2 Petus 1:16-18
Nqe cim:
“Peb twb qhia zaj uas hais txog peb tus Tswv Yexus Khetos lub hwjchim thiab zaj uas nws yuav rov qab los rau nej lawm; thaum peb qhia tej ntawd rau nej, peb tsis tau qhia raws li tej dabneeg uas cov neeg txawj ntse hais, tiamsis peb lub qhovmuag yeej pom kiag nws lub hwjchim lawm ntag” (2 Petus 1:16)
Lus nug xav:
– Tej lus tseeb hais txog Tswv Yexus tau tshaj tawm raws li tej xwmtxheej twg?
– Petus hais meej yam uas nws tshaj tawm nws tus kheej tau saj li cas lawm?
– Peb siv zaj kawm no li cas hauv kev tshaj tawm Txojmoo Zoo?
Timthawj Petus qhia txog tus uas qhia Vajtswv Txojlus lub siab yog “… yuav tsum ntuas kom nej nco ntsoov tej ntawd” (2 Petus 1:13). Cia kom lees paub meej qhov no, Petus hais tseeb hais tias tej lus uas hais txog Tus Tswv Yexus Khetos uas cov thwjtim tshaj tawm tsis yog neeg lub tswvyim tsim los lossis “tej dabneeg uas cov neeg txawj ntse hais” (nqe 16), tiamsis yog ib qhov xwmtxheej uas tau tshwmsim muaj tiag tiag. Tej lus uas nws hais tawm los puavleej yog los ntawm Vaj Ntsujplig qhia.
Tus Tswv Yexus Khetos uas Petus tshaj tawm yog Tus uas “Leej Txiv pub koob meej thiab pub lub tshwjchim uas ci ntsa iab rau nws” (nqe 17). Petus hais meej hais tias tej uas nws tshaj tawm yog yam uas nws qhovmuag ntsia ntsoov pom Yexus lub cev hloov ci ntsa iab dawb paug saum roob (nqe 16). Nws kuj hnov Vaj Leej Txiv lub suab hais tias: “Tus no yog kuv tus Tub uas kuv hlub, kuv txaus siab heev rau nws” (nqe 17). Ntawd yog lub sijhawm uas Tswv Yexus tus yamntxwv Vajtswv tau tshwm los rau Petus, Yakaunpaus thiab Yauhas pom (Mathais 17:1–8). Tej uas cov thwjtim qhia yog tej uas lawv qhovmuag pom thiab pobntseg tau hnov txog tej uas Vajtswv tau muab nthuav tawm kom pab tau cov ntseeg txhua tiam muaj kev ntseeg ruaj khov thiab muaj txoj kev cia siab rau ntawm Tswv Yexus. Vim Tswv Yexus yog tibneeg tiag thiab yog Vajtswv tus muaj hwjchim thiab muaj koobmeej. Nws yuav rov qab los raws li Nws twb qhia ua ntej rau Petus hauv qhov xwmtxheej uas Nws hloov cev saum lub roob lawd.
Cia li sawv ruaj khov hauv kev ntseeg vim peb tabtom ntseeg Yexus Khetos, Tus uas cov thwjtim qhovmuag pom thiab pobntseg hnov. Nws raug tuag, sawv hauv qhov tuag rov los, thiab mus saum Ntuj Ceebtsheej lawm. Nws tseem yuav rov qab los tos peb mus nrog Nws nyob. Qhov uas tshaj tawm yam uas qhov muag twb tau pom thiab tau hnov, kuj qhia peb hais tias, yog ib tug ntseeg tsis tau saj kev paub tus Tswv zoo ces nws yeej tsis muaj peevxwm tshaj qhia tus Tswv lub npe rau lwm tus kom tawg paj txi txiv. Peb tsis txhob hais lwm yam, tsuas yog tshaj tawm Txojmoo Zoo kev cawmdim uas yog Tswv Yexus xwb, Tus uas tabtom hloov peb lub neej dua tshiab kom peb txhua tus paub Nws, peb yeej tsis qhia txoj kev ntseeg sau rau ntaub ntawv lossis tej dabneeg uas neeg hais. Cia peb nyob ze Tus Tswv thiab Nws Txojlus kom peb tshaj tawm Txojmoo Zoo raws li tej kev paub uas peb twb tau saj lawm.
Thov Vajtswv,
Tus Tswv, ua Koj tsaug uas Nyuam yaus ntseeg Tus Vajtswv uas muaj txojsia tiag tiag. Thov pab kom nyuam yaus muaj kev ntseeg ruaj khov thiab niaj hnub txuas nrog Koj ntau dua hauv nyuam yaus lub neej. Thov pub lub siab tawv rau nyuam yaus kom nyuam yaus tshaj tawm Txoj Moo Zoo rau txhua tus nyob ib puag ncig nyuam yaus, qhia txog tej uas nyuam yaus tau pom thiab tau paub txog Koj, kom lawv ntseeg Koj thiab tau txais txoj kev cawmdim. Nyuam yaus tuav Tswv Yexus Khetos lub npe thov, Amees.
Peb tabtom tshaj qhia Txojmoo Zoo los ntawm qhov twg?
Nyeem Vajluskub hauv peb lub xyoos: 2 Kauleethaus 12
Kênh Youtube BHKTHN:
