2 Petus 1:3-4
Nqe cim:
“Vajtswv tus uas muaj hwjchim, nws pub txhua yam zoo rau peb, kom peb ua tau peb lub neej haum nws siab. Nws ua li ntawd rau qhov peb paub tus uas hu peb los yuav nws lub hwjchim, thiab pab tau peb ua tau neeg ncaj ncees ib yam li nws” (2 Petus 1:3)
Lus nug xav:
– Thaum peb paub Vajtswv ntawm peb tus kheej tiag tiag, Vajtswv npaj txhij thiab yuav pub yam dabtsi rau peb?
– Thaum peb tau txais tej koob hmoov sab ntsujplig ntawd lawm, Vajtswv xav kom peb ua neej li cas?
– Peb yuav tsum ua dabtsi thiaj tau txais Vajtswv tej lus cog tseg?
Timthawj Petus hais khov kho hais tias thaum ntawm peb tus kheej zeem paub Vajtswv yog “Tus uas muaj hwjchim, nws pub txhua yam zoo rau peb, kom peb ua tau peb lub neej haum nws siab” ces Nws kuj npaj txhij muab “txhua yam” ntawm sab ntsujplig uas peb cheem tsum pub rau peb thiab ntawd yog “txoj sia thiab kev ua neej haum Vajtswv siab”. Lo lus “txhua yam” txhais hais tias Vajtswv pub txaus nkaus thiab npluamias. Ua ntej, Vajtswv pub txoj kev cawmdim rau peb dhau los ntawm Tswv Yexus Khetos txoj kev tuag thiab sawv hauv qhov tuag rov los. Thaum peb ntseeg Tswv Yexus, peb tau txais txojsia ntev dhawv mus ib txhis thiab ua neej txaus siab. Qhov tim ob, Vaj Ntsujplig pub lub zog rau tus uas ntseeg Nws kom kovyeej tej kev nyuaj siab, kev sim siab, pab kom peb ceev ruaj kev ntseeg thiab loj hlob sab ntsujplig (nqe 3). Peb yuav tsum nco ntsoov “Vajtswv tus uas muaj hwjchim, nws pub txhua yam zoo rau peb, kom peb ua tau peb lub neej haum nws siab” ua neej dawbhuv thiab muaj kev zoo siab sib txuas nrog Nws txhua hnub.
Vajtswv tus uas muaj hwjchim twb npaj txhij thiab pub tej koob hmoov zoo kawg nkaus rau peb lawm, vim li ntawd, Vajtswv xav kom Nws cov menyuam yuav tsum khiav deb “tej kev phem kev qias uas yuav coj neeg ntiajteb mus raug kev puastsuaj”, Nws xav kom peb ua lub neej tsis muaj kev txhaum thiab tej kev phem kev qias ntiajteb khi tsis tau peb kom peb muaj lub neej dawbhuv “zoo ib yam li Vajtswv lub” thiab yim hnub yim zoo li Yexus Khetos zuj zus (nqe 4).
Qhov no qhia hais tias peb tseem nyob hauv ntiajteb no ntev li cas, ces peb yeej yuav ntsib kev dag ntxias, kev sim siab los ntawm tej kev txhaum npaum li ntawd. Tiamsis yog peb tuav rawv Vajtswv tej lus cog tseg, nyob ruaj hauv txoj kev ntseeg, thiab ua neej hwm Vajtswv, ces Vaj Ntsujplig yuav qhia peb, tiv thaiv peb, thiab pub dag zog rau peb kom kovyeej tej ntawd. Qhov uas Vajtswv twb npaj txhij txoj sia thiab kev ua neej hwm Vajtswv rau peb lawd kuj qhia hais tias peb tsis txhob khavtheeb thiab xav hais tias yus muaj zog txaus los kovyeej kev txhaum lawm, tiamsis peb yuav tsum txo hwj chim thiab cia Vaj Ntsujplig coj peb, pab peb, thiab ntxiv zog rau peb txhua hnub.
Txoj haukev uas peb yuav txais tau yam uas Vajtswv twb npaj txhij pub rau peb lawd yog khiav deb “tej kev phem kev qias uas yuav coj neeg ntiajteb mus raug kev puastsuaj” hauv txhua tus tus kheej yuav tsum tuav rawv Vajtswv tej lus cog tseg dhau los ntawm kev kawm Vajtswv Txojlus thiab kev thov Vajtswv txhua hnub. Vajtswv pub “txoj koob hmoov uas zoo kawg nkaus rau peb” (nqe 4).Tiamsis yog peb tsis nyeem thiab kawm Vajtswv Txojlus, peb yuav tsis tau txais tej uas twb coglus tseg rau peb lawm.
Thov Vajtswv,
Tus Tswv, nyuam yaus ua Koj tsaug vim Koj yog tus pub txoj sia thiab kev ua neej hwm Vajtswv rau nyuam yaus. Thov pab kom nyuam yaus tuav rawv Koj tej lus cog tseg, rau siab kawm paub Koj Txojlus thiab thov Vajtswv txhua hnub. Thov pub kom nyuam yaus kovyeej kev sim siab, paub ua neej hwm Koj, thiab paub muab nyuam yaus lub neej fij rau Koj kom haum Koj siab. Nyuam yaus tuav Tswv Yexus Khetos lub npe thov, Amees.
Peb puas rau siab nyeem thiab kawm Vajtswv Txojlus, thiab nrog Vajtswv sib raug zoo txhua hnub?
Nyeem Vajluskub hauv peb lub xyoo Malakaus 10
Kênh Youtube BHKTHN:
