II Pêtrôs 1:16-18
“Nhôn roi kơ iĕm tơdrong Kră Yang Yêsu Krist Sư mơsêh mơyang đơ̆ng sơ̆ ‘mơ̆i păng tơdrong Sư wă jur tơ teh ning-mônh; ưh kơ sĭ nhôn chă pơjing kơdih thoi lu bơngai ‘bơ̆r đon hơgei chă pơjing, ưh ôh. Nhôn ‘bôh Sư mơsêh mơyang, Sư ‘lơ̆ng rŏ tơpă, na nhôn gơh roi kơ lu iĕm thoi noh.” (II Pêtrôs 1:16)
Nơ̆r jet tơchĕng pơwao:
– Dôm lu tơdrong tơpăt gah Kră Yang Yêsu đei ră roi kiơ̆ kơ tơdrong đêl ‘bôh ayơ?
– Sư pơma hơđăl tơdrong sư ră roi noh tơdrong kơdih sư đei hlôi mơn thoi yơ?
– Bơ̆n yua iŏk ‘bai pơhrăm ‘nâu thoi yơ lăm tơdrong ră roi Tơdrong ‘Nao ‘Lơ̆ng?
‘Bok Pêtrôs pơma dơnuh gah bơngai bơtho kơ Khul Bơngai Lui noh “Inh arih tơ ala teh âu dang yơ, inh bơtho tơ’blŏk kơ iĕm dang noh,” (II Pêtrôs 1:13). Wă băt hơđăl tơdrong noh, ‘bok Pêtrôs khan hơđăl tơdrong tơpă gah Kră Yang Yêsu mă lu jơ̆ng ‘bang đei roi ưh kơ sĭ roi minh tơdrong hơ’mon chă pơcheh dah mă tơdrong tơchĕng kon bơngai thoi “chă pơjing kơdih thoi lu ‘bơ̆r đon hơgei chă pơjing” (trong 16), mălei noh dôm tơdrong đei tơpă. Dôm nơ̆r sư pơma noh dôm nơ̆r đơ̆ng Yang Bơhngol ‘Lơ̆ng bơtho tơ’bôh.
Kră Yang Yêsu Krist mă ‘bok Pêtrôs đei roi noh jơ̆ Tơ’ngla “’Bă Sư ăn kơ Sư mơsêh ‘lơ̆ng rŏ na nhôn roi kơ iĕm” (trong 17). Sư pơma hơđăl tơdrong Sư roi noh tơdrong đêl sư hlôi mơn ‘bôh păng măt tơdrong ‘lơ̆ng rŏ. Kră Yang đei tơ’bôh kơ lu sư tơkông (trong 16). Sư kư̆m đei kơtơ̆ng nơ̆r ‘Bok Kei-Dei Yang ‘Bă pơma roi hơđăl gah Kră Yang Yêsu: “Sư âu Kon Inh mă ‘mêm kơeng tơpă, inh lăp đon kơ Sư dêh” (trong 17b). ‘Noh bơih Kră Yang Yêsu tơ’bôh tơdrong mơsêh Sư kơ ‘bok Pêtrôs păng ‘bar ‘nu jơ̆ng ‘bang nai noh Yakơ păng Yôhan (Mathiơ 17:1-8). Tơdrong mă lu sư jơ̆ng roi đêl măt lu sư ‘bôh, đon kơtơ̆ng gah tơdrong ‘Bok Kei-Dei tơ’bôh ăn tơgŭm kơ bơngai lui mă rim kơ jơhnơr đei đon lui kơjăp păng arih hơmĕng kơ Kră Yang Yêsu. Yua kơ Sư kư̆m kon bơngai, kư̆m Kră Yang ‘Bok Kei-Dei mơsêh ‘lơ̆ng rŏ. Yang gô jur dơ̆ng thoi Sư đei tơ’bôh kơ ‘bok Pêtrôs lăm tơdrong Kră Yang tơwir akâu Sư.
Athei dơ̆ng kơjăp lăm đon lui yua kơ bơ̆n lui kơ Kră Yang Yêsu Krist Tơ’ngla mă lu jơ̆ng ‘bang Sư đei ‘bôh hăm măt păng kơtơ̆ng păng đon. Sư chu lôch, iung arih păng tŏk tơ plĕnh. Sư kư̆m gô jur dơ̆ng wă iŏk lu bơ̆n brŏk tơ Sư. Tơdrong roi tơdrong đêl măt ‘bôh bơih kư̆m tơ’bôh dah minh ‘nu bơngai lui ưh ơ hlôi mơn Kră Yang lei na ưh kơ gơh ră roi Anăn Kră Yang kơ bơngai nai gơh đei yua. ‘Nĕ kơ pơma tơdrong kiơ pha ‘biơ̆ kơ tơdrong ră roi gah Tơdrong ‘Nao ‘Lơ̆ng gơh klaih na tơdrong tơm sư noh Kră Yang Yêsu Krist, Tơ’ngla mă tơplih bơih păng oei wă tơplih tơdrong arih bơ̆n đơ̆ng tơdrong hlôi mơn kơdih, ưh kơ sĭ roi kiơ̆ kơ đơ̆ng lăm hla bơar dah dôm tơdrong roi hơ’mon kư̆ kă đĕch ôh. Athei pơgơ̆p hăm Kră Yang bĕ păng nơ̆r Sư wă ră roi Tơdrong ‘Nao ‘Lơ̆ng hăm dôm tơdrong đêl hlôi mơn bơih.
Ơ Kră Yang, bơnê kơ Ih yua kơ inh băt lui kơ ‘Bok Kei-Dei đei tơpă. Apinh Ih tơgŭm inh kơjăp lăm đon lui, păng rim năr mơn đei Kră Yang rai lơ hloh, wă kơ inh pơ̆n nuih ră roi Tơdrong ‘Nao ‘Lơ̆ng dŏng pơklaih noh tơdrong mă inh đei ‘bôh, đon kơtơ̆ng roi ăn kơ bơngai jum dăr kơ inh, wă kơ lu sư lui păng gơh klaih. Krao khan yua anăn Kră Yang Yêsu Krist, Amen.
Bơ̆n oei ră roi Tơdrong ‘Nao ‘Lơ̆ng dŏng pơklaih kiơ̆ kơ tơdrong hơnă tơm ayơ?
Đŏk Sơ̆p Hla bơar ‘Bok Kei-Dei lăm pêng sơnăm: II Kôrintô 12
Kênh Youtube BHKTHN:
