Klei Aê Diê Blŭ: Klei Bi Hriêng 16:6
Êlan kliăng: “Hŏng klei khăp leh anăn klei sĭt suôr arăng lăm klei wê, leh anăn hŏng klei huĭ mpŭ kơ Yêhôwa arăng đuĕ mơ̆ng klei soh.” (Klei Bi Hriêng 16:6)
Klei êmuh ksiêm mĭn: Ya mta klei ba hriê klei pap brei leh anăn klei doh jăk? Si ngă čiăng dưi mă tŭ jih klei anei?
Êlan Klei Bi Hriêng hruê anei dôk ti plah wah êlan 1 leh anăn êlan 9, trăn anei mtô kơ hdră bruă leh anăn klei kñăm čiăng kiă kriê mơ̆ng Aê Diê. Êlan 4 mtô snei, Aê Diê hrih mjing jih jang mnơ̆ng kơ Ñu pô, jih jang hdră bruă mơ̆ng Khua Yang, leh anăn wăt hdră klei bi mtlaih Ñu brei kơ anak mnuih, kñăm čiăng mpŭ mni kơ Ñu sơăi (Klei Bi Êdah 4:11).
Tơdah Aê Diê dôk ti anăp anak mnuih knŏng hŏng klei doh jăk leh anăn klei kpă ênô khut khat , snăn amâo mâo sa čô dưi tlaih mơ̆ng klei phat kđi ôh. Bi mni kơ Khua Yang, găn hŏng Khua Yang Yêsu, anak mnuih dưi tlaih mơ̆ng klei Aê Diê phat kđi kyua klei soh pô, leh anăn klei Ñu bi kmhal phung mnuih bi kdơ̆ng amâo djŏ jing knhal tuč ôh. Ti djiêo mbĭt hŏng klei doh jăk leh anăn klei kpă ênô, Aê Diê bi êdah wăt “klei jăk leh anăn klei kpă ênô”, mblang jing klei khăp leh anăn klei sĭt suôr tui si knuih Khua Yang – klei sĭt nik kơ Ñu pô – Ñu mkra sa hdră bi mtlaih pioh kơ anak mnuih rai luč êlâo kơ hrih mjing lăn ala, hŏng klei Anak Ñu săn asei mlei (I Y-Pêtrôs 1:18-20).
Ai tiê huĭ mpŭ kơ Aê Diê Yêhôwa jing sa klei mpŭ mni bŏ hŏng klei đăo knang kơ Aê Diê, jing klei thâo kral hlei Ñu jing, atăt kơ klei mkŏ mjing klei bi mguôp hŏng Aê Diê găn hŏng Khua Yang Yêsu, wăt klei luă gŭ đup gưt jih klei Khua Yang mtă. Leh anăn klei anei knŏng mâo hlăm phung thâo kral leh anăn tuôm găn leh klei bi mtlaih mơ̆ng Aê Diê brei kơ ñu pô hŏng “klei khăp leh anăn klei sĭt suôr” mơ̆ng Khua Yang. Mbĭt djiêô anăn, tơdah sa čô thâo kral “klei khăp leh anăn klei sĭt suôr” mơ̆ng Aê Diê, snăn pô anăn ăt srăng dôk hdĭp “thâo khăp leh anăn sĭt suôr” hŏng mnuih mkăn msĕ mơh. Jing jăk êdi yơh tơdah drei thâo kral drei mâo klei ktang tơl dưi bi tui klei soh, čiăng lač dưi hĭn hŏng klei soh mơ̆ng mnuih mkăn ngă kơ drei. Klei soh jing sa klei ngă mâo hlăm anăn klei jhat, klei čuôt klih, klei bi mneh msao hŏng jih jang mnuih. Klei bi rŭng anăn bi kgŭ klei ăl ngêñ hlăm ai tiê pô arăng ngă jhat. Ƀiădah lĕ, klei ăl ngêñ mơ̆ng phung năng ăl ngêñ dưi bi êdu bi hlai kyua hŏng “klei khăp leh anăn sĭt suôr”. Khua ƀĭng kna Y-Pêtrôs mtô snei: “Êgao hĭn kơ jih jang, brei diih bi khăp hdơ̆ng diih nanao, kyuadah klei khăp guôm lu klei soh.” (I Y-Pêtrôs 4:8).
Hlăm klei bi hriêng kơ Dĭng Buăl Amâo Pap Brei Ôh (Y-Mathiơ 18:23-35), Khua Yang Yêsu mtô klă mngač snei, klei huĭ mpŭ leh anăn klei thâo hdơr knga kơ Khua Yang, brei bi êdah hŏng klei hdĭp thâo khăp leh anăn thâo pap brei. Leh anăn drei ăt khăng wah lač tui si klei Khua Yang Yêsu mtô: “Pap brei kơ klei soh hmei, msĕ si hmei pap brei mơh kơ mnuih bi msoh kơ hmei leh.” (Y-Mathiơ 6:12). Kyuanăn bi êdah bĕ klei khăp Khua Yang kơ phung ayŏng adei drei hŏng klei hdĭp thâo pap brei leh anăn doh jăk.
Si drei dôk hdĭp bi êdah klei pap brei leh anăn klei doh jăk?
Wah lač: Ơ Khua Yang, kâo bi mni lač jăk kơ Khua Yang kơ klei bi mtlaih Ih brei kơ kâo, kyua klei Ih pap leh anăn klei Ih pap brei. Kâo ƀuăn bi êdah klei khăp Ih kơ phung riêng gah kâo hŏng klei hdĭp thâo pap brei leh anăn doh jăk. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 119:1-56
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
