev ncaj ncees thiab kev hlub muab los koom ua ke, Pawg Ntseeg yuav qhia tshwm Vajtswv tus yamntxwv txaus nkaus. Kev ncaj ncees ua kom muaj lub hauvpaus ruaj khov, pab kom kev hlub tsis mus yuam kev; hos kev hlub coj kev sib koom siab thiab kev sov siab los, pab kom kev ncaj ncees tsis dhau los ua kev coj nruj thiab tawv. Vim li ntawd, txhua tus ntseeg tau nqua hu los ua neej haujsim nrog ob yam no, kom Pawg Ntseeg dhau los ua timkhawv uas muaj sia qhia tshwm Vajtswv lub tshwjchim ci ntsa iab.
Thov Vajtswv,
Tus Tswv, thov Koj tsim tsa nyuam yaus lub neej rau saum Koj txojkev ncaj ncees thiab pub Koj txojkev hlub puv nkaus nyuam yaus lub siab. Thov pab kom nyuam yaus ua neej hauv qhov tseeb thiab hlub lwm tus raws Koj txojkev ncaj ncees, kom Pawg Ntseeg thiaj qhia tshwm Koj lub tshwjchim. Nyuam yaus tuav Tswv Yexus Khetos lub npe thov, Amees.
Peb tau ua neej ncaj ncees thiab sib hlub nrog peb cov kwvtij nkauj muam hauv Pawg Ntseeg li cas lawm?
Nyeem Vajluskub hauv peb lub xyoos: Ntawv Nkauj 132-133
Kênh Youtube BHKTHN:
